گايتي ەسەڭگىرەپ قالدى

باتىس جارتىشارداعى اسا شاعىن جانە وتە كەدەي مەم­لە­كەت – گايتيدە سۇمدىق جەر سىلكىنىسى بولدى. ءۇش رەت تىركەلگەن ءدۇمپۋدىڭ العاشقىسى – 7, سوڭعى ەكەۋى 5,5 باللدى قۇرادى. العاشقى ءدۇمپۋدىڭ ەپيتسەنترى ەل استاناسى پورت-و-پرەنس قالاسىنان 16 شاقىرىم جەردە بولدى. ءزىلزالا زار­دا­پ­تارى ءالى تولىق انىقتالماعاندىقتان, ناقتى قانشا ادام وپات بولعانىن تاپ باسىپ ايتۋ قيىن. پرەزيدەنت سا­رايى, اكىمشىلىك عيماراتتار, جۇزدەگەن تۇرعىن ۇيلەر, مەك­تەپتەر, اۋرۋحانالار, شىركەۋلەر, تۇرمە, پوليتسيا ۋچاسكەلەرى – ءبار-ءبارى قيراعان. كەيبىرىنىڭ ورنىندا توپىراق ءۇيىندىسى عانا بار. قانسىراعان جارالى جاندار ءالى تولىق كومەك الا الماي, مايىتتەرمەن قاتار كوشەلەردە جاتىر. كوپتەگەن باق-تار وپات بولعاندار سانى 500 مىڭعا دەيىن جەتۋى ىقتيمال دەگەن بولجامدار ايتۋدا. كوز كورگەندەر ءاربىر ءۇشىنشى ءۇي قيراعان دەيدى. پرەزيدەنتتىڭ ءوز ءۇيى دە, قىزمەت سارايى دا قيراعان­دىقتان, ول كورشىلەس دومينيكان رەسپۋبليكاسىن بارىپ پانالاعان. ەكى ەل سوڭعى جىلدارى ءبىر-بىرىنە الاكوز بولىپ كەلسە دە, دومينيكان رەسپۋبليكاسى كورشىسىنە ەڭ ءبىرىنشى بولىپ كومەككە كەلدى. بۇۇ-نىڭ ميسسياسى تۇرعان ءۇي دە تولىعىمەن قيراعان, قازىردىڭ وزىندە 16 قىزمەتكەردىڭ قازا بولعانى, 56-سىنىڭ جارالانعانى بەلگىلى بولىپ وتىر, ال 150 ادام حابار-وشارسىز جوعالعاندار ساپىندا. بۇگىنگى كۇندەرى اقش, ەۋرووداق, رەسەي فەدەراتسياسى جانە ت.ب. ەلدەر گايتيگە كومەك قولىن سوزۋدا. بۇكىلالەمدىك بانك 100 ملن. اقش دوللارى كولەمىندە گرانت بولەتىنىن ءمالىم ەتتى...