كەشە ەلباسى نۇرسۇلتان نازارباەۆ استراحان قالاسىنا بارىپ, قازاقستان مەن رەسەيدىڭ ايماقارالىق VIII ىنتىماقتاستىق فورۋمىنا قاتىستى
استراحان – قازاقستان ءۇشىن جات ءوڭىر ەمەس. وسى ءوڭىردىڭ توپىراعىندا قازاقتىڭ كۇي ونەرىنە وشپەس مۇرا قالدىرعان قۇرمانعازى ساعىرباي ۇلى مەن ەل تاريحىندا وزىندىك ورنى بار بوكەي ورداسىن قۇرۋشى بوكەي حان ءماڭگىلىك تىنىستاپ جاتىر. بۇل كۇندەرى رەسەيدىڭ وسى وڭىرىندە 150 مىڭنان استام قانداسىمىز تۇرادى. رەسەي اۋماعىندا بولعانىمەن تاريحي اتامەكەنىنەن تابان اۋدارماعان قانداستارعا ەلباسىنىڭ دا ىقىلاسى ەرەكشە. كەشە قازاقستان مەن رەسەيدىڭ ايماقارالىق ىنتىماقتاستىق فورۋمىنا قاتىسۋ ءۇشىن استراحان قالاسىنا كەلگەن ەلباسى نۇرسۇلتان نازارباەۆتى رەسەي فەدەراتسياسىنىڭ پرەزيدەنتى دميتري مەدۆەدەۆ ۇشاق تراپىنان ارنايى كۇتىپ الدى. مەملەكەت باسشىلارىنىڭ ەكىجاقتى كەزدەسۋىندە نۇرسۇلتان نازارباەۆ الدىمەن رەسەيلىك ءارىپتەسى دميتري مەدۆەدەۆتى تۋعان كۇنىمەن قۇتتىقتاپ, رەسەي ەلىنىڭ كەلەشەگى, قازاقستانمەن ىنتىماقتاستىقتى كەمەلدەندىرە ءتۇسۋ باعىتىنداعى ەڭبەگىنە تابىس تىلەدى. ەكىجاقتى كەزدەسۋدە قازاقستان مەن رەسەيدىڭ 2011-2012 جىلدارعا ارنالعان بىرلەسكەن ءىس-قيمىلدار جوسپارىنىڭ كەيبىر تارماقتارىنىڭ ورىندالۋ بارىسى, وتىن-ەنەرگەتيكالىق كەشەنىن دامىتۋ, كەدەن وداعىنىڭ تيىمدىلىگىن ارتتىرۋ, «بايقوڭىر» عارىش ايلاعىن بىرلەسە پايدالانۋدىڭ شارتتىق-قۇقىقتىق بازاسىن جەتىلدىرۋ, ترانسشەكارالىق سۋ نىساندارىن پايدالانۋ جانە قورعاۋ, سونداي-اق, ينتەگراتسيالىق بىرلەستىكتەر شەڭبەرىندەگى حالىقارالىق ماسەلەلەر تالقىلاندى. رەسەي پرەزيدەنتى د.مەدۆەدەۆ ەكىجاقتى كەزدەسۋدە تامىز ايىندا وتكىزىلگەن بەيرەسمي سامميت بىرنەشە حالىقارالىق ماسەلەلەردىڭ ءتۇيىنىن تارقاتۋعا ارقاۋ بولعانىنا توقتالدى. ول سونىمەن قاتار, ەلباسى نۇرسۇلتان نازارباەۆتىڭ ماسكەۋدە وتەتىن ۇقشۇ سامميتىنە قاتىسۋىن قالايتىنىن جەتكىزدى.
