اۋىل شارۋاشىلىعىنا قاتىستى كەيبىر زاڭناماعا وزگەرىستەر ەنگىزىلەدى

بۇگىن قر پرەمەر-ءمينيسترىنىڭ ورىنباسارى – اۋىل شارۋاشىلىعى ءمينيسترى ا.ي. مىرزاحمەتوۆ قر پارلامەنت ءماجىلىسىنىڭ پلەنارلىق وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە وسىمدىكتەر جانە جانۋارلار دۇنيەسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تانىستىردى, دەپ حابارلايدى اۋىل شارۋاشىلىعى مينيسترلىگى. «اتالعان زاڭ جوباسىن اۋىل شارۋاشىلىعى مينيسترلىگى ورمان شارۋاشىلىعى جانە جانۋارلار دۇنيەسى سالاسىنداعى زاڭنامالاردى جەتىلدىرۋ ءۇشىن 2016 جىلعا ارنالعان زاڭ جوبالاۋ جۇمىستارىنىڭ جوسپارى اياسىندا ازىرلەدى», – دەپ اتاپ ءوتتى ا.مىرزاحمەتوۆ. زاڭ جوباسىندا ورمان, سۋ جانە ەكولوگيالىق كودەكستەردىڭ نورمالارى مەن قورشاعان ورتانى قورعاۋ تۋرالى زاڭنامانى جەتىلدىرۋ ماسەلەلەرى قاراستىرىلعان. ايتالىق, ورمان كودەكسىنە قىزىل كىتاپقا ەنگىزىلگەن وسىمدىكتەردى تابيعاتتان الۋ كولەمدەرىن بەكىتۋ جونىندە ۇكىمەتكە قۇزىرەت بەرۋ ۇسىنىلعان. بۇل رەتتە, مۇنداي وسىمدىكتەردى الۋ تەك عىلىمي جانە ولاردىڭ كولەمىن كوبەيتۋ ماقساتتارىندا عانا جۇزەگە اسىرىلادى. «بۇل شارا وسىمدىكتەردىڭ سيرەك كەزدەسەتىن جانە جويىلىپ بارا جاتقان تۇرلەرىنىڭ اينالىمى ماسەلەسىن رەتتەۋگە مۇمكىندىك بەرەدى», – دەدى اۋىل شارۋاشىلىعى باسشىسى. ءبىر سۋ قويماسىنداعى بالىق جانە سۋ رەسۋرستارىن پايدالانۋ قۇقىعىن جەكە جانە زاڭدى تۇلعالارعا بەكىتىپ بەرۋ ءتارتىبىن ناقتىلاۋ بويىنشا سۋ كودەكسىنە ءتيىستى تۇزەتۋلەر ەنگىزۋ ويلاستىرىلۋدا. ال ەكولوگيالىق كودەكس شەڭبەرىندە جانۋارلاردى قونىس اۋدارۋ, اكەلۋ جانە رەسپۋبليكادان تىسقارى جەرلەرگە شىعارۋ ءتارتىبىن ناقتىلاۋ كوزدەلۋدە. سونداي-اق, اڭشىلىق شارۋاشىلىعىنىڭ باستى ءتۇرى – جابايى اڭ-قۇس ءوسىرۋدى دامىتۋ ماقساتىندا «جانۋارلار دۇنيەسىن قورعاۋ تۋرالى» زاڭعا «فەرمەرلىك اڭشىلىق شارۋاشىلىعى» تۇسىنىگىن ەنگىزۋ جوسپارلانۋدا. تاعى ءبىر اتاپ وتەرلىك جايت, «بيوسفەرالىق رەزەرۆات» ۇعىمى جانە ونى قۇرۋ مەن ايماقتارعا ءبولۋ ءتارتىبى تۋرالى نورمالار ۇلتتىق زاڭنامانى حالىقارالىق تالاپتارعا سايكەستەندىرۋگە مۇمكىندىك بەرەدى. قازىرگى تاڭدا يۋنەسكو شەشىمىمەن بارىنشا قورعالاتىن ءۇش اۋماققا «بيوسفەرالىق رەزەرۆات» مارتەبەسى بەرىلگەن. بۇدان ءارى ۆيتسە-پرەمەر ورمان زاڭناماسىن بۇزۋشىلاردى ۇستاۋ كەزىندە تولتىرىلاتىن قۇجاتتار ۇلگىلەرىن بەكىتۋدى ۋاكىلەتتى ورگاننىڭ قۇزىرەتىنە بەرۋدى ۇسىندى. بۇل, تابيعات قورعاۋ زاڭناماسىن بۇزۋ جاعدايىندا ورمان كۇزەتى قىزمەتكەرلەرىنىڭ جەدەل ارەكەت ەتۋىنە مۇمكىندىك بەرەدى. سونىمەن قاتار, ا.مىرزاحمەتوۆ ەرەكشە قورعالاتىن تابيعي اۋماقتاردى باسقارۋعا جۇرتشىلىقتى تارتۋ ماقساتىندا تابيعات قورعاۋ مەكەمەلەرى جانىنان ۇيلەستىرۋ كەڭەسىن قۇرۋ تۋرالى نورمالارىن قابىلداۋدى ۇسىندى. بۇدان بولەك, ول حالىق قالاۋلىلارىنىڭ نازارىن ەكولوگيالىق ءتۋريزمنىڭ دامۋىن تەجەپ وتىرعان اكىمشىلىك كەدەرگىلەرىن جويۋعا اۋداردى. «ۇلتتىق پاركتەردىڭ اۋماعىندا ەكولوگيالىق ءتۋريزمدى دامىتۋ جانە اكىمشىلىك توسقاۋىلداردى جويۋ ءۇشىن تۋراگەنتتەر بولىپ تابىلاتىن جەكە جانە زاڭدى تۇلعالاردىڭ الدىمەن ليتسەنزيالار الۋى بويىنشا تالاپتى الىپ تاستاۋ ۇسىنىلىپ وتىر», – دەدى ا.مىرزاحمەتوۆ. ونىڭ ايتۋىنشا, اتالعان نورمالار بۇعان دەيىن دە پارلامەنت قابىرعاسىندا تالقىعا ءتۇسىپ, دەپۋتاتتاردىڭ قوسىمشا شىعىنداردى قاجەت ەتەتىن تۇزەتۋلەرى رەسپۋبليكالىق بيۋدجەتتىك كوميسسيادا قارالىپ, ءىشىنارا قولداۋ تاپقان. اتاپ ايتقاندا, ورمان شارۋاشىلىعى قىزمەتكەرلەرىنىڭ جالاقىسىن 25% كوبەيتۋگە ۇكىمەتتەن كەلىسىم بەرىلدى. بايانداما سوڭىندا ا.مىرزاحمەتوۆ دەپۋتاتتاردىڭ تۇزەتۋلەرى بويىنشا ۇكىمەت قورىتىندىسىنىڭ پرەمەر-مينيستر كەڭسەسىندە جان-جاقتى پىسىقتالىپ جاتقانىن جەتكىزدى.