كۋۆەيتتە پارلامەنت سايلاۋى اياقتالدى

كۋۆەيتتە مەرزىمىنەن بۇرىن بولعان ۇلتتىق جينالىس (پارلامەنت) سايلاۋى اياقتالدى. ەندى داۋىستاردى ساناۋ باستالدى, دەپ حابارلادى تاسس اقپارات اگەنتتىگى. «ال-انبا» باسىلىمىنىڭ سايتىنداعى العاشقى ساناق قورىتىندىسى بويىنشا كوشتى الدىڭعى شاقىرىلعان پارلامەنت مۇشەلەرى جانە وپپوزيتسيونەرلەر باستاپ تۇر. بولجام بويىنشا, سايلاۋعا حالىقتىڭ 70-80% قاتىستى. كۋۆەيت بەس وكرۋگكە بولىنگەن, پارلامەنتتەگى 50 ورىنعا ولاردىڭ ارقايسىسىنان 10 وكىلدەن سايلانادى. 15-شاقىرىلىم پارلامەنتىنە ۇمىتكەرلەردىڭ جالپى سانى 293, ولاردىڭ 14-ءى ايەل. ايتا كەتەيىك, بيىل 16 قازاندا كۋۆەيت ءامىرى شەيح ساباح ال احمەد اس-ساباح بيلىكتىڭ اتقارۋشى جانە زاڭ شىعارۋشى سالالارىنىڭ جانجالىنا بايلانىستى پارلامەنتتى تاراتۋ تۋرالى دەكرەت جاريالادى. داعدارىس كۋۆەيت بيلىگىن پارلامەنت كەلىسىمىنسىز جانارماي باعاسىن كوتەرۋ تۋرالى شەشىم قابىلداۋعا ءماجبۇر ەتتى. مۇناي باعاسىنىڭ ارزانداۋىنا بايلانىستى كۋۆەيت العاش رەت بيۋدجەت تاپشىلىعىنا تاپ بولدى. وسىعان بايلانىستى بيلىك مەملەكەتتىك قازىنانى تولتىرۋدىڭ بارلىق جولدارىن قاراستىرىپ جاتىر. كەزەكتى پارلامەنت سايلاۋى 2017 جىلدىڭ شىلدە-تامىز ايلارىندا ءوتۋى ءتيىس بولاتىن.