قازاقستاندىق بوكسشى ەكى فيلمگە تۇسەدى

قازاقستاندىق بوكسشى فيرۋزا شارىپوۆاعا بىردەن ەكى فيلمگە ءتۇسۋ تۋرالى ۇسىنىس جاسالدى. بۇل تۋرالى tengrinews.kz حابارلادى. «ءبىز 30 قاراشادا «ەۋرازيا بارىسى» ءتۋرنيرىنىڭ الدىندا كوماندامىزبەن سالماق ولشەۋ راسىمىنەن ءوتىپ, سپورتشىلارىمىزعا قولداۋ كورسەتۋ ءۇشىن الماتىعا كەلگەن بولاتىنبىز. سودان بىزگە مەنىڭ مانساپ جولىم جايلى دەرەكتى فيلم تۇسىرۋگە ۇسىنىس جاسالدى. سونداي-اق, اناسىنىڭ ولىمىنە كەك الۋ ءۇشىن سپورتپەن اينالىسقان قىزدىڭ ءرولىن ويناۋ ءۇشىن, ياعني كوركەم فيلمدە باستى ءرولدى ويناۋعا ۇسىنىس ايتىلدى», – دەدى بوكسشى قىز. سپورتشى قىز ءوزىن ءارتىس رولىندە كورگىسى كەلەتىنىن مويىندادى. «مەن ءوزىمدى ءارتىس رەتىندە كورگىم كەلەتىندىكتەن بۇعان كەلىسىمىمدى بەردىم. قازىر فيلم جايلى سويلەسىپ جاتىرمىز. وسى اپتادا بارلىعى ناقتى بەلگىلى بولادى», – دەدى فيرۋزا ءشارىپوۆا. ايتا كەتەيىك, فيرۋزا ءشارىپوۆا كاسىپقوي رينگتە ءۇش كەزدەسۋ وتكىزگەن. سوڭعى جەكپە-جەگى 24 قىركۇيەكتە الماتىدا وتكەن بولاتىن. وندا ول سەربيالىق ميلەنا ءماتوۆيچتى تەحنيكالىق نوكاۋتپەن جەڭدى. سونداي-اق, ءشارىپوۆانىڭ مەنەدجەرى سەرگەي زاۆيلەيسكي فيرۋزانىڭ ماقساتى الەم چەمپيونى اتانۋ ەكەنىن بىرنەشە رەت مالىمدەگەن بولاتىن.