– اۋا رايى قاراسىپ تۇر. قازىردىڭ وزىندە ىلعال جابۋ جۇمىسىن جوسپارداعى 305 مىڭ گەكتاردىڭ ورنىنا 310,8 مىڭ گا ەتىپ ارتىعىمەن ورىندادىق. 85,2 پايىز القاپقا سەبۋ الدىنداعى وڭدەۋ جۇمىستارى جۇرگىزىلدى. بۇگىنگە دەيىن كوكتەمگى جەر جىرتۋ كوزدەلگەن 9 مىڭ گا القاپتىڭ 7,6 مىڭ گەكتارى جىرتىلدى, – دەيدى باتىس قازاقستان وبلىستىق اۋىل شارۋاشىلىعى باسقارماسىنىڭ ەگىن شارۋاشىلىعى ءبولىمى باستىعىنىڭ مىندەتىن اتقارۋشى اسىلبولات كۋبيەۆ.
بۇگىندە وبلىستىڭ ەگىستى اۋداندارىندا كوكتەمگى دالا جۇمىستارى جاپپاي جۇرگىزىلىپ جاتىر. جوسپار بويىنشا 52,0 مىڭ گا القاپقا مايلى داقىلدار ەگىلمەك, ونىڭ 40 مىڭ گا القابى – كۇنباعىس. كارتوپ جانە كوكونىس-باقشا داقىلدارىن 9,0 مىڭ گا القاپقا وتىرعىزۋ كوزدەلگەن. ال مال ازىقتىق داقىلدار 168 مىڭ گا القاپتى قۇرايدى.
مامانداردىڭ ايتۋىنشا, شارۋاشىلىقتار تۇقىممەن تولىقتاي قامتىلعان. جازدىق ءداندى داقىلدار تۇقىمى جوسپارداعىدان 25 پايىزعا ارتىق دايىندالىپتى. ياعني, قاجەتتىلىك 19,8 مىڭ توننا بولسا, ناقتى دايىندالعانى – 24,8 مىڭ توننا.
كوكتەمگى دالا جۇمىستارىنا 4 173 تراكتور, 4 965 تۇقىمسەپكىش, 793 قوپسىتقىش جانە 46 ەگۋ كەشەنى قاتىسۋدا.
باتىس قازاقستان وبلىسىنا بيىلعى كوكتەمگى دالا جۇمىستارىن جۇرگىزۋ ءۇشىن 12 مىڭ توننا ديزەل وتىنى بولىنگەن ەكەن. ونى جەتكىزۋشى وپەراتور – «قازمۇنايگاز ونىمدەرى» جشس. 1 ليتر ديزەل وتىنىنىڭ باعاسى 122 تەڭگەدەن جىبەرىلگەن. كوكتەمگى ەگىس جۇمىستارىن قارجىلاندىرۋعا «كەڭ دالا» باعدارلاماسى ارقىلى 600 ملن تەڭگە قاراستىرىلعان قارجى «اگرارلىق نەسيە كورپوراتسياسى» اق بقو فيليالىنىڭ اۋداندىق نەسيە سەرىكتەستىكتەرى ارقىلى بەرىلەدى.
قازبەك قۇتتىمۇرات ۇلى,
«ەگەمەن قازاقستان»
ورال