جالپى, قازاقستان مەن رەسەيدىڭ ءبىر-بىرىمەن ىنتىماقتاستىق بايلانىسىنىڭ تامىرى تىم تەرەڭدە جاتىر. ەكى ەلدىڭ ەجەلدەن قالىپتاسقان كورشىلىك حاقى ءوز الدىنا, تاۋەلسىزدىك جەلىسى تارتىلىسىمەن, 1992 جىلعى 25 مامىردا قازاقستان رەسپۋبليكاسى مەن رەسەي فەدەراتسياسى اراسىنداعى ءوزارا دوستىق پەن ىنتىماقتاستىق, سونىمەن بىرگە, ءبىر-بىرىنە كومەك بەرۋ جونىندە كەلىسىمگە قول قويىلعان. ەجەلگى كورشى مەملەكەتتەردىڭ ديپلوماتيالىق قارىم-قاتىناسى دا سول جىلدىڭ قازان ايىنان تامىر تارتادى. سودان بەرگى 20 جىلعا جۋىقتاعان كەزەڭدە قازاقستان-رەسەي قارىم-قاتىناسى بيىك دەڭگەيگە كوتەرىلدى. ەكونوميكانىڭ بارلىق دەرلىك سالاسىندا, سونىڭ ىشىندە, مۇناي-گاز ونەركاسىبى, وتىن-ەنەرگەتيكاسى, عارىش, بانك سەكتورىن دامىتۋ سەكىلدى جەتەكشى سالالاردى ءوركەندەتۋگە باسىم باعىت بەرىلىپ كەلەدى. كەزىندە قازاقستاننىڭ رەسەيدەگى, رەسەيدىڭ قازاقستانداعى جىلى وتكىزىلدى. ەكونوميكالىق, ءارىپتەستىك, ىسكەرلىك بايلانىستاردىڭ بۋىنىن بەكىتە ءتۇسۋ ماقساتىندا ۇكىمەتارالىق كوميسسيالار جۇمىس جاسايدى.
بۇل كۇندەرى ەكى ەلدىڭ اراسىندا شەشىمىن تاپپايتىن ماسەلە جوق دەۋگە نەگىز بار. بۇرىن ءاسىرەسە, ەكى مەملەكەتتىڭ شەكارالاس وڭىرلەرىندە كەزدەسەتىن ترانسشەكارالىق ماسەلەلەردى وڭ شەشۋگە باتىل قادامدار جاسالدى. وسى ورايدا قازاقستان مەن رەسەي پرەزيدەنتتەرىنىڭ قاتىسۋىمەن جىل سايىن شەكارالاس وڭىرلەردىڭ ىنتىماقتاستىق فورۋمى وتەدى. بۇل فورۋمدى وتكىزۋدىڭ وزىندىك ماڭىزى ايرىقشا. الدىمەن, ارينە, قازاقستان-رەسەي اراسىنداعى ستراتەگيالىق ارىپتەستىكتى ودان ءارى تەرەڭدەتۋ بولسا, ەكىنشىدەن, شەكارالاس وڭىرلەردىڭ ساۋدا-ەكونوميكالىق بايلانىسىن جەتىلدىرۋ. ۇشىنشىدەن, ترانسشەكارالىق جوبالاردى بىرىگىپ ىسكە اسىرۋ, سونداي-اق, شەكارالاس وڭىرلەر اراسىنداعى تىكەلەي تاسىمال باعىتىن قالىپتاستىرۋ. ويتكەنى, تمد ەلدەرىمەن شەكتەسەتىن رەسەي فەدەراتسياسىنىڭ 27 سۋبەكتىسىنىڭ ون ەكىسى قازاقستاننىڭ 7 وبلىسىمەن شەكتەسىپ جاتىر. سول سەبەپتەن, قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ ۇسىنىسىمەن 2003 جىلى العاش رەت ەكى ەلدىڭ شەكارالاس ءوڭىرلەرىنىڭ فورۋمى ومبى قالاسىندا وتكىزىلدى. بۇدان ءبىر جىلدان كەيىنگى فورۋم قازاقستاندا جالعاسىپ, كەيىننەن مۇنداي فورۋمدى ءوتكىزۋدىڭ ماڭىزى ايقىندالا ءتۇستى. ال 2008 جىلى اقتوبەدە وتكەن شەكارالاس وڭىرلەر فورۋمىندا وعان قاتىسۋشىلار قاتارى ەداۋىر تولىقتى. قازاقستان جاعىنان استانا جانە الماتى قالالارىمەن, قاراعاندى وبلىسىمەن, رەسەيدەن بۇعان ماسكەۋ, سانكت-پەتەربۋرگ قالالارى, سۆەردلوۆ وبلىسى مەن تاتارستان رەسپۋبليكاسى قوسىلدى. ءسويتىپ, ەندى قازاقستاننان 8 وبلىس, رەسەيدەن 13 سۋبەكتى قاتىساتىن بۇل باسقوسۋ ايماقارالىق ىنتىماقتاستىق فورۋمى دەگەن مارتەبەگە يە بولدى.
