بۇل تۋرالى قازاقپارات ءتىلشىسى حابارلادى. اتالعان باستاما قازاقستاندا العاش رەت قولعا الىنىپ وتىر.
قاراعاندى وبلىسى اكىمىنىڭ ورىنباسارى جاندوس ابىشەۆتىڭ ايتۋىنشا, ورتالىق اشىلعالى مامانداردىڭ كومەگىنە جۇگىنگەن ادام سانى 60-قا جەتكەن.
"وتكەن جىلى تۇرمەدەن شىققان 132 ادام ورتا ءبىلىم تۋرالى اتتەستاتتى الدى, تاعى 81 ازاماتقا نەگىزگى ءبىلىمى بار دەگەن كۋالىك بەرىلدى. 6 تۇزەۋ مەكەمەسىندە كاسىبي ءبىلىم بەرۋ توپتارى جاساقتالدى. ول جەردە 222 ادام ءبىلىم الىپ جاتىر. بيزنەسمەندەر دە ونداي ادامدارعا جۇمىسقا تۇرۋ ءۇشىن كۆوتا ءبولىپ وتىر. وسى ۋاقىتقا دەيىن 200 ادام جۇمىسقا تۇردى. ال بيزنەسپەن اينالىسامىن دەۋشىلەر ءوز كاسىبىن اشۋ ءۇشىن نەسيە الا الادى. ماسەلەن, وساكاروۆكا اۋدانىنىڭ ءبىر تۇرعىنى مال شارۋاشىلىعىمەن اينالىسامىن دەپ, 3 ميلليون تەڭگە كولەمىندە نەسيە الدى", - دەيدى ابىشەۆ.
بۇل باستامانىڭ تيىمدىلىگىن ەسكەرە وتىرىپ, الداعى ۋاقىتتا تاعى ەكى بولىمشەنى اشۋ جوسپارلانىپ وتىر ەكەن. بۇدان بولەك, ارنايى جوبانىڭ اياسىندا زاڭگەرلىك كومەك قانا ەمەس, قارجىلاي قولداۋ دا جاسالادى. ول ءۇشىن جەرگىلىكتى بيۋدجەتتەن 22 ميلليون تەڭگە بولىنگەن.
