تولە بي اۋدانىندا قۇس فەرماسىنىڭ قۇرىلىسى باستالدى

وڭتۇستىك قازاقستان وبلىسىنىڭ اكىمى جانسەيىت تۇيمەباەۆتىڭ قاتىسۋىمەن تولە بي اۋدانىندا «كووپەراتسيا - اگروونەركاسىپ كەشەنىن دامىتۋدىڭ نەگىزى» اتتى تاقىرىپتا قۇس شارۋاشىلىعىن دامىتۋعا ارنالعان مامانداندىرىلعان كوشپەلى سەمينار ءوتتى, دەپ حابارلايدى وبلىس اكىمىنىڭ ءباسپاسوز قىزمەتى. شاراعا اۋىل شارۋاشىلىعى باسقارماسىنىڭ ماماندارى, اۋدان اكىمدەرىنىڭ ورىنباسارلارى, شارۋالار مەن قارجى ۇيىمدارىنىڭ وكىلدەرى قاتىستى. ايماق باسشىسى الدىمەن كيەلى تاس اۋىلىندا «لەڭگىر قۇس» فەرماسىنىڭ ىرگەتاسىنا كاپسۋلا سالىپ, قۇس شارۋاشىلىعىنىڭ دامۋىنا ساتتىلىك تىلەدى. «ەلباسىنىڭ اۋىلشارۋاشىلىعى كووپەراتسياسىن دامىتۋ جونىندەگى تاپسىرماسىنا وراي ءبىز وبلىستىڭ بارلىق اۋداندارىندا اۋىل شارۋاشىلىعىن دامىتۋ ماقساتىندا مامانداندىرىلعان سەمينارلار وتكىزۋدەمىز. بۇگىن وزدەرىڭىز كۋا بولىپ وتىرعان تولە بي اۋدانىندا تاۋىق شارۋاشىلىعىمەن اينالىسۋعا بەل بۋعان 24 كاسىپكەر «لەڭگىر قۇس» اۋىلشارۋاشىلىق كووپەراتيۆىن قۇرىپ, مەملەكەتتەن جەڭىلدەتىلگەن نەسيەگە قول جەتكىزىپ جۇمىسىن باستاعالى وتىر. بۇل وزگەلەرگە ونەگە بولۋى ءتيىس», - دەدى جانسەيىت قانسەيىت ۇلى. ايتا كەتەيىك, شاعىن قۇس فەرمالارىنىڭ قۇرال-جابدىقتارىن ساتىپ الۋعا كەتكەن شىعىننىڭ 50 پايىزى مەملەكەت تاراپىنان سۋبسيديالانادى. سونداي-اق ساتىپ الىنعان اسىل تۇقىمدى ەتتى شوجەلەردىڭ ءار باسىنا 400 تەڭگەدەن دەمەۋ قارجى قاراستىرىلعان. بۇدان بولەك, شارۋالار وندىرىلگەن قۇس ەتىنىڭ ءار كەلىسىنە 40 تەڭگەدەن كومەك قارجى الاتىن بولادى. اتالعان قۇس فەرماسى  جارتى عاسىرلىق تاريحى بار  «شىمكەنت قۇس» جشس-نىڭ بىرلەسكەن كاسىپورىنى. بۇگىندە اتالعان قۇس فەرماسىندا 600 مىڭنان استام قۇس وسىرىلەدى. تاۋىق فەرماسى جىلىنا  14 ملن دانا جۇمىرتقا وندىرەدى. ونىمدەر وڭتۇستىك ءوڭىرى مەن قاتار كورشىلەس وبلىستارعا دا جونەلتىلەدى. سەمينار بارىسىندا قۇس شارۋاشىلىعىن دامىتۋ جايى كەڭىنەن تالقىلانىپ, قاتىسۋشىلارعا مەملەكەت تاراپىنان بەرىلەتىن جەڭىلدىكتەر جايىندا پايدالى ماعلۇماتتار بەرىلدى. شارانىڭ ماقساتى - قۇس شارۋاشىلىعىندا كووپەرتيۆتەر قۇرۋ ارقىلى ءونىمنىڭ كولەمىن ۇلعايتۋ. بۇگىندە وبلىسىمىزدا 2 ملن.  401 مىڭ باس قۇس وسىرىلەدى.  ونىڭ  50 پايىزى جەكە جانە قوسالقى شارۋاشىلىقتاردىڭ ەنشىسىندە. وڭتۇستىك  ءوڭىرى ءوز-ءوزىن قۇس ەتىمەن  74,3 پايىز, ال  جۇمىرتقامەن 75 پايىز  قامتۋعا قاۋقارلى. سوندىقتان بىرىككەن كاسىپورىندار الدىندا قۇس  شارۋاشىلىعىندا دامىتىپ, ءونىم كولەمىن  ارتتىرۋ  ماقساتى تۇر. مۇنان سوڭ ءوڭىر باسشىسى كوكسايەك اۋىلىنداعى «ADS Agro» جشس جۇمىسىمەن تانىستى. اۋماعى 19 گەكتاردى قۇرايتىن سەرىكتەستىك اسىل تۇقىمدى جىلقى جانە ءىرى قارا  وسىرۋمەن اينالىسادى. قوجالىقتاعى  2012 جىلى اشىلعان مال بورداقىلاۋ الاڭى 1 560 باسقا ەسەپتەلگەن. بۇگىنگى كۇنگە  مۇندا 600 باس  ءىرى قارا مال بورداقىلانىپ جاتىر. سونىمەن بىرگە, مۇندا مال سويۋ بەكەتى جۇمىس ىستەپ تۇر. قوجالىققا  «كازاگروقارجى» اق 214 ملن. تەڭگە كولەمىندە نەسيە بەرگەن.  بۇل قارجى نەگىزىنەن مال بورداقىلاۋ الاڭىنىڭ قۇرىلىسىنا جۇمسالىپتى. قازىرگى تاڭدا جۇزگە جۋىق ادامدى جۇمىسپەن قامتىپ وتىرعان شارۋاشىلىق بىلتىر وندىرىلگەن ەتتىڭ ءار كەلىسىنە 170-تەڭگەدەن جانە ءىرى قارا  مال  ەتىنە مەملەكەتتەن 75.4 ملن. تەڭگە سۋبسيديا العان.