"التىن توبىلعى" جەڭىمپازدارى بەلگىلى بولدى

بۇگىن استاناداعى نازارباەۆ ورتالىعىندا ادەبيەت سالاسىنداعى «التىن توبىلعى-2016» سىيلىعى ءۇشىن وتكىزىلگەن كونكۋرس قورىتىندىسى شىعارىلدى. اتالعان شارا بارىسىندا كونكۋرستىڭ جەڭىمپازدارى بەلگىلى بولدى. اتاپ ايتساق, ۇزدىك پروزا نوميناتسياسىندا "اعا" شىعارماسى ءۇشىن الماس ءنۇسىپ جاقىپاقىن, ۇزدىك دراماتۋرگيادا - "ادام تۋرالى اڭىز" شىعارماسى ءۇشىن بايبول الىبەك ءۋاليحان ۇلى, ۇزدىك بالالار شىعارماسى اتالىمىندا - "تاۋەلسىزدىك تۇعىرى" تاقىرىبى بويىنشا سەرىكبول حاسان جەڭىسكە جەتتى. بۇل جەڭىمپازدارعا 1 ملن تەڭگە كولەمىندە اقشالاي سىيلىق تابىستالدى. ال تاۋەلسىزدىكتىڭ 25 جىلدىعىنا ارنالعان "تاۋەلسىزدىك تۇعىرى" تاقىرىبىنداعى شىعارماسى ءۇشىن كرەتوۆا تاتيانا 1,5 ملن تەڭگە ارنايى سىيلىق الدى. جىلدىڭ ۇزدىك پوەزياسى رەتىندە ەركەعالي بەيسەنوۆتىڭ "اللاجار الاش!" شىعارماسى مەن ولجاس قاسىمنىڭ "جارىلىس" تۋىندىسى اتالدى. ءبىر ايتا كەتەرلىگى, كونكۋرسقا 18-35 جاس ارالىعىنداعى ازاماتتار ءوز شىعارمالارىن وسى جىلدىڭ 1 شىلدەسىنەن باستاپ جىبەرگەن. ءادىل قازىلار القاسى ۇزدىكتەردى انىقتاۋ ءۇشىن بارلىعى 110 شىعارما وقىپ شىققان. ايان ءابدۋالي, "ەگەمەن قازاقستان".