دونالد ترامپ وزىنە ءتيىستى بارلىق اكتسياسىن ساتىپ جىبەردى

The Washington Post باسىلىمىنىڭ حابارلاۋىنشا, بار بايلىعى 4,5 ملرد دوللارعا باعالانعان ميللياردەر جانە 2017 جىلدان باستاپ اق ءۇي تاعىنا وتىراتىن پرەزيدەنت دونالد ترامپ بيىل شىلدە ايىندا رەسپۋبليكالىق پارتيا اتىنان سايلاۋعا ءتۇسىپ جاتقاندا ءتۇرلى كومپانيالارداعى وزىنە تيەسىلى اكتسيالارىن ساتىپ جىبەرگەن ەكەن. سونىڭ ىشىندە بانكتەر مەن مۇناي كومپانيالارىنداعى ۇلەسى دە بار. جاڭادان سايلانعان پرەزيدەنتتىڭ ءباسپاسوز حاتشىسى دجەيسون ميللەر ترامپ ءوز اكتسيالارىن كىمدەرگە جانە قانشاعا ساتىپ جىبەرگەنى تۋرالى ايتۋعا اسىقپايدى. اقش زاڭى بويىنشا, ميللياردەر بۇل ساۋدا تۋرالى 2018 جىلدىڭ مامىر ايىنا دەيىن ەشكىمگە ءتىس جارماۋعا دا قۇقىلى. باسىلىمنىڭ مالىمەتىنشە, ترامپتىڭ پرەزيدەنتتىڭ قىزمەتىنە بيزنەستىڭ كەدەرگى كەلتىرمەۋى ءۇشىن ادەيى بارلىق اكتسيالارى ساتىلعان ەكەن. ايتا كەتەيىك, بۇگىن عانا ترامپتىڭ Boeing كومپانياسىنان 4 ملرد دوللارعا قىزمەتتىك ۇشاق ساتىپ الۋدان باس تارتقانى حابارلانعان ەدى. ال وتكەن شىلدەگە دەيىن ترامپتىڭ وسى كومپانيادا 50-100 مىڭ دوللارلىق ۇلەسى بولعان ەكەن. ترامپ سايلاۋالدى ناۋقانعا بيۋدجەتتەن وزىنە تيەسىلى قاراجاتتان بولەك تاعى 66 ملن دوللاردى ءوز قالتاسىنان شىعارعان ەكەن.