قانشالىقتى مىڭ ءولىپ, مىڭ ءتىرىلىپ جۇرسە دە, الداعى اتار تاڭ, شىعار كۇننەن كۇدەر ۇزبەگەن اتا-بابالارىمىزدىڭ ارمان-تىلەگىن جۇزەگە اسىرۋ باقىتى ءبىزدىڭ ۇلەسىمىزگە ءتيىپتى. قىرىق اتان تۇيەگە جۇك بولاتىنداي وسىناۋ وراسان زور تاريحي جاۋاپكەرشىلىكتى تەرەڭ سەزىنە وتىرىپ, بۇگىنگى كۇنى ۇلى دالانىڭ ءبىرتۋار پەرزەنتى نۇرسۇلتان نازارباەۆتىڭ باسشىلىعىمەن قازاق ەلىنىڭ ءوز ىشىندە عانا ەمەس, حالىقارالىق ارەنادا دا اۋقىمدى جۇمىستار اتقارىپ جاتقانىنىڭ كۋاسىمىز.
ەندى سول جاھاندىق دەڭگەيدەگى جارقىن جەتىستىكتەرىمىزدىڭ بىرىنە توقتالساق, 2016 جىلدىڭ 28 ماۋسىمىندا قازاقستاننىڭ بىرىككەن ۇلتتار ۇيىمى قاۋىپسىزدىك كەڭەسىنىڭ تۇراقتى ەمەس مۇشەسى بولىپ سايلانعانى بەلگىلى. نيۋ-يوركتە بۇۇ باس اسسامبلەياسىندا وتكەن داۋىس بەرۋ ناتيجەسىندە وسى ۇدەرىسكە قاتىسقان 193 مەملەكەتتىڭ 138-ءى قازاقستاندى قولداپ داۋىس بەرسە, باسەكەلەسىمىز – تايلاند كورولدىگىن 55 مەملەكەت قانا قولدادى. وسىلايشا, قازاقستان – بىرىككەن ۇلتتار ۇيىمىنىڭ جارعىسىمەن «حالىقارالىق بەيبىتشىلىك پەن قاۋىپسىزدىكتىڭ باستى جاۋاپكەرشىلىگى» جۇكتەلگەن, تۇراقتى جۇمىس جاسايتىن الەمدىك ماڭىزى زور ۇيىمنىڭ ساياسي ورگانىنا ورتالىق ازيادان سايلانعان العاشقى ەل اتاندى. ەندى مىنەكەي, جاڭا جىلدىڭ العاشقى كۇنىنەن قازاقستان بىرىككەن ۇلتتار ۇيىمى قاۋىپسىزدىك كەڭەسىنىڭ تۇراقتى ەمەس مۇشەسى قىزمەتىنە رەسمي تۇردە كىرىستى. ەلىمىز وسىناۋ مىندەتتى 2018 جىلدىڭ سوڭىنا دەيىن اتقارماق. اتالعان ميسسيا قاۋىپسىزدىك كەڭەسىندە توراعالىق ەتۋگە, وتىرىس شاقىرۋعا جانە تالقىلاناتىن كۇن ءتارتىبىن تۇزۋگە قۇقىق بەرەدى. سونىمەن بىرگە, بۇۇ قاۋىپسىزدىك كەڭەسىنە سايلانۋىمىز ايماقتىڭ شيەلەنىستى جاعدايلارىنا الەمدىك قوعامداستىقتىڭ نازارىن اۋدارۋعا, مەملەكەتىمىزدىڭ حالىقارالىق باستامالارىن ىسكە اسىرۋعا, استانانىڭ جاھاندىق ماسەلەلەردە ماڭىزدى ءرول اتقارىپ, «ەۋرازيا كەڭىستىگىندەگى قاۋىپسىزدىك پەن تۇراقتىلىق فاكتورى» رەتىندە قازاقستاننىڭ ءيميدجىن كوتەرۋگە سەبەپ بولماق ءارى وتانىمىز ءۇشىن وزەكتى ماسەلەلەردى كوتەرىپ, الەم نازارىن اۋدارۋعا مۇمكىندىك بار. قازىرگى زامانعى شەتىن پروبلەمالاردى شەشۋگە قاتىسۋ ءبىزدىڭ الدىمىزدان كوپتەگەن ەلدەرمەن جانە وڭىرلەرمەن قارىم-قاتىناستارىمىزدى دامىتۋ ءۇشىن دە بارىنشا مۇمكىندىكتەر اشادى. ەندىگى جەردە قازاقستان كوشباسشىلىق