بۇگىن استانادا «تاۋەلسىزدىك تاعىلىمى 25» اتتى فوتوكورمەنىڭ اشىلۋ سالتاناتى ءوتتى. شاراعا ەلىمىزدىڭ ۇزدىك فوتوجۋرناليستەرى ۇسىنعان, سونداي-اق «مەنىڭ ەلىم – قازاقستان» فوتوبايقاۋىنا قاتىسقان 100-گە تارتا جۇمىس قويىلدى.
كورمە ەكى بولىمنەن تۇرادى. العاشقىسى 9-20 قاراشا اراسىندا «تاۋەلسىزدىكتىڭ بەسىگى» دەگەن اتاۋمەن الماتى قالاسىندا وتسە, كەلەسىسى 6 جەلتوقساننان جىل سوڭىنا دەيىن استانادا جالعاسادى.
«ەلىمىز ەگەمەندىگىن العالى 25 جىل ىشىندە بىرقاتار ماڭىزدى وقيعالار ورىن الدى. ولاردىڭ ەلىمىزدىڭ بولاشاعى مەن دامۋىنا ەلەۋلى ۇلەس بولىپ قوسىلارى انىق. بۇگىنگە دەيىنگى ۋاقىت ارالىعىندا جاس مەملەكەتىمىزدىڭ بولاشاققا جاساعان ءاربىر قادامى فوتوجۋرناليستەردىڭ نازارىنان تىس قالعان جوق جانە سولار ارقىلى جۇرتشىلىققا جاريالانىپ, تاريح بەتتەرىنەن ورىن الىپ, وسكەلەڭ ۇرپاق ءۇشىن ساقتالىپ كەلەدى», – دەدى «فوتوونەر» قوعامدىق بىرلەستىگىنىڭ باسشىسى اسىلحان ءابدىرايىم.
«فوتوونەر» قوعامدىق بىرلەستىگى بۇل ءىس-شارانى استانا قالاسى اكىمدىگىنىڭ قولداۋىمەن وتكىزدى. ۇيىمداستىرۋشىلار كەلەر ۇرپاققا وتكەن كۇننەن قالعان قۇندى دەرەكتەردى قىزىقتى ەتىپ جەتكىزۋدى ماقسات ەتتى.
ايان ءابدۋالي
سۋرەتتەردى تۇسىرگەن: ورىنباي بالمۇرات
