وتاندىق ونىمدەر «Duty free» جەلىسىندە ساتىلادى

بۇگىن «حالىق ماركاسى» قازاقستاندىق تاۋارلار مەن قىزمەتتەردىڭ ساپاسىن باقىلاۋ جۇيەسى فەدەراتسياسى» زتب مەن اقتاۋ قالاسىنداعى «Duty free» جەلىسى اراسىندا ءوزارا ىنتىماقتاستىق جونىندەگى كەلىسىمشارت جاسالدى, دەپ حابارلادى «قازاقپارات». كەلىسىم بويىنشا اقتاۋداعى «Duty free» دۇكەنىنىڭ اۋماعىندا «حالىق ماركاسى» برەندىمەن وتاندىق ونىمدەر ساتىلىمعا شىعاتىن ارنايى ستەند پايدا بولادى. وندا «حالىق ماركاسى» تۇتىنۋ بەلگىسىنە يە بولعان كونديتەرلىك ونىمدەر مەن سۋسىندار, سۋۆەنيرلەر جانە ت.ب. تاۋارلار قويىلادى. «حالىق ماركاسى» قازاقستاندىق ونىمدەردىڭ ءورىسىن كەڭەيتۋگە بارىنشا كۇش سالۋدا. ءبىز قولدا بار مۇمكىندىكتەردىڭ بارلىعىن پايدالانىپ, ءتول برەندتەرىمىزدى ىلگەرىلەتۋدەمىز. سونداي ىلكىمدى قادام - اقتاۋلىق «Duty free» جەلىسىمەن جاسالىپ وتىر. بۇعان دەيىن وتاندىق ونىمدەر اتالعان دۇكەندەردە از كورىنىس تاۋىپ كەلگەن بولسا, الداعى ۋاقىتتا ول جەردەن دە ءبىزدىڭ ماركالارىمىزدى كورۋگە بولادى», – دەپ اتاپ ءوتتى «حالىق ماركاسى» قازاقستاندىق تاۋارلار مەن قىزمەتتەردىڭ ساپاسىن باقىلاۋ جۇيەسى فەدەراتسياسى» زتب پرەزيدەنتى ر.تاجىباەۆا. ايتا كەتەيىك, وتاندىق ونىمدەر بار ستەندتەر الداعى ۋاقىتتا ەۋروپا مەن بىرقاتار تمد ەلدەرىندە, اتاپ ايتقاندا, ازەربايجاندا, قىرعىزستاندا, رەسەيدە جانە تۇركيانىڭ «Duty free» جەلىلەرىندە پايدا بولادى دەپ كۇتىلۋدە. ال اقتاۋ قالاسىندا تۇڭعىش رەت ورناتىلىپ وتىرعان وتاندىق ونىمدەر ستەندى الداعى ۋاقىتتا الەمنىڭ 20 ەلىن قامتيتىن جەمىستى جۇمىستاردىڭ بەتاشارى ىسپەتتەس.