ءار جىل سايىن وتەتىن فورۋمدا كوتەرىلەتىن ماسەلەلەردىڭ ماڭىزدىلىعىنا باسىم باعىت بەرىلەدى. ءار فورۋمنان سوڭ ەكى ەلدىڭ ارىپتەستىك بايلانىسى كەڭەيە ءتۇسىپ, ءوزارا تاۋار الماسۋدىڭ جاندانعانى مىنا ءبىر دەرەكتىڭ وزىنەن بايقالادى. ماسەلەن, 2010 جىلى قازاقستان-رەسەي ىنتىماقتاستىعىنىڭ ناتيجەسىندە ساۋدا اينالىمى 27,8 پايىزعا ءوسىپ, 15,8 ميلليارد اقش دوللارىن قۇراعان. دەمەك, بۇل قازاقستان-رەسەي ىنتىماقتاستىعى جاڭا بەلەستەرگە كوتەرىلگەنىنىڭ تاعى ءبىر ايقىن دالەلى بولماق. جىل اياعىنا دەيىن ەكى ەلدىڭ ساۋدا اينالىمى 20 ميلليارد دوللاردان اسىپ قالۋى عاجاپ ەمەس. كورشىلەس ەلدەردىڭ ىنتىماقتاستىعى تەك ەكونوميكالىق بايلانىستاردى جانداندىرۋدا عانا ەمەس, وزگە دە سالالاردا بايقالادى. بۇل كەشە استراحان قالاسىندا وتكەن قازاقستان مەن رەسەيدىڭ شەكارالاس وڭىرلەرىنىڭ VIII ايماقارالىق ىنتىماقتاستىق فورۋمىندا تالقىلانعان ءماسەلەلەردىڭ ماڭىزدىلىعىمەن تاعى ءبىر رەت ايشىقتالا ءتۇستى.
– ءبىزدىڭ فورۋم – بۇرىنعى كەڭەستىك كەڭىستىكتەگى ەكىجاقتى ىنتىماقتاستىقتى دامىتۋعا ءتيىمدى قادامنىڭ بىرەگەي ۇلگىسى. ول ايماقتاردى جاقىنداستىرۋ ارقىلى كەدەن وداعىن قۇرۋدا دا پايدالى مەحانيزم بولا الدى, – دەدى نۇرسۇلتان ءابىش ۇلى. – ەندى ءبىرتۇتاس ەكونوميكالىق كەڭىستىكتەن ەۋرازيا ەكونوميكالىق وداعىنا قاراي قادام باسۋ كەرەك. بۇگىن كەزەكتى فورۋم وتكىزىلىپ وتىرعان استراحان قالاسىن «ەدىلدىڭ ۆەنەتسياسى» دەپ تەگىن اتامايدى. بۇل – ونەركاسىبى قارقىندى دامىعان, ءوزىندىك تاريحى, كەلىستى مادەنيەتى دە بار شىن مانىندەگى ەۋرازيالىق قالا. بۇل وڭىردە بىرنەشە ۇلت پەن كونفەسسيا وكىلدەرى تاتۋ-ءتاتتى ءومىر سۇرسە, بۇل جەردە ءبىزدىڭ تاريحي ءھام مادەني تامىرىمىز بىتە قايناسقان.
ەلباسى بۇدان ءارى ايماقارالىق ىنتىماقتاستىق فورۋمىنىڭ ماڭىزىنا ايرىقشا توقتالدى. بۇل فورۋم, دەدى نۇرسۇلتان نازارباەۆ, پوستكەڭەستىك كەڭىستىكتە ەكىجاقتى ىنتىماقتاستىقتى دامىتۋدىڭ جارقىن مىسالى بولا الادى. كەدەن وداعىن قۇرۋدا, سونىمەن بىرگە, ءبىزدىڭ ەلدەرىمىزدىڭ وڭىرلەرىن ءبىر-بىرىنە جاقىنداستىرا العان ەڭ ءتيىمدى تەتىك بولدى. قازىر كەدەندەگى جانە ساۋدا سالاسىنداعى بارلىق كەدەرگىلەر الىنىپ تاستالدى. ءبىرتۇتاس ەكونوميكالىق كەڭىستىك قۇرۋدىڭ قالىپتى قاعيدالارى جاساقتالۋدا. بۇل ءبىزدىڭ ەلدەرىمىزدىڭ اراسىنداعى تاۋار اينالىمىنىڭ وسىمىنەن بايقالادى. بيىلعى ءبىرىنشى جارتىجىلدىقتىڭ وزىندە تاۋار اينالىمى 40 پايىزعا ارتىپ, 11,5 ميلليارد دوللاردى قۇرادى.
