ۇلتتىق قوردىڭ اكتيۆتەرى 61 ملرد دوللاردى قۇرادى

الدىن الا دەرەكتەر بويىنشا 2016 جىلعى قاراشادا قازاقستان رەسپۋبليكاسى ۇلتتىق بانكىنىڭ جالپى حالىقارالىق رەزەرۆتەرى 2016 جىلعى قاراشانىڭ سوڭىندا 29,8 ملرد اقش دوللارىن, تازا حالىقارالىق رەزەرۆتەر (ۇلتتىق قوردىڭ شەتەل ۆاليۋتاسىنداعى اكتيۆتەرىن قوسپاعاندا) 29,3 ملرد اقش دوللارىن قۇرادى, دەپ حابارلايدى ۇلتتىق بانك. 2016 جىلعى قاراشادا ۇلتتىق بانكتىڭ حالىقارالىق رەزەرۆتەرى 704,6 ملن اقش دوللارىنا نەمەسە 2,3%-عا تومەندەدى. شەتەل ۆاليۋتاسىنداعى اكتيۆتەر 119,7 ملن اقش دوللارىنا ازايدى, ال التىنداعى اكتيۆتەردىڭ باعاسى ءبىر ايدا 6,8%-عا تومەندەگەن كەزدە جۇرگىزىلگەن وپەراتسيالار ناتيجەسىندە التىنداعى اكتيۆتەر 584,8 ملن اقش دوللارىنا قىسقاردى. ۇلتتىق بانكتىڭ حالىقارالىق رەزەرۆتەرىنىڭ ازايۋى بانكتەرمەن جاسالعان ۆاليۋتالىق- پايىزدىق سۆوپ وپەراتسيالارىن وتەۋ, ۇلتتىق قوردىڭ اكتيۆتەرىن تولىقتىرۋ بويىنشا جانە ۇكىمەتتىڭ سىرتقى بورىشىنا قىزمەت كورسەتۋ بويىنشا وپەراتسيالار جۇرگىزۋ, سونداي-اق التىنداعى اكتيۆتەردى قايتا باعالاۋ ەسەبىنەن بولدى. 2016 جىلعى 11 ايدا ۇلتتىق بانكتىڭ جالپى حالىقارالىق رەزەرۆتەرى 29,8 ملرد اقش دوللارىنا دەيىن 7,0%-عا ۇلعايدى, ۇلتتىق قوردىڭ اكتيۆتەرى 3,9%-عا تومەندەپ 61,0 ملرد اقش دوللارىن قۇرادى. الدىن الا دەرەكتەر بويىنشا ۇلتتىق قوردىڭ اكتيۆتەرىن قوسا العاندا, جالپى ەلدىڭ حالىقارالىق رەزەرۆتەرى 90,9 ملرد. اقش دوللارىنا دەيىن 0,6%-عا ازايدى. ۇلتتىق قوردىڭ شەتەل ۆاليۋتاسىنداعى اكتيۆتەرىن قوسا العاندا, ەلدىڭ جالپى حالىقارالىق رەزەرۆتەرى (جەدەل دەرەكتەر بويىنشا 61,0 ملرد. اقش دوللارى) 2016 جىلعى قاراشادا 2,0%-عا تومەندەپ, 90,9 ملرد. اقش دوللارىن قۇرادى. اقشا بازاسى 2016 جىلعى قاراشادا 4 671,1 ملرد. تەڭگە بولدى, ونىڭ ءبىر ايدا كەڭەيۋى 7,4% قۇرادى ( جىل باسىنان – 1,7%-عا تارىلدى). 2016 جىلعى قازاندا اقشا ماسساسى – 0,7%-عا (جىل باسىنان 12,3%-عا ۇلعايدى), اينالىستاعى قولما-قول اقشا – 0,8%-عا (جىل باسىنان 27,2%-عا ۇلعايدى), بانك جۇيەسىندەگى دەپوزيتتەر كولەمى – 0,7%-عا (جىل باسىنان 11,2%-عا ۇلعايدى) ۇلعايدى. اقشا ماسساسىنىڭ قۇرىلىمىنداعى دەپوزيتتەردىڭ ۇلەسى 2016 جىلعى قىركۇيەكپەن سالىستىرعاندا وزگەرمەدى جانە 2016 جىلعى قازاننىڭ سوڭىندا 91,9% ( 2015 جىلعى جەلتوقساندا – 92,8%) قۇرادى.