بۇگىن باكۋدەگى ازەربايجان مەملەكەتتىك كوركەمونەر اكادەمياسىندا «بەيمالىم قازاقستان» جاس فوتوگرافتار كورمەسى وتەدى. اتالعان فوتوجوبانى قازاقستان رەسپۋبليكاسى تۇڭعىش پرەزيدەنتى - ەلباسىنىڭ قورى ازەربايجانداعى قر ەلشىلىگىنىڭ قولداۋىمەن ۇيىمداستىردى, دەپ حابارلايدى قازاقپارات.
«بەيمالىم قازاقستان» - ۇلى دالانىڭ الۋان ءتۇرلى تابيعاتى بار, ەجەلگى اڭىزدارى بار بىرەگەي فوتوكورمە. وزىندىك ەرەكشە بوياۋلارى بار ەكسپوزيتسيا حالقىمىزدىڭ تاريحى مەن باي مادەنيەتىن ساقتاۋعا تىرىسقان. فوتوجوبانىڭ ءار جۇمىسى كەلۋشىلەردىڭ تاڭدانىسىن تۋعىزىپ قانا قويماي, ەلىمىزدى تەرەڭىرەك تانۋعا مۇمكىندىك بەرەدى.
فوتوكورمە ۆەنگريادا, گرۋزيادا, قىتاي مەن رەسەيدە, وڭتۇستىك كورەيا, اقش جانە فرانتسيادا قويىلدى. ەندى ازەربايجان حالقى 40-تان استام فوتوجۇمىستى كورىپ, جاس تالانتتاردىڭ شىعارماشىلىعىنا باعا بەرۋ مۇمكىندىگىنە يە.
