ەلباسى گەربيتسيد شىعاراتىن زاۋىتتى ىسكە قوستى

استانادا وتاندىق كاسىپكەرلەردىڭ ءتول مەرەكەسى يندۋستريالاندىرۋ كۇنىنە وراي ۇيىمداستىرىلعان جالپىۇلتتىق تەلەكوپىر بارىسىندا قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ گەربيتسيد شىعاراتىن زاۋىتتى ىسكە قوستى. «اسا قۇرمەتتى پرەزيدەنت مىرزا! ءبىزدىڭ زاۋىتىمىزدى ءوزىڭىز تاۋەلسىزدىكتىڭ 20 جىلدىعى قارساڭىندا قوسقان ەدىڭىز. بۇگىندە ءبىز ءونىمنىڭ 66 ءتۇرىن شىعارامىز جانە ءبىزدىڭ اۋىل شارۋاشىلىعىمىزدىڭ قاجەتتىلىگىن تولىقتاي وتەيمىز», - دەدى «اۆگۋستنان» جاۋاپكەرشىلىگى شەكتەۋلى سەرىكتەستىگىنىڭ باسقارۋشى ديرەكتورى مۇرات سارسەمباەۆ. سونىمەن قاتار ول قازىرگى ۋاقىتتا ءوندىرىس ءوز ونىمدەرىن رەسەيگە ەكسپورتقا شىعارۋدى قولعا الىپ وتىرعانىن ايتتى. «بۇگىن ءبىز ءۇشىن جاڭا كاسىپورىندى, تولىق ارەكەت ەتەتىن گەربيتسيد ءوندىرىسى زاۋىتىن ىسكە قوساتىندىعىمىز جايىندا ءمالىم ەتۋ - زور مارتەبە. بۇل ءبىزدىڭ ەلىمىزدىڭ  اۋىل شارۋاشىلىعى تاۋارلارىن وندىرۋشىلەر ءۇشىن اسا قاجەت. كالي تۇزى ءوندىرىسى يمپورت الماستىرۋدى قامتاماسىز ەتەدى. بۇل تمد اۋماعىنداعى ءىرى ءارى تولىق اۆتوماتتاندىرىلعان كاسىپورىنداردىڭ ءبىرى بولادى», - دەدى سارسەمباەۆ.