"بولاشاق" تۇلەكتەرىنىڭ 98 پايىزى جۇمىسپەن قامتىلعان

"بولاشاق" باعدارلاماسى تۇلەكتەرىنىڭ 98 پايىزى جۇمىسپەن قامتىلعان, ولاردىڭ ىشىندە: 56 پايىزى مەملەكەتتىك ۇيىمدار مەن مەكەمەلەرگە, 29 پايىزى - جەكە سەكتورعا, 12 پايىزى - حالىقارالىق ۇيىمدارعا جانە تەك 1 پايىزى عانا – ۇلتتىق كومپانياعا ورنالاسقان. جۇمىسقا ورنالاستىرىلماعان 2 پايىزى وقۋىن اياقتاپ, شەتەلدىك ديپلومىنىڭ تۇپنۇسقاسىن كۇتىپ وتىرعان تۇلەكتەر. بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن ءباسپاسوز كونفەرەنتسياسىندا «حالىقارالىق باعدارلامالار ورتالىعى» اق پرەزيدەنتى جانبولات مەلدەشوۆ ايتتى. –23 جىل بۇرىن ۇلت كوشباسشىسىنىڭ باستاماسىمەن «بولاشاق» حالىقارالىق ستيپەندياسى ءبىلىم سالاسىنداعى ەڭ العاشقى جوبالاردىڭ ءبىرى بولا وتىرىپ, ۇلتتىڭ باسەكەگە قابىلەتتىلىگىن ارتتىرۋ جانە نىعايتۋ ءىسىنىڭ قولدانىستاعى تەتىگىنە اينالدى. ەلىمىزدىڭ حالىقارالىق بەت-بەينەسىنىڭ قالىپتاسۋىنا ولاردىڭ دا قوسقان ۇلەستەرى زور. 2016 جىلعى 5 قاراشادا 23 جىل تولعان «بولاشاق» باعدارلاماسى – بۇل تاۋەلسىز قازاقستاننىڭ ماڭىزدى يننوۆاتسيالىق جوبالارىنىڭ ءبىرى, - دەدى جانبولات مەلدەشوۆ. 23 جىلدا «بولاشاق» ستيپەندياسى شەڭبەرىندە ۇلتتىق ەكونوميكانىڭ ءتۇرلى سالالارى ءۇشىن 9 339 مامان دايارلاندى, ولاردىڭ اراسىندا 2 000-نان اسا ينجەنەر, 2 000-عا جۋىق مەكتەپ جانە جوعارى وقۋ ورىندارىنىڭ وكىلدەرى, ەل وڭىرلەرىنە ارنالعان 600 دارىگەر, 400 مەملەكەتتىك قىزمەتشى, 200 شىعارماشىلىق سالاسىنىڭ قىزمەتكەرى جانە 2 000-نان اسا ۇلتتىق جانە جەكە كومپانيا ماماندارى بار. 2016 جىلى شەتەلدە جوعارى بىلىكتى كادرلار دايارلاۋ باعدارلاماسى شەڭبەرىندە رەسپۋبليكالىق كوميسسيانىڭ شەشىمىمەن 231 ستيپەنديا تاعايىندالدى «مەملەكەت باسشىسى قازاقستاندىق ۇلتتىڭ جوعارى بىلىكتىلىگى مەملەكەتتىڭ باسەكەگە قابىلەتتىلىگىنىڭ نەگىزگى فاكتورى ەكەندىگىن بىرنەشە رەت اتاپ وتكەن بولاتىن. «بولاشاق» باعدارلاماسى جيىرما جىلدان اسا ۋاقىتتان بەرى زاماناۋي جوعارى جانە جوعارى وقۋ ورنىنان كەيىنگى ءبىلىم فلاگمانى بولا وتىرىپ, جوعارى ءبىلىمدى ۇلتتىڭ قالىپتاسۋىنا ءوزىنىڭ ايتارلىقتاي ۇلەسىن قوسىپ كەلەدى», - دەدى «حالىقارالىق باعدارلامالار ورتالىعى» اق پرەزيدەنتى. سونىمەن قاتار كونفەرەنتسيا بارىسىندا "100 ناقتى قادام" ۇلت جوسپارى بارىسىندا 70-قادامعا سايكەس اقش پەن ۇلىبريتانياعا تاعىلىمداماعا «استانا» حالىقارالىق قارجى ورتالىعىنىڭ ءبىر توپ قىزمەتكەرلەرى جىبەرىلىپ, جاقىن ۋاقىتتا 24-قادامعا سايكەس ۇلىبريتانياعا AIFC حالىقارالىق تورەلىك ورتالىعىن قۇرۋعا تارتىلعان سوت قىزمەتكەرلەرى مەن سۋديالار دا باراتىنى بەلگىلى بولدى.