ەلىمىزدە كونفۋتسي ينستيتۋتى اشىلادى

ش.ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنە قىتايداعى كونفۋتسي ينستيتۋتىنىڭ وكىلدەرى كەلدى. ساپار بارىسىندا اتالمىش وقۋ ورنىندا كونفۋتسي ينستيتۋتىن اشۋ تۋرالى ءۇش تىلدەگى ەكىجاقتى كەلىسىمشارت جاسالدى دەلەگاتسيا قۇرامىندا شىڭجاڭ ولكەسىندەگى كونفۋتسي ءۇرىمشى اگرارلىق ينستيتۋتىنىڭ وكىلدەرى جي جيان ۆىن, ياڭ جيانلين بولدى. «دەلەگاتسيانىڭ كوكشەتاۋعا كەلۋدەگى ماقساتى – ۋنيۆەرسيتەت قىزمەتىمەن تانىسىپ, تىعىز ارىپتەستىك قارىم-قاتىناس ورناتۋ, ستۋدەنتتەر مەن ۇستازداردىڭ اكادەميالىق ۇتقىرلىق باعدارلاماسىن جۇزەگە اسىرۋ, تاعىلىمدامالار ۇيىمداستىرۋ, كەڭەستەر بەرۋ», – دەدى ۋنيۆەرسيتەت رەكتورى ءابدىمۇتالىپ ءابجاپپاروۆ. اسپاناستى ەلى دۇنيە ءجۇزىنىڭ بىرقاتار ەلدەرىمەن, ونىڭ ىشىندە قازاقستانمەن دە ەكونوميكالىق, مادەني, ساياسي, ءبىلىم, عىلىم سالالارىندا مىقتى ارىپتەستىك قارىم-قاتىناس ورناتقان مەملەكەت. بۇگىندە قازاقستاندا ءتورت كونفۋتسي ينستيتۋتى قىزمەت ەتەدى. ورتالىقتىڭ باستى مىندەتى – ەكى ەل اراسىنداعى ءبىلىم-عىلىم باعىتىنداعى ىنتىماقتاستىقتى دامىتۋ, قىتاي ءتىلىن ۇيرەتۋ, سونداي-اق قىتاي مادەنيەتى مەن الەۋمەتتىك ءومىرى, ەكونوميكاسى تۋرالى اقپاراتتار بەرۋ جانە ەكى ەلدىڭ دوستىق قارىم-قاتىناسىن نىعايتۋ. «كونفۋتسي ينستيتۋتىنىڭ شتاب-پاتەرى – حان-بان قالاسىندا ورنالاسقان. وقۋ ورنى اگرارلىق, ەكونوميكالىق, تۋريزم, كوپتىلدىلىك سياقتى نەگىزگى 4 باعىتتا جۇمىس ىستەيدى. كونفۋتسي ينستيتۋتىنىڭ ماقساتى: قوس مەملەكەتتىڭ اراسىنداعى دوستىق قارىم-قاتىناستى دامىتۋ, قىتاي ءتىلىن ساپالى جانە جۇيەلى وقىتۋ, قىتاي مادەنيەتىن ناسيحاتتاۋ, حالىقارالىق كونفەرەنتسيالار وتكىزۋ», – دەدى كونفۋتسي ينستيتۋتىنىڭ وكىلى جي جيان ۆىن.