ال فورۋمنىڭ كۇن تارتىبىنە شىعارىلعان نەگىزگى تاقىرىپقا ويىسقاندا, الدىمەن مىنا ماسەلەگە باسا نازار اۋدارىلدى. بۇل – ترانسشەكارالىق سيپاتتاعى ءتوتەنشە جاعدايلارعا بىرلەسە دەن قويۋ. بۇعان نازار اۋدارۋدىڭ بىرنەشە سەبەبى بار. قازىر الەمدە تەحنوگەندىك اپاتتارعا, سوڭى ءۇلكەن زارداپتار مەن شىعىنعا ۇشىراتقان تابيعاتتىڭ توسىن قۇبىلىسى ازايماي وتىر. بۇل كوپتەگەن ەلدەردىڭ ەكونوميكالىق, الەۋمەتتىك جانە دەموگرافيالىق الەۋەتىنە وراسان زور زاردابىن تيگىزۋدە. سول سەبەپتەن, تەك قۇتقارۋشىلاردىڭ عانا ەمەس, ءتيىستى ورگاندار مەن قىزمەتتەردىڭ ءوزارا بىرلەسە ارەكەت ەتۋ قاجەتتىلىگىن العا تارتادى. قازاقستان دا, رەسەي دە ءتوتەنشە جاعدايلاردا جەدەل ارەكەت ەتۋدە تولىمدى تاجىريبە جيناقتاعان. رەسەي – قازاقستانمەن ونەركاسىپتىك اپاتتاردىڭ, توتەنشە جاعدايلاردىڭ الدىن الۋ جانە ولاردىڭ زارداپتارىن جويۋ جونىندەگى كەلىسىم جاساعان العاشقى مەملەكەت. قازاقستاندىق جانە رەسەيلىك قۇتقارۋشىلار تمد كۇشتەرىنىڭ كورپۋسىنا مۇشە رەتىندە كىرەدى. سونىمەن بىرگە, ۇجىمدىق قاۋىپسىزدىك شارتى ۇيىمنىڭ قۇرامىنا دا مۇشەلىككە قابىلدانعان. ەكى ەلدىڭ قۇتقارۋشىلارىندا ترانسشەكارالىق ءتوتەنشە جاعدايلار تونگەن ساتتە بىرلەسىپ ارەكەت ەتۋدىڭ جوسپارلارى بار. ماسەلەن, وتكەن جىلى پاۆلودار وبلىسى مەن التاي ءولكەسىندەگى تابيعي ورتتەردى ءسوندىرۋ كەزىندە ترانسشەكارالىق توتەنشە جاعدايلار جونىندەگى جەدەل اقپارات الماسۋدىڭ تيىمدىلىگى ايقىندالدى.
– توتەنشە جاعدايلاردىڭ الدىن الۋ جانە ولاردى جويۋداعى ءبىزدىڭ ەلدەردىڭ ىنتىماقتاستىعىن ودان ءارى نىعايتا بەرۋ قاجەت. بۇل ءبىزدىڭ ايماقتاعى تۇراقتىلىق پەن قاۋىپسىزدىكتىڭ ماڭىزدى شارتى, – دەپ اتاپ ءوتتى پرەزيدەنت نۇرسۇلتان نازارباەۆ. – بۇل ورايدا قازاقستان مەن رەسەيدىڭ ۇستانعان باعىتى ايقىن. الداعى ۋاقىتتا دا توتەنشە جاعدايلاردىڭ الدىن الۋ جانە ونى بولدىرماۋ ءۇشىن ءبىز بىرلەسكەن ءىس-قيمىلدارىمىزدى جانداندىرا ءتۇسۋىمىز قاجەت. بۇل – شەكارالاس ءوڭىرلەردىڭ قاۋىپسىزدىگى مەن تۇراقتىلىعىنىڭ كەپىلى ءۇشىن ەڭ قاجەت قادام.
