الاشتىڭ ابىز اقساقالى بايكەن ءاشىم ۇلىنىڭ 64 جىل وتاسقان جار-قوساعى, اسىل جەڭگەمىز باقىت اسەتقىزى الىستاعى يزرايل ەلىندە باقيلىق ساپارعا اتتانعانىن ەستىگەندە, كوڭىلىمىز قۇلازىپ, جۇرەگىمىز جۇدەپ سالا بەرگەن. ءوزىم سىرقاتتانىپ جۇرسەم دە, استانادا بايىز تاۋىپ وتىرا الماي, اكادەميك كەنجەعالي ساعاديەۆ ەكەۋمىز ورنى تولماس اۋىر قازا ۇستىندە ءاز-اعانىڭ قاسىنان تابىلايىق دەپ جەكسەنبىنىڭ كەشىندە الماتىعا شۇعىل جەتتىك. ەلدىڭ ەلدىگى وسىندايدا تانىلادى-اۋ, وسى كەشتە نەشەمە تەڭىزدىڭ ار جاعىنان ارنايى ۇشاقپەن قيماس جاننىڭ ءمايىتى دە كەلىپ جەتتى.
وسىدان ءبىر جارىم اي بۇرىن ناۋقاسى مەڭدەگەن باقىت اسەتقىزىنىڭ كوڭىلىن سۇراۋعا ادەيىلەپ كەلىپ كەتكەم. دارىگەرلەر پالاتاسىنا كىرىپ كورىسۋگە رۇقسات ەتپەگەن. بايكەن اعا قاپتالداعى بولمەدە, كۇندىز-ءتۇنى قاسىندا ەكەن. جاقىن جانعا دەگەن جۇمساق جۇرەگىنىڭ جاناشىر مەيىرىمىنىڭ ءوزىن ۇلكەن ۇلاعاتقا بالاپ ەدىم سوندا. ون جاستاعى بالا كەزىمنەن بىلەتىن, 14 جىل بويى قازاقستان ۇكىمەتىن باسقارعان, اسا كورنەكتى مەملەكەت قايراتكەرى بايكەن ءاشىم ۇلىنىڭ ۇلاعاتتى شاڭىراعىندا قۇداي قوسقان قوساعى باقىت اسەتقىزىنىڭ الاتىن ورنى ەرەكشە بولاتىن. ءبىز بىلگەن كەزدەردىڭ بارىندە سۇيكىمدى دە سۇيىكتى باقىت جەڭگەمىز دەگەندە بايكەن اعامىزدىڭ دا شىعاردا جانى باسقا ەدى. اسىل اعا-جەڭگەنىڭ قوسىلعاندارىنا 50 جىل تولعان التىن تويلارىن قازاقتىڭ يگى جاقسىلارى قۋانا دۇرىلدەتىپ وتكىزگەنى دە كۇنى كەشەگىدەي كوز الدىمىزدا. باقىت اسەتقىزى ءاردايىم وسىناۋ قاستەرلى وتباسىنىڭ, ءيسى قازاقتىڭ قادىرلى ۇلكەن قارا شاڭىراعىنىڭ قىدىرى, انالاردىڭ اناسى, نەمەرە-شوبەرەلەردىڭ ءاز-اجەسى, سىيلاستىقتىڭ جىبەك ءجىبى بولىپ, اينالاسىن جايدارى دا جادىرا كوڭىلىنىڭ, مولدىرەگەن تازا جۇرەگىنىڭ كۇنشۋاعىمەن ايالاۋدان تىنباي ءوتتى. تىرشىلىك تۇيتكىلدەرىنىڭ ءبارىن ورىندى ورنىنا كەلتىرىپ, قاباق شىتىس پەن كىربىڭگە ەشقاشان ەشبىر ساڭىلاۋ قالدىرماي, جۇرتتىڭ بارلىعىن باۋىرلاستىرىپ, ازاماتتاردى باۋىرعا تارتىپ, اعانىڭ جولداستارىن بىرگە تۋعاننان ارتىق سىيلاپ, اعايىن مەن تۋىستىڭ اراسىندا سىيلاستىقتىڭ دارەجەسىن ارتتىرىپ, دانەكەرى بولىپ, بىرەۋدىڭ قۋانىشىن, ەندى بىرەۋدىڭ رەنىشىن ءبولىسىپ, تىلەكشى ءازيز انا بولىپ جۇرەتىن دە وسى ءبىزدىڭ اسىل, اياۋلى جەڭگەمىز باقىت اسەتقىزى ەدى. سودان دا بولار, بايكەن اعا ەكەۋىنىڭ وسى بەرەكەلى بەيىل, اق نيەت, كەڭ مىنەزدەرىنە قۇدايدىڭ بەرگەنى دە راس. وسى ىرىس-باق ەندى كەيىنگى ۇرپاعىنا جۇعىستى بولسىن دەيمىز. باقىت اسەتقىزى ەردىڭ سەرىگى, ەلدىڭ اناسى بولا ءبىلدى. ول كىسىنى الەكسەي كوسىگين, دىنمۇحاممەد قوناەۆ سياقتى ەل اعالارى, ولجاس سۇلەيمەنوۆتەي ساڭلاق اقىنىمىز, جالپى زيالى قاۋىم تۇگەلدەي قۇرمەت تۇتىپ سىيلادى. باكەڭ زەينەتكەرلىككە شىققان ۋاقىتتاردان بەرى دە قوس اققۋداي جاراسقان قادىرمەندى قوساق, جاراستى جۇپ ەگەمەن ەلدىڭ الاقانىندا, قۇرمەت تورىندە بولدى. ايپارا انا, دومالاق ەنە تەكتەس ونەگە شاشىپ وتكەن وسىناۋ اسىل انانىڭ ارمانى بولماس دەپ بىلەمىن. الدى جارىق, ارتى قايىرلى بولسىن. اۋىر قازا ۇستىندە بولعانعا بولاتتاي بولارىڭىزعا سەنەمىن, قادىرمەندى بايكەن اعا. ماقتاي ساعديەۆ. استانا.
