استانادا «قاۋىپسىز جاڭا جىل» اكتسياسى باستالدى

استانادا جاڭاجىلدىق مەرەكە كۇندەرىنىڭ قارساڭىندا «قاۋىپسىز جاڭا جىل» اكتسياسى باستالدى. اتالمىش شارا قالا تۇرعىندارىن ءورت قاۋىپسىزدىگى تالاپتارىن ساقتاۋعا شاقىرۋعا باعىتتالعان, دەپ حابارلايدى استانا اكىمدىگى. اكتسيا شەڭبەرىندە استانالىق تج دەپارتامەنتىنىڭ قىزمەتكەرلەرى حالىق اراسىندا قاۋىپسىزدىكتى ناسيحاتتاۋ بويىنشا جۇمىستار جۇرگىزەدى: ينجەنەرلىك-ينسپەكتورلىق قۇراممەن اۋلالاردى ارالايدى, ازاماتتارعا قاۋىپسىزدىك ەرەجەلەرى نۇسقالعان ماتەريالدار تاراتادى. قايعىلى جايتتاردىڭ باسىم بولىگى مەرەكە كۇندەرى ورىن الادى. ءدال وسى كۇندەرى قاراۋسىز قالعان بالالار تەك جاراقات الىپ قانا قويماي, كەي جاعدايلاردا كوز جۇمىپ تا جاتادى. وكىنىشكە وراي, قۇتقارۋشىلار بۇنداي جاعدايلارمەن ءجيى كەزدەسەدى: ەرەسەكتەردىڭ سالعىرتتىعى وكىنىشتى جاعدايلاردىڭ ورىن الۋىنا سەبەپ بولادى. وسى رەتتە استانا قالاسى تجد قالا تۇرعىندارى مەن قوناقتارىن ەسكەرتەدى: ءورت قاۋىپسىزدىگى ەرەجەلەرىن قاتاڭ ساقتاڭىزدار, پيروتەحنيكالىق بۇيىمداردى قولدانۋ كەزىندە ەرەجەلەرگە نازار اۋدارىڭىزدار جانە بالالاردى قاراۋسىز قالدىرماڭىزدار. ءورت ورىن العان جاعدايدا «101» نەمەسە «112» نومىرلەرى بويىنشا قوڭىراۋ شالۋ قاجەت.