اقتوبەدە التىن وڭدەۋ فابريكاسى سالىنادى

ءوڭىرىمىز جانە تۇتاستاي ەلىمىز ءۇشىن ءىرى جوبانى جۇزەگە اسىرۋعا قاتىستى ماسەلەلەر «AltynExCompany» اق كەن ءوندىرۋ كاسىپورنىنىڭ باسشىلىعىنىڭ وبلىس اكىمى بەردىبەك ساپارباەۆپەن كەزدەسۋى بارىسىندا اڭگىمە وزەگىنە اينالدى. وبلىستا جىلىنا 5 ميلليون تونناعا دەيىن التىن قۇرايتىن كەندى وڭدەپ, التىن ايىرىپ الۋشى فابريكا سالىناتىن بولدى. «AltynExCompany» كومپانياسى مۇعالجار اۋدانىنداعى التىندى پوسەلكەسىندە «يۋبيلەينوە» التىن كەنى ورنىن 2015 جىلدىڭ قازان ايىنان يگەرۋدە. كاسىپورىن جەر استى ادىسىمەن جىلىنا 300 مىڭ توننا كەن وندىرەدى. كاسىپورىننىڭ وڭىرلىك ديرەكتورى ورمان تۇزەلباەۆ ستراتەگيالىق جوسپارلارىمەن ءبولىستى. «قازىرگى ۋاقىتتا ءبىز اشىق ادىسپەن از قۇرامدى التىنى بار كەندى يگەرۋگە كوشۋدى جوسپارلاپ وتىرمىز. 2017 جىلى التىن ايىرىپ الاتىن فابريكانىڭ قۇرىلىسىن جوبالاپ, قۇرىلىسىن باستاۋدى قولعا الماقپىز. بۇل جوبا بىزگە دورە قۇيماسىن شىعارۋمەن جۇتاڭ كەندى وڭدەۋگە مۇمكىندىك بەرەدى, ءبىز قۇرىلىس كەزىندە 800 ادامدى جۇمىسپەن قامتيمىز, نىسان پايدالانۋعا بەرىلگەننەن كەيىن 700 ادامعا دەيىن جۇمىس ىستەيتىن بولادى. جوبانىڭ جالپى قۇنى — 100 ميلليارد تەڭگە. نارىقتىڭ قولايلى كونيۋنكتۋراسىندا گەولوگيالىق بارلاۋ جۇمىستارىنا 5-7 ميلليارد تەڭگەگە دەيىن قارجىنى ينۆەستيتسيالاۋ جوسپارلانۋدا», – دەپ وبلىس اكىمىن حاباردار ەتتى «AltynExCompany» وكىلى. ءوڭىر باسشىسى كاسىپورىننىڭ تۇرعىنداردىڭ الەۋمەتتىك ماسەلەلەرىن شەشۋ بويىنشا وزىنە العان مىندەتتەمەلەردى ورىنداۋ بارىسى تۋرالى ءسوز قوزعادى. قازىرگى ۋاقىتتا التىندى پوسەلكەسىندە بالالار باقشاسى, سونداي-اق جۇمىسشىلار اسحاناسى سالىنىپ, جۇمىس ىستەپ تۇر. جوبا جاڭا ماماندىقتار قۇرۋعا, قازاقستاندىق كادرلاردى وقىتۋعا جانە بىلىكتىلىگىن كوتەرۋگە مۇمكىندىك بەرەدى دەپ كۇتىلۋدە. 2021 جىلى جوبالىق قۋاتقا ەنگەننەن كەيىن بيۋدجەتكە جىل سايىنعى اۋدارىلىمدار 10 ميلليارد تەڭگە شاماسىن قۇراماقشى. كاسىپورىن باسشىسى وبلىس اكىمىنىڭ بىرقاتار پروبلەمالاردى شەشۋگە ىقپال ەتۋىن سۇرادى. بۇل نەگىزىنەن ينفراقۇرىلىمداردى جۇرگىزۋگە, ياعني گاز, ەلەكتر, سۋمەن قامتۋ جەلىلەرىن جۇرگىزۋگە, اۆتوجول قۇرىلىسىن سالۋعا قاتىستى. بۇدان باسقا, كومپانيا باسشىلىعى قۇرىلىس-مونتاج جۇمىستارى مەن جابدىقتار شىعىندارىن جابۋعا ينۆەستيتسيالىق سۋبسيديا الۋعا, سالىق جەڭىلدىكتەرىنە جانە قۇرال-جابدىقتاردى, شيكىزاتتار مەن ماتەريالداردى اكەلۋدە كەدەن سالىقتارى تولەمىنەن بوساتۋعا قولداۋ جاساۋدى سۇرادى. «ءبىز ءوڭىر ءۇشىن ماڭىزدى جوبانى قولدايمىز, «بيزنەستىڭ جول كارتاسى» باعدارلاماسى اياسىندا ينفراقۇرىلىمدار جۇرگىزۋگە كومەكتەسەمىز, بىراق جەرگىلىكتى تۇرعىنداردى الەۋمەتتىك قولداۋ بويىنشا وزدەرىڭىز قابىلداعان بارلىق مىندەتتەمەلەرىڭىزدى ورىندايتىن بولىڭىزدار», – دەدى وبلىس اكىمى كەزدەسۋ قورىتىندىسىندا. ساتىبالدى ءساۋىرباي "ەگەمەن قازاقستان"