ۇستانىمدارىن ودان سايىن بەلسەندى ىلگەرىلەتەتىن بولادى. ناقتى ايتقاندا, قازاقستان جاھاندىق پروبلەمالاردى شەشۋدىڭ جولدارىن ىزدەستىرۋگە سۇبەلى ۇلەسىن قوسپاقشى. اسىرەسە, سيرياداعى اسكەري قاقتىعىستى توقتاتۋعا كۇش سالاتىن بولادى. قازىر ونىڭ العىشارتتارى دا جاسالۋدا. وعان سيريا ماسەلەسىنىڭ تۇركيا مەن رەسەيدىڭ قاتىسۋىمەن استانا الاڭىندا جان-جاقتى تالقىلاناتىنى دالەل. ەگەر يراننىڭ يادرولىق ماسەلەسىن وڭتايلى شەشۋدە قازاقستاننىڭ ءرولىن ەسكەرەر بولساق, سيريادا بەيبىت ءومىر ورنىقتىرۋعا مۇمكىندىك تۋارىنا سەنىم بار. مۇنىڭ سىرتىندا, قازاقستاننىڭ بۇۇ قاۋىپسىزدىك كەڭەسىنىڭ 2017-2018 جىلدارداعى تۇراقتى ەمەس مۇشەلىگىنە سايلانۋىنا بايلانىستى ەلباسىنىڭ ۇندەۋىندە ايتىلعانداي, ءبىز جاھاندىق قوعامداستىقتىڭ نازارىن بۇعان دەيىنگى كوكەيكەستى باستامالارىمىزعا اۋدارۋ نيەتىندەمىز. ولار يادرولىق قارۋ مەن سوعىس ۆيرۋستارى جانە جانجالداردان ازات الەم قۇرۋعا باعىتتالعان. ناقتى ايتقاندا, بۇۇ-نىڭ 2015 جىلى وتكەن باس اسسامبلەياسىنىڭ 70-ءشى سەسسياسىندا جاريالاعان تەرروريزمگە قارسى باستامانى ىلگەرىلەتۋمەن اينالىسادى. ايتا كەتەرلىگى, قازاقستان وسى ىزگىلىكتى ماقساتتارىنا بۇۇ-نىڭ قۇرىلعانىنا 100 جىل تولاتىن 2045 جىلعا قاراي قول جەتكىزۋ ءۇشىن جۇمىس ىستەيتىن بولادى. قازاقستان, سونداي-اق, سۋ-ەنەرگەتيكالىق جانە ازىق-ت ۇلىك قاۋىپسىزدىگى ماسەلەلەرىن قاراستىرۋعا باسىمدىق بەرمەك. سايىپ كەلگەندە, قازاقستاننىڭ الداعى ەكى جىلدا بىرىككەن ۇلتتار ۇيىمى قاۋىپسىزدىك كەڭەسىنىڭ تۇراقتى ەمەس مۇشەسى رەتىندە وركەنيەت دامۋىنىڭ سارا جولىنا قوسار ۇلەسى مول بولىپ, ەلىمىزدىڭ مەرەيىن ۇستەم ەتەرىنە سەنىمدىمىز. ءارى اتالعان وقيعا تەك قازاقستان ءۇشىن عانا ەمەس, سونىمەن بىرگە, ەۋرازيا قۇرلىعى ءۇشىن دە, الەمدىك قوعامداستىق ءۇشىن دە ناتيجەسى اسەرلى جانە ءمان-ماڭىزى ايرىقشا بولادى دەگەن ءۇمىت تە جوق ەمەس. ەندەشە, بارىمىزدى باعالاي بىلگەنىمىز دە, ەلىمىزدىڭ جەتىستىگىنە قۋانا بىلگەنىمىز دە ءجون. قورىتا ايتقاندا, قازاقستاننىڭ بۇۇ قاۋىپسىزدىك كەڭەسىنىڭ 2017-2018 جىلدارعا تۇراقتى ەمەس مۇشەسى بولىپ سايلانۋى ەلىمىزگە دەگەن قۇرمەت پەن حالىقارالىق بەدەلى تانىلۋىنىڭ تاعى ءبىر دالەلى, سونىمەن قاتار, قازاقستاننىڭ الەمدىك ىستەردە بەلسەندى ءرول اتقارا الاتىنى مويىندالعانىنىڭ ايعاعى.
كەنجەبولات جولدىباي,
ساياساتتانۋشى
