قوستانايدا زەينەت جاسىنا دەيىن قۇجاتسىز ءومىر سۇرگەن تۇرعىن انىقتالدى

قوستاناي وبلىسىندا سوت وكىلدەرى زەينەتتىك جاقسا دەيىن بىردە-ءبىر قۇجاتسىز ءومىر سۇرگەن ايەلدى انىقتادى, دەپ حابارلادى «قازاقپارات» وبلىستىق سوتتىڭ ءباسپاسوز قىزمەتىنە سىلتەمە جاساپ. قوستاناي وبلىسىنىڭ التىنسارين اۋدانىنىڭ تۇرعىنى ءامينا كاۋكەنوۆا ءوزىنىڭ تۋىنا بايلانىستى انىقتالعان زاڭدىق فاكتى بويىنشا سوتقا قايىرىلدى. قۇجاتتار تۇرعىنعا زەينەتتىك جاسقا كەلگەندىگىن تىركەپ, كوپبالالى انا رەتىندە جاردەماقى الۋ جانە قر ازاماتى رەتىندە بارلىق قۇقىقتارىنىڭ ساقتالۋىن قامتاماسىز ەتۋ ماقساتىندا كۋالىك الۋ ءۇشىن كەرەك بولعان. ءا.كاۋكەنوۆا 1952 جىلى 22 مامىردا قوستاناي وبلىسى, جانگەلدى اۋدانىندا تۋعان. بۇل تۋرالى ول ءوزىنىڭ اتا-انالارى مەن تۋعان تۋىستارى ارقىلى بىلەتىن بولىپ شىقتى. ول اۋدانعا 1970 جىلدارى كەلگەن. ءا.كاۋكەنوۆانى اتا-اناسى التىنسارين اۋدانىنىڭ سۆەردلوۆ اۋىلىنىڭ تۇرعىنىنا ۇلتتىق ءداستۇر بويىنشا تۇرمىسقا شىعارعان جانە ول وسى ۋاقىتقا دەيىن اتالعان مەكەنجايدا تۇرىپ كەلگەن. ول 6 بالنىڭ اناسى. ولاردىڭ ەكەۋى مۇگەدەك. ال ايەلدىڭ ءوزى بولسا ساۋاتسىز, ءبىلىمى جوق, ەشقاشان ەش جەردە جۇمىس ىستەمەگەن. اۋرۋحاناعا دا ەشقاشان بارماعان, تۋعان كۇنىن سوتتان تىس انىقتاۋ وسى ۋاقىتقا دەيىن مۇمكىن بولماپتى. قۇجاتىنىڭ جوق بولعاندىعىنا بايلانىستى ونى ەش جەردە ەشكىم قابىلداماعان. كورشىلەرى مەن تانىستارى سوتتا ونىڭ جاسىن راستادى. بۇعان قوسا, ايەلدىڭ تەگى مەن تۋعان كۇنى التىنسارين اۋدانىنىڭ قارا مىرزا اۋىلىنا قاراستى سۆەردلوۆ اۋىلدىق كەڭەسىنىڭ مۇراعات قورىندا كورسەتىلگەندىگى بەلگىلى بولدى. التىنسارين اۋداندىق سوتىنىڭ شەشىمىنە سايكەس, ءا.كاۋكەنوۆانىڭ ءوزىنىڭ تۋعان جىلىن تىركەۋ تۋرالى سوتقا جولداعان زاڭدىق ءوتىنىشى قاناعاتتاندىرىلدى. سوت شەشىمى كۇشىنە ەندى.