العاشقى قادامىن 1997 جىلى بەرلين قالاسىنان باستاعان حالىقارالىق جوبا الماتىدا تۇڭعىش رەت 2006 جىلى ورتالىق مۋزەيدە بەلگىلى زەرتتەۋشى نۇرسان ءالىمبايدىڭ ۇيىتقى بولۋىمەن ۇيىمداستىرىلعان بولاتىن. سودان بەرى ۇزدىكسىز ءوتىپ كەلە جاتقان مادەني شاراعا حالىقتىڭ قىزىعۋشىلىعى جىلدان-جىلعا ارتىپ كەلەدى. تاريحي-مادەني مۇرانى ناسيحاتتاۋعا ارنالعان شارادا كورەرمەن نازارىنا مۋزەي قورىنان جانە جەكە كوللەكتسيالاردان جاڭا كورمەلەر ۇسىنىلىپ, مادەني-رۋحاني ديالوگ جاساۋعا داڭعىل جول اشىلدى. ۇيىمداستىرۋشىلار ساحنالىق قويىلىمدار مەن تاريحي كەيىپكەرلەردىڭ وبرازىندا كورمە زالدارىمەن تانىستىردى. اندرونوۆ مادەنيەتىنىڭ ايەل ادامى مەن ساق حانشايىمى توميريس قازاقستاننىڭ ەجەلگى جانە ورتاعاسىرلىق تاريحىمەن تانىستىرسا, تاريحي ەتنوگرافيا زالىندا قازاق باتىرلارى قىلىشتاسۋ ونەرىن كورسەتتى.
مۋزەي ديرەكتورىنىڭ مۋزەيلىك مەنەدجمەنت جانە ماركەتينگ جونىندەگى ورىنباسارى بيبىگۇل داندىعاراەۆا: «مۋزەي ءتۇنى» – شىعارماشىل ادامدارمەن سەرىكتەسۋ الاڭى. الماتى قالاسىنداعى ۇلتتىق مادەني جانە ءبىلىم بەرۋ ورتالىقتارى, ونەر, مادەنيەت جانە عىلىم قايراتكەرلەرى, شىعارماشىلىق ستۋديالار مەن قوعامدىق قورلار, بيزنەس-قۇرىلىمدار جىل سايىن «مۋزەي ءتۇنى» شاراسىنا بەلسەنە قاتىسىپ كەلەدى. بۇل كۇنى مۋزەي ۇلتى, جاسى, ءدىني كوزقاراستارى مەن قىزىعۋشىلىقتارى ءارتۇرلى جانداردىڭ باس قوسىپ, پىكىر الماسۋىنا جاعداي جاسايتىن الاڭعا اينالدى», دەدى.
سونداي-اق, الماتى قالاسىنىڭ قازىرگى زامانعى سۋرەتشى-مۇسىنشىلەرى مەن بىرەگەي اۆتورلىق جۇمىستاردىڭ ء«مۇسىن مادەنيەتى» كورمەسى, شۆەد سۋرەتشىسى تۋۆە كرابونىڭ «قىلمىس ورىندارى: العاشقى نايزاعاي» كورمەسى ۇسىنىلدى. «Positive life Studio», «Tesla art laboratory» كومپانيالارى ۇسىنعان پروەكتورلىق, پيكسەلدى, جارىقديودتى كارتينالار; شۆەتسيالىق قوناقتاردىڭ قۇتتىقتاۋى – پەرفومانس «كاسپي تەڭىزىندەگى ۆيكينگ-
تەر» جانە «Baidaralin Studio» ۇسىنعان قازاق ساداقشىلارى; «Tribal Pro», «Dance Studio», «Cuban Mix» ۇسىنعان بي شوۋى; «يمپەريال», «سەيشن» شوۋ-بالەتى; «الماتى باراباندارى» شوۋى; «Fire Sunset» كومپانياسىنىڭ وت شاشۋى, «Big bubble» كومپانياسىنان سابىندى كوپىرشىكتەر شوۋى; «ليمپوپو» كومپانياسىنان عىلىمي شوۋى; اعاش اياقتى ونەرپازدار مەن سيقىرشى ميحايل گۋتتوروۆ جانە «گورود سكازكي» كومپانياسىنىڭ VR-كوزىلدىرىك, سونداي-اق, تاريحي وبرازدارداعى «جاندى مۇسىندەر» مۋزەي تۇنىنە مەرەكەلىك سالتانات سىيلادى.
باعاشار تۇرسىنباي ۇلى,
«ەگەمەن قازاقستان»
الماتى
