ەلباسى ساۋدانى ءسىم-نە بەرۋدى ۇسىندى

كەشە وتاندىق كاسىپكەرلەردىڭ ءتول مەرەكەسى — يندۋستريالاندىرۋ كۇنىنە وراي ۇيىمداستىرىلعان جالپىۇلتتىق تەلەكوپىر بارىسىندا قر پرەزيدەنتى نۇرسۇلتان نازارباەۆ ساۋدانى ەلىمىزدىڭ سىرتقى ىستەر مينيسترلىگىنە بەرۋدى ۇسىندى. «سىرت­قى ساۋدا مەن ينۆەستيتسيا بىرگە بولۋى كەرەك. بىزدە ساۋدا ءبىر مينيسترلىكتە, ينۆەستيتسيالار – باسقا مينيسترلىكتە. بىرەۋدىڭ ءار كومپانيانىڭ سوڭىنان ءجۇرىپ, ەل يگىلىگىنە قىزمەت ەتۋگە تارتقانى ءجون. جۇيە­لى جۇمىس ىستەيتىن ەلدەر وسىلاي جاساي­دى. ال بىزدە مۇنداي جوق. وسىمەن ناقتى كىم اينالىساتىنىن انىقتاۋى­مىز قاجەت. مۇمكىن, سىرتقى ىستەر مينيسترلىگى اۆستراليا, كانادا جانە باسقا دا كوپتەگەن ەلدەردەگىدەي سىرتقى ىستەر جانە ساۋدا مينيسترلىگى بولۋى كەرەك شىعار؟ ال يندۋستريا مينيسترلىگى تەك يندۋستريامەن عانا اينالىسۋى ءتيىس. ارقايسىسى ءوز ءىسىن بىلگەنى ابزال. ءبىز ماڭىزدى جۇمىسقا كەدەرگى كەلتىرمەۋىمىز قاجەت», دەدى مەملەكەت باسشىسى. بۇل رەتتە قازاقستان پرەزيدەنتى قارجىلاندىرۋ ماسەلەسى دە اسا ماڭىزدى ەكەندىگىنە توقتالدى. حالىقارالىق تاجىريبە قارجىلاندىرۋ بولماعان جاعدايدا بارىنشا ءمىنسىز جاسالعان ستراتەگيانىڭ ءوزى ءىس ونبەيتىندىگىن كورسەتكەندىگىن باسا ايتتى. «ءبىز يندۋستريالاندىرۋدى قولداۋعا باعىتتالعان رەسۋرستاردى جىل سايىن ۇلعايتىپ وتىرۋعا ءتيىس ەكەندىگىمىزدى اتاپ وتكەن ورىندى. ماسەلەن, اگرارلىق سەكتور بيۋدجەت شىعىستارىنىڭ 4,5 پايىز قولداۋىن الا وتىرىپ ەل ءجىو-سىنە نەبارى 5 پايىز بەرەدى. كولىك پەن كوممۋنيكاتسيالار 8,3 پايىز بەرەدى, تۇرعىن ءۇي-كوممۋنالدىق شارۋاشىلىق 6,8 پايىز بيۋدجەتتى شىعىندايدى. ال بۇل ورايدا ەل ءجىو-ءسىنىڭ 16 پايىزىن بەرەتىن ونەركاسىپ پەن قۇرىلىس بيۋدجەت شىعىستارىنىڭ 0,6 پايىزىنا عانا قارجىلاندىرىلادى», - دەدى نازارباەۆ.