ۇيرەتەرى بار ۇلگىلى باستاما

مۇعالىم بولىپ قىزمەت ەتۋ – بىزگە جۇكتەلگەن ۇلكەن مىندەت. اتا-اناسىنان كەيىن ۇل مەن قىزدى جاقسى ازامات ەتىپ شىعارۋ ۇستاز پارىزى. ويتكەنى, ءار شاكىرت ءوزىنىڭ اكە-شەشەسىنەن كەيىن مۇعالىمىن ماقتان ەتەدى. ونىڭ قىزمەتىنە ريزالىعىن بىلدىرەدى. وسى تۇرعىدان كەلگەندە ۇستازدىق قىزمەتتىڭ ابىرويلى ەكەنىن ءتۇسىنۋ قيىن ەمەس. مەن دە مۇعالىم بولۋدى مەكتەپتە جۇرگەندە ويلادىم. سەبەبى, ول كەزدە ءاربىر ءپان مۇعالىمىنە دەگەن ءبىزدىڭ ءىلتيپاتىمىز بولەك ەدى. كوش جەردەن كورگەندە كۇتىپ تۇرىپ سالەم بەرەتىنبىز. وسى شاعىن ماقالامدى جازۋعا «ەگەمەن قازاقستان» گازەتىندە ءار اپتانىڭ سارسەنبىسىندە بەرىلىپ كەلە جاتقان, ۇستازدارعا ارنالعان «ءتالىم» ارنايى بەتىن وقىعاننان كەيىن بەكىن­دىم. جاريالانعان ماقالالار مەنى دە وي­لان­دىردى. اسىرەسە, ۇستاز مارتەبەسىن كوتەرۋ تۋرا­لى تولعامدار ءبىزدىڭ ءو.جاڭاباەۆ اتىنداعى ورتا مەكتەپ ۇجىمىنىڭ دا كوڭىلىنەن شىقتى. باستى ايتپاعىم, مەن دە گەوگرافيا پانىنەن ءبىراز جىلدان بەرى وقۋشىلارعا ساباق بەرىپ كەلە جاتىرمىن. اۋىلدا تۇرساق تا بالالاردى وقىتۋعا بارلىق جاعدايلار جاسالعان. وسىنى ءتيىمدى پايدالانۋ ءۇشىن ءوز پانىمە ءار كۇنى جان-جاقتى دايىندالامىن. تاياۋدا ەلباسى نۇرسۇلتان نازارباەۆتىڭ « ۇلى دالا ۇلاعاتتارى» دەگەن ەڭبەگىن گازەتتەن وقىدىق. سول شىعارمانىڭ «ەل مەن ەر جانە جەر» اتتى بولىمىندەگى «جەردەن وتكەن بايلىق جوق: جەر بولسا – ەل بولادى, ەل بولسا – ەر بولادى», دەگەن اتالى ءسوز ويعا قالدىردى. شىنىندا, ءار كۇنگى تاقىرىپتى الدىمىزدا وتىرعان ۇل مەن قىزعا بىلدىرە وتىرىپ, سول ەل مەن جەردى تانىتۋ جاعىنا دا باسا نازار اۋدارۋ كەرەكتىگىن ءتۇسىندىم. مەنىڭ ءپانىمنىڭ ءوزى سول ەل مەن جەر تۋرالى. اينالامىزداعى تابيعاتتىڭ اسەم كورىنىسىن, ونى قورعاۋ, بار بايلىعىن پايدالانا ءبىلۋ, ەكولوگياسىن تازا ساقتاۋ جايىن وقۋشىنىڭ ساناسىنا ءسىڭىرىپ وتىرۋدى پارىز سانايمىن. ەلى مەن جەرىن, تاريحىن, قاسيەتتى تاۋەلسىزدىگىن جەتە بىلگەن وقۋشىنىڭ وي-ساناسى بيىك بولادى. وسى جەردە ۇلتتىق تاربيەنى ۇلتتىق پەداگوگيكامەن ۇشتاستىرىپ وتىرۋدىڭ دا ءجونى بولەك دەپ بىلەمىن. مەن بۇل ارادا ويلارىمدى جالپىلاما ايتىپ وتىرمىن. بولاشاقتا ءار تاقىرىپقا توقتالۋ نيەتىم بار. سول ارقىلى ارىپتەستەرىممەن پىكىر الماسسام دەيمىن. بىزگە وسىنداي مۇمكىندىك جاساپ وتىرعان باسى­لىمعا ريزاشىلىعىم شەكسىز. اسىرەسە, ۇستاز تۋرال­ى ۇلى تۇلعالاردىڭ ايتقان تاعىلىمدى ءسوز­دەرى دە تاجىريبەلى مۇعالىمدەردىڭ پىكىرلەرى دە كو­ڭىل­دەن شىعۋدا. ءبىز ونى وقىپ قانا قويماي, ءتاجى­ريبە ءبولىسىپ وتىرساق, نۇر ۇستىنە نۇر بولادى. جاڭالىق ىدىرىسوۆا, ءو.جاڭاباەۆ اتىنداعى ورتا مەكتەپتىڭ گەوگرافيا ءپانىنىڭ مۇعالىمى الماتى وبلىسى, رايىمبەك اۋدانى