وزبەكستان كاريموۆتىڭ باعىتىن تاڭدادى

جەكسەنبى كۇنى وزبەكستاندا وتكەن پرەزيدەنتتىك سايلاۋدا پرەمەر-مينيستر شاۆكات ميرزيوەۆ 88,61% داۋىسپەن جەڭىسكە جەتتى. ول وزبەكستاننىڭ ليبەرال-دەموكراتيالىق پارتياسى اتىنان سايلاۋعا تۇسكەن بولاتىن. سايلاۋعا شاۆكات ميرزيوەۆتەن باسقا تاعى ءۇش كانديدات قاتىستى. پارلامەنتتىڭ تومەنگى پالاتاسىنىڭ ۆيتسە-سپيكەرى سارۆار وتامۋرادوۆ (ۇلتتىق-دەموكراتيالىق پارتيا), ناريمان ۋماروۆ (سوتسيال-دەموكراتيالىق «ادولات» پارتيا­سى) جانە حوتامجون كەتمونوۆ ء(وز­بەكستاننىڭ حالىقتىق-دەمو­كرا­تيالىق پارتياسى). ۇمىتكەرلەردىڭ سايلاۋ ال­دىن­داعى باعدارلامالارى ءبىر-بىرىنە ۇقساس بولدى. بارلىعى تۇڭعىش پرەزيدەنت يسلام كاريموۆتىڭ ساياساتىن جالعاستىرۋدى, كورشىلەرمەن قارىم-قاتىناستى دامىتۋدى, تۇرعىنداردى جۇمىسپەن قامتۋدى ۇسىندى. دەگەنمەن, ساراپشىلاردىڭ كوبى پرەزيدەنت مىندەتىن اتقارۋشى ءارى پرەمەر-مينيستر شاۆكات ميرزيوەۆتىڭ جەڭەتىنىنە سەنىمدى بولدى. ميرزيوەۆ تۇڭعىش پرەزيدەنت يسلام كاريموۆتىڭ باعىتىن جالعاستىرۋدى نەگىزگى ۇرانى ەتىپ الدى. سايلاۋ الدىنداعى ناۋقان بەيبىت ءوتتى. جوعارى بيلىكتەگى ىقپالدى ساياساتكەرلەردىڭ ءبىر كانديداتتى قولداۋعا كەلىسكەنى جانە ونىڭ 2003 جىلدان بەرى ۇكى­مەتتى ۇزدىكسىز باسقارىپ كەلە جات­قان شاۆكات ميرزيوەۆ ەكەنى اڭعا­رىلعان ەدى. حالىق الدىنداعى بەدەلىن كو­تە­رۋ ءۇشىن نەگىزگى ۇمىتكەردىڭ ءبىر­قاتار ۇتىمدى قادامدار جاساعانىن ايتا كەتۋ كەرەك. ءبىر كەزدەرى ساحنادان شەتتەتىلگەن ونەر ادامدارىنىڭ قايتادان كورەرمەن الدىنا شىعۋىنا مۇمكىندىك بەردى. كورشى ەلدەرمەن قارىم-قاتىناستى جاقسارتۋدى قولعا الدى. سىبايلاس جەمقورلىقپەن كۇرەستى كۇشەيتۋ, بيزنەستى تىركەۋدى وڭايلاتۋ شارالارىن باستادى. سونىمەن قاتار, ۆاليۋتا ايىرباس­تاۋ ءتارتىبىن جەڭىلدەتۋدى ۇسىندى. وزبەكستاندا جەكە ادامداردىڭ ۆاليۋتانى ەركىن ايىرباستاۋىنا رۇقسات جوق. بۇل – تۇرعىندار ءۇشىن ەڭ ۇنامسىز تارتىپتەردىڭ ءبىرى. ساراپشىلار ميرزيوەۆتى اي­ماقتاعى كورشى ەلدەر ليدەرلەرى, ونىڭ ىشىندە قازاقستان جانە رەسەي پرەزيدەنتتەرى قولداپ وتىرعانىن ايتادى. بۇل پىكىر نەگىزسىز ەمەس. نۇرسۇلتان نازارباەۆ وزبەك حالقىنا كوڭىل ايتۋ ءۇشىن باۋىرلاس ەلگە ارنايى ساپارمەن باردى. ميرزيوەۆپەن جەكە كەزدەسىپ, قيىن كەزەڭدە قازاق حالقىنىڭ وزبەكتەرمەن بىرگە ەكەنىن ايتتى. ودان كەيىن دە وزبەك باسشىسىمەن تەلەفون ارقىلى سويلەستى. ال كەشە شاۆكات ميرزيوەۆتى وزبەكستاننىڭ پرەزيدەنتى بولىپ سايلانۋىمەن العاش قۇتتىقتاعانداردىڭ ءبىرى قازاقستان باسشىسى بولدى. ورتالىق ازياداعى ەلدەردىڭ بارلىعىمەن شەكارالاساتىن, 32 ميلليونعا جۋىق تۇرعىنى بار وزبەكستان ايماقتاعى ماڭىزدى ەل – قازاقستاننىڭ ستراتەگيالىق ارىپتەستەرى قاتارىنان. الايدا, سوڭعى جىلدارى وزبەكستان ەكونوميكاسى داعدارىستى باستان كەشىپ وتىر. ەكونوميكانى ساۋىقتىرۋ, تۇرعىنداردىڭ تۇرمىس دەڭگەيىن كوتەرۋ, ول ءۇشىن شەتەل ينۆەستيتسياسىن كوپتەپ تارتۋ – جاڭا ليدەر الدىنداعى قازىرگى نەگىزگى مىندەتتەردىڭ ءبىرى. ەرجان ءابدىرامان, «ەگەمەن قازاقستان»