نۇرسۇلتان نازارباەۆ وسى ورايداعى ىنتىماقتاستىقتىڭ باستى باعىتى رەتىندە توتەنشە جاعدايلاردى باعدارلاۋ جانە مونيتورينگ جۇرگىزۋدىڭ بىرلەسكەن جەلىسىن قۇرۋ قاجەت دەپ ەسەپتەيدى. بۇل باعىتتاعى جۇمىستى جەتىلدىرۋ ءۇشىن توتەنشە جاعدايلار بولۋى مۇمكىن اۋماقتاردىڭ عارىشتان تۇسىرىلگەن كارتاسىن جاساقتاۋ قاجەت. ءبىزدىڭ قۇتقارۋشى قىزمەتتەرىمىز ءۇشىن ورمان جانە دالا ورتتەرى, ترانسشەكارالىق وزەندەردە, كاسپي تەڭىزى اكۆاتورياسىندا بولۋى مۇمكىن سۋ تاسقىنى كۇتپەگەن اپاتتاردىڭ قاتارىنا جاتقىزىلماۋى ءتيىس, دەدى نۇرسۇلتان نازارباەۆ. «تىرشىلىك ءۇشىن سۋدىڭ ماڭىزى ايرىقشا بولعاندىقتان, وعان تەك تاۋار رەتىندە عانا قاراماۋ قاجەت» دەپ ءتۇيىن جاساعان ەلباسىنىڭ جايىق وزەنى سەكىلدى ترانسشەكارالىق سۋ كوزدەرىن قورعاۋ جونىندەگى ۇسىنىسىنا رەسەي پرەزيدەنتى دميتري مەدۆەدەۆ قولداۋ ءبىلدىردى. وسى ورايدا ازاماتتىق قورعانىستى جانداندىرۋ ماقساتىندا عىلىمي الەۋەت پەن وسى زامانعى جاڭا تەحنولوگيالاردى قولدانۋ ەكى ەل ىنتىماقتاستىعىنىڭ, ءارىپتەستىك سەرىكتەستىگىنىڭ باستى تارماعى بولۋى قاجەتتىگىنە نازار اۋدارىلدى.
قازاقستان ءۇشىن تابيعي-تەحنوگەندىك تاۋەكەلدى, جەر سىلكىنىسىنىڭ بولۋ ىقتيمالدىعىن قىسقا مەرزىمدە باعدارلاي الۋ جونىندەگى يننوۆاتسيانىڭ ماڭىزى ارتىپ وتىر. ارينە, وسى ماقساتتاعى جۇمىستىڭ قارقىن الۋى مامانداردىڭ بىلىكتىلىگىمەن ۇشتاساتىندىعى داۋسىز. سوعان بايلانىستى قازاقستان وسى سالاعا جوعارى ءبىلىمدى ماماندار دايارلاۋ جانە ولاردىڭ بىلىكتىلىگىن ارتتىرۋدى باستى ماقسات ەتىپ قويىپ وتىر. قازىرگى ستاتيستيكالىق مالىمەتتەرگە قاراعاندا, الەمدە بولاتىن تەحنوگەندىك اپاتتار مەن جويقىن زالالداردىڭ 70 پايىزى ادام فاكتورىمەن بايلانىستى بولاتىندىعى دالەلدەنىپ وتىر. بۇل كورسەتكىشتى تومەندەتۋ بىلىكتى ماماندار دايارلاۋمەن تىعىز بايلانىستى بولاتىندىعى داۋ تۋدىرمايدى. ماماندار بىلىكتىلىگىن ارتتىرۋمەن بىرگە, قۇتقارۋشىلاردىڭ, ءورت ءسوندىرۋشىلەردىڭ, ديسپەتچەرلەر مەن وپەراتورلاردىڭ بەدەلىن كوتەرۋدىڭ دە قاجەتتىلىگى قوزعالىپ قالدى. ءويتكەنى, اتالعان كاسىپ يەلەرى جونىندە تولىق اقپارات بەرىلمەيتىنى ءوز الدىنا, وسى سالاعا ماماندانعاندار, ولاردىڭ جەتىستىكتەرى ءجونىندە كوپ ايتىلماي كەلەدى.
– ءبىز ايماقارالىق ىنتىماقتاستىقتى نىعايتا تۇسۋگە كەلىستىك. نۇرسۇلتان ءابىش ۇلى اتاپ ءوتكەندەي, بۇل ءبىزدىڭ ەلدەرىمىز ءۇشىن وتە ماڭىزدى. بىزگە ەكىجاقتى قاتىناستارعا, ايماقارالىق قاتىناستارعا مىندەتتى ءتۇردە نازار اۋدارۋ قاجەت, – دەدى رەسەي پرەزيدەنتى دميتري مەدۆەدەۆ.
