قوستانايدا ەكى كوشەنىڭ اتاۋى وزگەردى

قوستاناي قالالىق ءماسليحاتى تۇراقتى كوميسسياسىنىڭ بىرلەسكەن  وتىرىسىندا جۇرتشىلىق پىكىرىن تىڭداۋ وتكىزىلدى. وندا وبلىس ورتالىعىنداعى گەرتسەن كوشەسىن قوبىلاندى باتىر داڭعىلى دەپ وزگەرتۋ, گەرتسەن كوشەسىن اكادەميك  زۇلقارناي الدامجار اتىنداعى كوشە دەپ وزگەرتۋ جانە تاران كوشەسىن تاۋەلسىزدىك كوشەسى دەپ وزگەرتۋ جونىندە ءۇش ماسەلە قارالدى. تۇراقتى كوميسسيانىڭ بىرلەسكەن وتىرىسىنا قالاداعى جۇرتشىلىق جانە باق وكىلدەرى شاقىرىلدى. بيىل 26 قاراشا كۇنى قوستاناي قالالىق ءماسليحاتىنا قوستاناي قالاسى اكىمىنىڭ قالاداعى كوشەلەر اتىن وزگەرتۋ تۋرالى ۇندەۋى كەلىپ تۇسكەن بولاتىن. ول الدىمەن تۇراقتى كوميسسيانىڭ بىرلەسكەن وتىرىسىندا قارالىپ, ونىڭ قورىتىندىسىندا جۇرتشىلىق پىكىرىن ءبىلۋ تۋرالى قاۋلى قابىلدانعان بولاتىن. جۇرتشىلىق پىكىرى تىڭدالعان وتىرىستا تاريح عىلىمدارىنىڭ دوكتورى, پروفەسسور امانجول كۇزەمباي ۇلى قوبىلاندى باتىر تۋرالى شاعىن بايانداما جاسادى. سونان كەيىن جۇرتشىلىق پىكىرىن ءبىلدىردى. سونىمەن قاتار, زۇلقارناي الدامجار تۋرالى قوستاناي الەۋمەتتىك تەحنيكالىق ۋنيۆەرسيتەتىنىڭ دوتسەنتى ەسمۇقان ماحمەتوۆ ايتىپ بەردى. ۇزاق تالقىلاۋدان كەيىن كوپشىلىك قوستانايداعى ۇزىن كوشەلەردىڭ ءبىرى گەرتسەن اتىنداعى كوشە قازاقتىڭ باس باتىرى قوبىلاندىنىڭ اتىنا لايىق دەگەن توقتامعا كەلدى. مۇنان كەيىن تاريح عىلىمدارىنىڭ كانديداتى سەرگەي ساماركين  رەۆوليۋتسيونەر لاۆرەنتي تاران تۋرالى مالىمەتتەر بەردى. جۇرتشىلىق وكىلدەرى تالقىلاي كەلە, تاران كوشەسىن تاۋەلسىزدىك دەپ اتاۋ ورىندى ەكەنىنە ءباتۋالاستى. ءنازيرا جارىمبەتوۆا, «ەگەمەن قازاقستان».