ەلباسى بەكىرە بالىعى مەن ۋىلدىرىعىن وندىرەتىن كەشەن جۇمىسىمەن تانىستى

بۇگىن جالپىۇلتتىق تەلەكوپىر بارىسىندا قر پرەزيدەنتى نۇرسۇلتان نازارباەۆ باتىس قازاقستان وبلىسىنداعى بەكىرە بالىعى مەن ونىڭ ۋىلدىرىعىن وندىرەتىن كەشەن جۇمىسىمەن تانىستى, دەپ حابارلادى قازاقپارات. «اسا قۇرمەتتى, نۇرسۇلتان ءابىش ۇلى! مىنا كەشەندە بەكىرە بالىعى مەن ونىڭ قارا ۋىلدىرىعىن وندىرەمىز. بۇل كازىرگى زامانعى تالاپتارعا ساي تۇيىقتالعان سۋداعى ءوندىرىس. بالىق شاباعىنىڭ وسۋىنە ەرەكشە جاعداي جاسالعان. بەكىرە ۋىلدىرىعى جاڭا تاسىلمەن الىنادى جانە وڭدەلەدى. ءونىم حالىقارالىق دارەجەدە سەرتيفيكاتتالىپ, ەكسپورتقا شىعارىلادى. بىزدەگى ونىمدىلىك بالىقتى اشىق ايدىنداردا وسىرگەن شارۋاشىلىقتارعا قاراعاندا 4 ەسە ارتىق. مۇنى سىزگە ماقتانىشپەن ايتا الامىز!» - دەدى باتىس قازاقستان وبلىسىنان بايلانىسقا شىققان «اكۆامادەنيەتتەردى تاجىريبەلىك-ونەركاسىپتىك ءوندىرىسى وقۋ-عىلىمي كەشەنى» جشس-نىڭ اكتسيونەرى قايرات ماميەۆ. «ءبىز قازىر مىنە بەكىرە بالىقتارىن وسىرۋدەمىز. ودان ۋىلدىرىق الۋدامىز. ول جاقسى, كەرەكتى ءوندىرىس سانالادى», - دەدى نازارباەۆ ءوز كەزەگىندە.