ەلوردادا «نازارباەۆ مودەلى» كىتابىنىڭ تۇساۋى كەسىلدى

استانادا قر تۇڭعىش پرەزيدەنتى – ەلباسى كىتاپحاناسىنىڭ تالداۋ ورتالىعى «نازارباەۆ مودەلى» كىتابىنىڭ تۇساۋكەسەرىن وتكىزدى. جاڭا كوزقاراسپەن, ۇلگىمەن ەرەكشەلەنەتىن كىتاپتا قازاقستاننىڭ شيرەك عاسىرداعى مەملەكەتتىك قۇرىلىسىنا باسقارۋشىلىق تالداۋ جۇرگىزىلگەن, دەپ حابارلادى Baq.kz. كىتاپتىڭ اۆتورلارى – ماحمۇت قاسىمبەكوۆ, باقىتجان تەمىربولات جانە تيمۋر شايمەرگەنوۆ. «نۇرسۇلتان نازارباەۆتىڭ قىزمەتىنە ارنالعان جاڭا باسىلىمدى ۇسىنىپ وتىرعانىمىزعا وتە قۋانىشتىمىز. بۇگىنگى ءبىزدىڭ تۇساۋكەسەرىمىز ەلىمىز ءۇشىن ماڭىزدى قوس مەرەكە – تۇڭعىش پرەزيدەنت كۇنى مەن تاۋەلسىزدىك كۇنى ارالىعىندا ءوتىپ وتىر. مۇنىڭ تەرەڭ سيمۆولدىق ءمانى بار. سەبەبى, تاۋەلسىز قازاقستاننىڭ بۇكىل تاريحى ونىڭ كوشباسشىسىنىڭ ەسىمىمەن تىكەلەي بايلانىستى», – باقىتجان تەمىربولات. «نازارباەۆ مودەلى» كىتابى قر پرەزيدەنتى كەڭسەسى مەن ەلباسى كىتاپحاناسىنىڭ بىرلەسكەن جوباسى. ەڭبەك اۆتورلارى كۇردەلى ىشكى جانە سىرتقى جاعدايدا دامۋدىڭ داڭعىل جولىنا تۇسكەن جاس مەملەكەتتى باسقارۋدىڭ ناتيجەلى جۇيەسىن «نازارباەۆ مودەلى» دەپ اتايدى. بۇل مەملەكەتتىك قۇرىلىستىڭ ماڭىزدى كەزەڭدەرىندە, ەلباسىنىڭ ستراتەگيالىق رەفورمالارىندا, ماڭىزدى شەشىمدەرى مەن باستامالارىندا كەشەندى تۇردە كورىنىس تاۋىپ وتىر. اۆتورلاردىڭ ايتۋىنشا, جاڭا باسىلىم ەكونوميكاسى قارقىندى تۇردە دامۋعا بەت العان مەملەكەتتەردەگى تۇبەگەيلى وزگەرىستەر مەن جاڭعىرۋلار تاجىريبەسىنە قىزىعۋشىلىق تانىتاتىندار ءۇشىن پايدالى بولماق.