قازاقستاننىڭ توتەنشە جاعدايلار ءمينيسترى ۆلاديمير بوجكو, رەسەيدىڭ ازاماتتىق قورعانىس, توتەنشە جاعدايلار جانە اپاتتاردىڭ زاردابىن جويۋ ءىسى جونىندەگى ءمينيسترى سەرگەي شويگۋ, باتىس قازاقستان وبلىسىنىڭ اكىمى باقتىقوجا ىزمۇحامبەتوۆ, استراحان وبلىسىنىڭ گۋبەرناتورى الەكساندر جيلكين ترانسشەكارالىق سيپاتتاعى توتەنشە جاعدايلاردا بىرلەسە ارەكەت ەتۋدىڭ ماڭىزدىلىعىنا توقتالدى.
مەملەكەت باسشىلارىنىڭ قاتىسۋىمەن ەكى ەلدىڭ ىنتىماقتاستىعىن ودان ءارى نىعايتا تۇسۋگە تىڭ سەرپىن بەرەتىن ماڭىزدى ءۇش قۇجاتقا قول قويىلدى. بۇل قۇجاتتار نەگىزىندە بىرىنشىدەن, قازاقستان-رەسەي ۇكىمەتتەرى اراسىندا «التاي» ترانسشەكارالىق رەزەرۆاتىن قۇرۋ تۋرالى كەلىسىم جاسالدى. ەكىنشىدەن, قازاقستان-رەسەي اراسىندا 2012-2017 جىلدارعا ارنالعان وڭىرارالىق جانە شەكارا ماڭىنداعى ىنتىماقتاستىق باعدارلاماسى بەكىتىلدى. ءۇشىنشىدەن, قازاقستان–رەسەي مەملەكەتتىك شەكاراسى ارقىلى وتكىزۋ پۋنكتتەرى تۋرالى كەلىسىمگە وزگەرىس ەنگىزىلمەك. سوڭعى قۇجاتقا بايلانىستى ناقتىلاي ايتار بولساق, ەكى ەل ۇكىمەتتەرىنىڭ كەلىسىمى 1998 جىلعى 23 جەلتوقساندا جاسالعان ەكەن.
– ءبىزدىڭ جوعارى دەڭگەيدەگى كەزدەسۋلەرىمىز – جاڭا جوبالاردى ىسكە اسىرۋعا, ناقتى كەلىسىمدەردى بەكىتۋگە جاسالعان وڭ قادام, – دەدى ەلباسى نۇرسۇلتان نازارباەۆ فورۋمنان كەيىن جۋرناليستەرگە بەرگەن سۇحباتىندا. – ءبىز بۇگىن ەكى ەلدىڭ بارلىق سالالار بويىنشا بىرلەسكەن ءىس-قيمىلىنىڭ كەلەشەكتەگى باعدارى تۋرالى تالقىلادىق. اسىرەسە, عارىشتان زەرتتەۋ جۇرگىزۋ, كولىك ينفراقۇرىلىمى, وتىن-ەنەرگەتيكا كەشەنى, ترانسشەكارالىق سۋ كوزدەرىن قورعاۋ جانە ءتيىمدى پايدالانۋ قاجەت دەيتىن ماسەلەلەرگە باسىمدىقتار بەرىلدى. ءبىزدىڭ ينتەگراتسيالىق بايلانىستارىمىز تەرەڭدەي بەرەدى. يننوۆاتسيالىق بايلانىستارىمىز دا نىعايا تۇسەدى. كەلەسى جىلى ەكى ەل اراسىنداعى دوستىق, ىنتىماقتاستىق پەن ءوزارا كومەك تۋرالى كەلىسىمنىڭ جانە مەملەكەتتەر اراسىنداعى ديپلوماتيالىق قاتىناستاردىڭ ورناعانىنا 20 جىل تولادى. مەن ءبىزدىڭ ۇكىمەتتەرگە وسى مەرەيتويلىق كۇندەرگە ارنالعان شارالاردى وتكىزۋ تۋرالى ۇسىنىستار ەنگىزىپ, كەلىسۋدى ۇسىنامىن.
شىندىعىندا, قازاقستان مەن رەسەيدىڭ شەكارالاس وڭىرلەرى اراسىنداعى ىنتىماقتاستىق بايلانىس بۇرىنعى جاراسىمدى كورشىلىك دەڭگەيىندە قالماي, ەندىگى كەزەڭدە سەنىمدى ارىپتەستىككە ۇلاسقاندىعىن بايقاتتى.
جولداسبەك شوپەعۇل, «ەگەمەن قازاقستان – استراحاننان.
-----------------------------------------
سۋرەتتەردى تۇسىرگەندەر س.بوندارەنكو, ب.وتارباەۆ.
