ەكاتەرينا ايدوۆا: «مەدەۋ» مەرەيىمدى ۇستەم ەتەدى دەپ ۇمىتتەنەمىن

الماتىدا جالاۋ كوتەرەتىن دۇنيەجۇزىلىك قىسقى ۋنيۆەرسيادادا ءبىز ءۇمىت كۇتەر سپورتشىلار قاتارىندا كونكيمەن جۇگىرۋدەن ەكى بىردەي قىسقى وليمپياداعا قاتىسقان ساڭلاق, جاسوسپىرىمدەر اراسىنداعى الەم چەمپيونى ەكاتەرينا ايدوۆا دا بار. ءبىز جاقىندا عانا جاپونيادا وتكەن الەم كۋبوگى سىنى ەكىنشى كەزەڭىندە سۇيىكتى قاشىقتىعى – 500 مەترگە جۇگىرۋدەن قولا مەدال العان سپورتشىمەن جولىعىپ, اڭگىمەلەسكەن ەدىك. – ەكاتەرينا, بيىلعى ماۋ­سىمعا دەگەن دايىندىق قالاي ءوتتى؟ – ماۋسىمنىڭ باسىندا ءبىز مايوركاعا بارىپ, سوندا وتكەن جاتتىعۋ جيىنىنا قاتىستىق. مۇندا كوبىنە ۆەلوسيپەد تەۋىپ, اياقتىڭ بۇل­شىق ەتتەرىن  شىنىقتىر­دىق. قۇراما كوماندانىڭ ودان ار­عى جيىنى گەرمانياداعى ءاي­گىلى ينتسەللدە ءوتتى. وكىنىش­كە قاراي, بۇل جاتتىعۋلار­عا قاتىسا المادىم. وعان سەبەپ – ماۋسىم ايىندا مەن ومىرت­قاارالىق ديسكىنىڭ جارى­­عى­نا وتا جاساتتىم. ساۋىق­تىرۋ كەزەڭى ءساتتى وتكەن سياق­تى. جاپو­­نيا­داعى الەم كۋبو­گى­نىڭ كەزەڭىندە جاقسى سپورتتىق بابى­مدا بولدىم. – ناگانودا وتكەن الەم كۋبوگىنىڭ كەزەكتى كەزەڭىندە كورسەتكەن ناتيجەڭىزگە كوڭى­لىڭىز تولا ما؟ – مەن ءۇشىن بۇل ناتيجە كۇردەلى وتادان كەيىن الەمدىك ارەنادا جاساعان العاشقى قادامىم بولدى. قولا جۇلدە العانىم – مەنىڭ دۇرىس جولدا كەلە جاتقانىمدى كورسەتتى دەپ ويلايمىن. مىڭ مەترلىك قاشىقتىقتا «ا» توبىنداعى مىقتىلارمەن سىنعا ءتۇسىپ, 1 مينۋت 17,08 سەكۋند ۋاقىتپەن مارە سىزىعىن 15-ءشى بولىپ قيدىم. ال ءوزىمنىڭ وڭ جامباسىما كەلەتىن 500 مەترلىك قاشىقتىقتى 39,48 سەكۋندتا جۇگىرىپ ءوتتىم. بۇل ناتيجە­گە «ۆ» توبىندا قول جەتكىز­دى دەمەسەڭىز, مەن ءۇشىن ول ءتاپ-ءتاۋىر كورسەتكىش ەكەنىن ايتقىم كەلەدى. جالپى, مەنىڭ اتالعان توپتا جۇرگەنىم ۋا­قىتشا عانا قۇبىلىس دەپ وي­لايمىن. ومىردە ءبارى دە بولادى, جاراقاتتان قاشىپ قۇتىل­عان سپورتشىنى كورگەن ەمەسپىن. – بيىلعى ماۋسىمدا قان­داي جارىستارعا قاتىسۋ جوس­پارىڭىزدا بار؟ –  الدىمىزداعى جەلتوقسان ايىنىڭ 2-4 كۇندەرى ارالىعىندا استانادا الەم كۋبوگىنىڭ ءۇشىنشى كەزەڭى وتەدى. مەن ءۇشىن جەرلەستەرىمنىڭ الدىندا ونەر كورسەتۋ قاشاندا اسا جاۋاپتى سىن. جەرگە قاراتپاسپىن دەپ ويلايمىن. كەلەر جىلدىڭ باستى جا­رىسى – الماتىدا وتەتىن 28-ءشى دۇنيەجۇزىلىك قىسقى ۋني­ۆەرسيادا ەكەنى بەلگىلى. ءوز جەرىمىزدە جالاۋ كوتەرەتىن بۇل ءدۇبىرلى دودادا ەل سەنىمىن اقتاۋ – مەنىڭ عانا ەمەس, جارىس جولىنا شىعاتىن ءاربىر قازاقستاندىق سپورتشىنىڭ الدىندا تۇرعان زور مىندەت. ال اتى اڭىزعا اينالعان «مەدەۋ» مۇز ايدىنىندا ونەر كورسەتۋ – مەن ءۇشىن ۇلكەن مارتەبە جانە جۇگى اۋىر جاۋاپكەرشىلىك. ۋنيۆەرسيادادا جۇلدەنى ۋىستان شىعارماسپىن دەپ ويلايمىن. سونداي-اق, كەلەسى جىلى جاپونيادا قىسقى ازيا ويىندارى وتەدى. بۇل جارىسقا دا جاقسى دايىندىقپەن بارىپ, ەل نامىسىن لايىقتى قورعاۋ ويدا بار. ودان ءارى 2018 جىلى وڭتۇستىك كورەيادا وتەتىن قىسقى وليمپيادا ويىندارى تۇر. نەگىزى, مەنىڭ بيىلعى ماۋ­سىمنان باستالعان دايار­لىق كەزەڭىم ءتورت جىلدىقتىڭ باستى دەگەن جارىستارىن تۇتاس­تاي قامتيدى. – جالپى, قازاقستاندا وزىڭىزگە لايىقتى باسەكەلەس­تىك­تىڭ جوقتىعى ءسىزدىڭ حالىق­ارالىق جارىستاردا جوعا­رى ناتيجەلەرگە قول جەتكىزۋىڭىزگە كەدەرگى كەلتىرىپ جۇرگەن جوق پا؟ – ەگەر ءسىز سپورتتىق تارتىستى مەڭزەپ وتىرساڭىز, مەن ءۇشىن ءبىر عانا تەگەۋرىندى قارسىلاس, مىقتى باسەكەلەس بار. ول – سەكۋند ولشەۋىش! اڭگىمەلەسكەن قايرات ءابىلدينوۆ, «ەگەمەن قازاقستان» قاراعاندى