جاريا ەتۋ ناۋقانىندا قازاقستاندىقتاردىڭ 7900 بانك شوتتارى اشىلدى

قازاقستاندىقتار جاريا ەتۋ جونىندەگى ناۋقان شەڭبەرىندە 7900 استام بانك شوتتارىن اشتى, دەپ حابارلايدى قر ۇلتتىق بانكتىڭ رەسمي سايتى. جاريا ەتۋ جونىندەگى ناۋقاننىڭ قولدانىلۋ كەزەڭى ىشىندە 2014 جىلعى 1 قىركۇيەك – 2016 جىلعى 30 قاراشا ارالىعىندا بانكتەر 7917 بانك شوتىن اشىپ, ولارعا شامامەن 2 ترلن. 860 ملرد. تەڭگە سالدى. بۇل تۋرالى بۇگىن قر ۇلتتىق بانكىنىڭ توراعاسى دانيار اقىشەۆ قازاقستان رەسپۋبليكاسى ۇكىمەتىنىڭ وتىرىسىندا سويلەگەن سوزىندە حابارلادى. د.اقىشەۆ 2016 جىلعى 1-30 قاراشا ارالىعىندا 2501 بانك شوتىنىڭ اشىلعانىن, شامامەن 652 ملرد. تەڭگە سالىنعانىن ناقتىلادى. بۇل رەتتە 2 ترلن. 558 ملرد. تەڭگەدەن كەم ەمەس شەتەلدىك ۆاليۋتادا, باسىم تۇردە اقش دوللارىمەن جاريا ەتىلدى, بۇل جالپى جاريا ەتىلگەن اقشا سوماسىنىڭ 89%-ىن قۇرايدى. «جاريا ەتىلگەن اقشالاي قاراجاتتىڭ جارتىسىنان كوبى 56% بانك شوتتارىنا قولما- قول نىساندا سالىندى. قولما-قول ەمەس اۋدارىمدار ارقىلى 44% اۋدارىلدى, ونىڭ ىشىندە 14%-ى شەتەلدىك بانكتەردەگى شوتتاردان اۋدارىمدار», – دەدى د.اقىشەۆ. ول سونداي-اق اقشانى جاريا ەتۋ ماقساتى ءۇشىن شەتەلدەن قازاقستان رەسپۋبليكاسىنا اقشا نەگىزىنەن شۆەيتساريادان, رەسەيدەن, سينگاپۋردان, ۇلىبريتانيادان, ليحتەنشتەين كورولدىگىنەن ءتۇستى دەپ تولىقتىردى. سونىمەن قاتار, قارجى رەتتەۋشىسى باسشىسىنىڭ اقپاراتى بويىنشا ارنايى شوتتا قاراجاتتى ساقتاۋ بويىنشا تالاپتىڭ كۇشىن جويۋىنا بايلانىستى, ازاماتتار جاريا ەتۋ راسىمدەرى اياقتالعاننان كەيىن اقشانى ارنايى شوتتاردان قايتادان ادەتتەگى بانك شوتتارىنا اۋدارۋدى ءجون كورەدى. جاريا ەتۋ كەزەڭى ىشىندە ارنايى شوتتاردان باسقا بانك شوتتارىنا اقشالاي قاراجاتتىڭ 59%-ى اۋدارىلدى. بۇل رەتتە, د.اقىشەۆ اتاپ وتكەندەي, جاريا ەتىلگەن اقشا نەگىزىنەن قازاقستاننىڭ بانكتەرىندە اشىلعان بانك شوتتارىنا اۋدارىلادى. شەتەلدىك بانكتەردە اشىلعان شوتتارعا جاريا ەتىلگەن اقشانىڭ 7%-ىنا جۋىعى اۋدارىلدى. ۇلتتىق بانكتىڭ توراعاسى 2016 جىلعى 1 تامىزدان باستاپ ازاماتتىڭ قالاۋى بويىنشا سالىق ورگاندارىنا دەكلاراتسيانى ەكىنشى دەڭگەيدەگى بانكتەر ارقىلى بەرۋ مۇمكىندىگى ىسكە اسىرىلاتىنىن حابارلادى. د.اقىشەۆ اتاپ وتكەندەي, بۇگىنگى كۇنى ازاماتتاردان وسىنداي وتىنىشتەر تۇسكەن جوق. وبلىستار بويىنشا اقپاراتقا قاتىستى ايتاتىن بولساق, اشىلعان شوتتارىنىڭ سانى جانە ولارعا سالىنعان قاراجات بويىنشا الماتى, استانا قالالارى, سونداي-اق وڭتۇستىك قازاقستان, قاراعاندى وبلىستارى الدا كەلەدى.