ليتۆالىق IT-كومپانيالار قازاقستاننان سەرىكتەس ىزدەيدى

بالتىق جاعالاۋى ەلىنىڭ جاڭا تەحنولوگيالار سالاسى الەمدە ۇزدىك دەپ تانىلعان, دەپ حابارلايدى palata.kz. الماتى قالاسى كاسىپكەرلەر پالاتاسى, ليتۆا رەسپۋبليكاسىنىڭ الماتى قالاسىنداعى باس كونسۋلدىعى, «INFOBALT» جانە ليتۆانىڭ  IT-كومپانيالار قاۋىمداستىعى ەكى ەلدىڭ جەتەكشى كومپانيالارىنىڭ قاتىسۋىمەن قازاقستان-ليتۆا IT-فورۋمىن ۇيىمداستىردى. فورۋم قاتىسۋشىلارعا ورتاق بيزنەستى دامىتۋعا, پايدالى ىسكەرلىك قاتىناستار ورناتۋعا مۇمكىندىك بەردى. «قازاقستان ليتۆانىڭ ورتالىق ازياداعى باستى ەكونوميكالىق سەرىكتەستەرىنىڭ ءبىرى بولىپ تابىلادى. وعان دالەل, سوڭعى جەتى جىلدا ەكى ەل اراسىنداعى تاۋار اينالىمى ارتتى. اسىرەسە, جاڭا تەحنولوگيالار سالاسىنداعى ىنتىماقتاستىق قارقىندى دامىپ كەلەدى. قازاقستاندا بىرلەسكەن 100 كاسىپورىن جۇمىس جاساۋدا جانە بۇل بالتىق جاعالاۋى ەلدەرى اراسىنداعى جوعارى كورسەتكىش», – دەپ حابارلادى الماتى قالاسى كاسىپكەرلەر پالاتاسىنىڭ ساراپشىسى اقەركىن ەراليەۆا. وسىلايشا, قازاقستاننىڭ بيزنەس وكىلدەرىنە ليتۆانىڭ الدىڭعى قاتارلى كومپانيالارى ءوز IT-جوبالارىن تانىستىردى. 30 جىلدىق تاريحى بار «Merakas» كومپانياسى قوعامدىق كولىك قوزعالىسىن جانداندىرۋ جانە جوسپارلاۋ بويىنشا ايرىقشا جوبانى نازارعا ۇسىندى. «ەرەكشە جۇيەنى ەنگىزۋ كولىك كەپتەلىسىنىڭ الدىن الىپ, اۆتوبۋستاردىڭ, تروللەيبۋستار مەن مەترو كولىگىنىڭ ايالداماعا ءبىر ۋاقىتتا كەپتەلۋىنە جول بەرمەيدى. بۇل ماقساتتا ءبىز قالانىڭ تسيفرلىق كارتاسىن پايدالانامىز. بىزدە جولاۋشىلار لەگىن قامتيتىن, قوعامدىق كولىكتەردىڭ كەستەسىن قۇراستىراتىن تەڭدەسسىز الگوريتم بار. كومپيۋتەرلىك باعدارلامالار باعدارلارعا قانداي ۋاقىت ارالىعىندا جانە قاي ۋاقىتتا ءجۇرۋ كەرەكتىگىن ەسەپتەپ بەرەدى.  بۇل رەتتە, كولىكتىڭ ىستەن شىعۋى, جۇرگىزۋشىلەردىڭ تۇسكى اسى جانە ولاردىڭ كەزەك اۋىستىرۋى سىندى جايتتار دا ەسكەرىلەدى. ءبىزدىڭ قوسىمشانى قازىر ەستونيا ۇكىمەتى ساتىپ الدى. سونىمەن قاتار, ءبىز رەسەي, يسپانيا, لاتۆيامەن تابىستى جۇمىس جاساپ كەلەمىز. قازىر جوبانى برازيليا جانە قحر-عا ەنگىزۋ تۋرالى كەلىسسوزدەر جۇرگىزىلىپ جاتىر. ەرتەڭ جوبانى الماتى قالاسى اكىمدىگىمەن بىرگە تالقىلايتىن بولامىز», – دەدى ديرەكتور روماس ميسكۋس. جالپى, ءبىر جارىم ميلليون حالقى بار ەستونيا اتالعان جۇيەگە كوشۋ ءۇشىن 800 مىڭ ەۆرو جۇمساپتى. ەگەر جەرگىلىكتى باسقارما اتالعان جوباعا قىزۋعىشىلىق تانىتسا, الماتى قالاسىنا بۇل جۇيەگە ءوتۋ ءۇشىن ءدال وسىنداي قاراجات قاجەت بولماق. فورۋم سوڭى قوس ەل بيزنەسمەندەرىنىڭ B2B سەسسياسىمەن اياقتالدى. ليتۆا رەسپۋبليكاسى باس كونسۋلدىعىنىڭ مالىمەتىنە سۇيەنسەك, 2015 جىلى ليتۆا مەن قازاقستان اراسىنداعى تاۋار اينالىمى 683 ملن ەۋرونى قۇراعان. ولاردىڭ ىشىندە 387 ملن ەۋرو ەكسپورت, 296 ملن ەۋرو يمپورت ەكەن. ليتۆانىڭ 187 ساۋدا-ساتتىق جونىندەگى سەرىكتەستەرى اراسىندا قازاقستان  تاۋار اينالىمى جانە يمپورت بويىنشا (2015 جىل) 20-ورىندا, ال ەكسپورت بويىنشا 16-ورىندا تۇر (2015 جىل). ليتۆا ەكونوميكاسىنا جۇمسالعان قازاقستاندىق ينۆەستيتسيا كولەمى وتكەن جىلى 3,53 ملن ەۋرونى قۇراعان. بۇل كورسەتكىش 2014 جىلمەن سالىستىرعاندا ەكى ەسە كوپ.