اۋەسقوي بالىقشىلار 5 كەلىگە دەيىن بالىق اۋلاي الادى

بۇگىن قر پرەمەر-ءمينيسترىنىڭ ورىنباسارى – اۋىل شارۋاشىلىعى ءمينيسترى ا.ي. مىرزاحمەتوۆ قر پارلامەنت ءماجىلىسىنىڭ پلەنارلىق وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە وسىمدىكتەر جانە جانۋارلار دۇنيەسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تانىستىرا وتىرىپ, دەپۋتاتتاردىڭ بالىق شارۋاشىلىعى بويىنشا بىرقاتار ساۋالدارىنا جاۋاپ بەردى, دەپ حابارلايدى اۋىل شارۋاشىلىق مينيسترلىگى. حالىق قالاۋلىلارىن اۋەسقوي بالىق اۋلاۋشىلاردىڭ رۇقسات ەتىلمەگەن سۋ قويمالارىندا بالىق اۋلاۋى ماسەلەلەرى قىزىقتىردى. «اتالعان ماسەلە ەل ازاماتتارىنىڭ باسىم بولىگىنە قاتىستى. ياعني, سۋ ايدىندارى ماڭىندى تىرشىلىك كەشىپ جاتقان جانە نەگىزگى ازىعى بالىق بولىپ وتىرعان ازاماتتار توپتارىنىڭ مۇددەسىن قامتيدى», – دەدى ا.مىرزاحمەتوۆ. ۆيتسە-پرەمەردىڭ ايتۋىنشا, جەكە كاسىپكەرلىك سۋبەكتىسى بولىپ وتىرعان قولدانۋشىلار بالىق كولەمى ءۇشىن قارجى تولەي وتىرىپ, بەلگىلى ءبىر جولدامالار بەرۋگە قاقىلى. بۇدان بولەك, ولار كەلىسىمشارت مىندەتتەمەلەرىن ورىنداۋعا دا اقشا شىعارادى. سوندىقتان دا, بۇل ماسەلەگە تۇسىنىستىكپەن قاراۋ كەرەك. قر اشم قولدانۋشىلار اراسىندا ءتۇسىندىرۋ جۇمىستارىن جۇرگىزۋدە. اتاپ ايتقاندا, سۋ قويمالارىنىڭ جاعالاۋلارى ماڭىنداعى ەلدى مەكەن تۇرعىندارمەن ىنتىماقتاستىقتا بولىپ, ولاردىڭ مۇڭ-مۇقتاجىنا اتسالىسۋعا شاقىرادى. ءوز كەزەگىندە, كەيبىر قولدانۋشىلار تۇرعىندارعا تەگىن جولدامالار بەرىپ, جەكەلەگەن تۇلعالارعا بالىق اۋلاۋعا رۇقسات بەرەدى. «تاعى ءبىر ايتا كەتەرلىك جايت – بەكىتىلگەن سۋ توعاندارىندا اۋەسقوي بالىق اۋلاۋشىلارعا 5 كگ دەيىن تەگىن جانە بۇل ءۇشىن رۇقسات الۋ كەرەك ەمەس», – دەدى ا.مىرزاحمەتوۆ.