ىستانبۇلدا قارۋلى شابۋىلدان 35 ادام قازا تاپتى

تۇركيانىڭ ىستانبۇل قالاسىندا ورنالاسقان Reina تۇنگى كلۋبىنا شابۋىل جاسالىپ, كەم دەگەندە 35 ادام قازا تاپتى. سونداي-اق, 40-تان استام تۇرعىن ءتۇرلى دەڭگەيدە جاراقات الدى. بۇل تۋرالى تاسس اقپارات اگەنتتىگى حابارلادى. «بۇل تەراكت. جاڭا جىل مەرەكەسىن كوڭىلدى قارسى الۋعا جينالعاندارعا اياۋسىز وق جاۋدىردى. مەرت بولعانداردىڭ بىرەۋى – پوليتسيا قىزمەتكەرى», – دەدى قالا مەرى ۆاسيپ شاحين. ورتاكەي اۋدانىندا ورنالاسقان عيماراتقا اياز اتانىڭ كيىمىن كيگەن بەلگىسىز ەكى ادام قارۋلى شابۋىل جاسادى. Reuters اگەنتتىگىنىڭ اقپارىنا سايكەس, بۇل جەرگىلىكتى ۋاقىت بويىنشا 01:15 كەزىندە ورىن العان. تۇركيانىڭ NTV تەلەارناسىنىڭ مالىمەتى بويىنشا, تۇنگى كوڭىل كوتەرۋ ورنىندا 800-گە جۋىق ادام بولعان. قازىرگى ۋاقىتتا وقيعا ورنىنا ونداعان جەدەل جاردەم جانە پوليتسيا كولىكتەرى جىبەرىلدى. ايتا كەتەيىك, 11 جەلتوقسان كۇنى ىستانبۇلدا «بەشيكتاش» پەن «بۋرساسپور» كوماندالارىنىڭ اراسىنداعى ماتچتان كەيىن Vodafone Arena ستاديونىنىڭ ماڭىندا جويقىن جارىلىس بولعان. سالدارىنان 40-قا جۋىق ادام وپات بولىپ, 155 تۇرعىن جاراقات العان.