قازاقتىڭ ۇلتتىق سۋسىنى قىمىزدىڭ ادام دەنساۋلىعىنا تيگىزەر پايداسى مول. مۇنى بىلگەن شەتەلدىكتەر بۇل ءىستى الدەقاشان قولعا العان. رۋدولف شتورح كەڭەس داۋىرىندە تۇرمەدە جاتقاندا تۋبەركۋلەزبەن اۋىرىپ, ونىڭ قازاق دوسى ساۋمالمەن ەمدەپ جازعان ەكەن. اۋرۋىنان قۇلان تازا ايىققان ول ەلىنە ورالعان سوڭ قىمىز وندىرۋمەن اينالىسادى, كەيىننەن ۇرپاقتارى گانس تسولمان جالعاستىرادى. وسىلايشا قىمىزدىڭ تەحنولوگياسىن جەتىك مەڭگەرگەن گەرماندىقتار ەلىمىزگە ارنايى كەلىپ, قىمىز تەحنولوگياسىنىڭ قىر-سىرىمەن جان-جاقتى تانىستىرادى, وقۋ جاتتىعۋلارىن وتكىزەدى.
− ءبىز بۇل قۇرىلعىلاردى گەرمانيادان الدىرتتىق. مۇندا 1500 بيە ۇزدىكسىز, ارقايسىسى 2 مينۋتتان ساۋىلىپ تۇرادى. تاۋلىگىنە 2,5 توننا ءسۇت بەرەدى, جىلدىق مولشەرى 20 مىڭ تونناعا دەيىن جەتىپ وتىر. وعان ارنايى سۋبليماتسيالاۋ (قۇرعاتۋ) ءادىسىن جۇرگىزەمىز. سۋبليماتسيالاۋ كەزىندە بيە ءسۇتى مۇزداتىلادى دا بەلگىلى ءبىر ۋاقىتتان سوڭ بۋ كۇيىنە اينالىپ, وسىدان قۇرعاق ءونىم الىنادى. ءبىر كگ قۇرعاق سۇتتەن 10 ليتر ءسۇت شىعادى, − دەيدى تەحنولوگ باۋىرجان قاينازاروۆ.
− مۇندا بارلىعى 100 دەن اسا ادامدى جۇمىسپەن قامتىپ وتىرمىز. جۇمىسشىلارعا ايىنا 70 مىڭ جالاقى تولەيمىز, جاتار ورنى مەن تاماعى تەگىن. سونداي-اق ءوزىمىزدىڭ جايىلىمدىق جەرلەرىمىزگە ەگىن ەگىپ, جىلقىلارعا تازا تابيعي ونىمنەن جەم ءشوبىن دايىندايمىز. قازاقستاندا جاسالعان ءونىمدى جاقىن ارادا قىتايعا ەكسپورتتاۋدى جوسپارلاپ وتىرمىز, − دەيدى «ەۆرازيا ينۆەست ltd» ديرەكتوردىڭ ورىنباسارى عالىمجان مەيرامبەكوۆ.
− بيەنىڭ ساۋمالى ادامنىڭ اسقازان ىشەك جولدارى, گاستريت سىندى اۋرۋلارمەن قاتار تۋبەركۋلەزگە تاپتىرمايتىن ەم. ساۋمال تەز ءسىڭىرىلىپ تەز قورىتىلادى. ءتىپتى انا ءسۇتىنىڭ ورنىنا دا وسى ساۋمالدى پايدالانۋعا بولادى. مەن ءوز باسىمنان وسىنداي جاعدايدى وتكىزدىم. اناسى جۇمىسقا شىعۋىنا بايلانىستى ءتورت ايلىق نارەستەگە كۇنىنە 200 گرامنان وسى قۇرعاق ءونىمدى سۋعا ەزىپ, بەرىپ وتىردىم. بالا توق, ءىش قاتۋ, اللەرگيا سياقتى اۋرۋلاردان ادا بولدى. بۇل ساۋمالدىڭ قۇنارلىعىن كورسەتەدى دەپ ويلايمىن, − دەيدى ءبىرىنشى قالالىق اۋرۋحانانىڭ پەدياترى ەلميرا ورازاليەۆا.
مەملەكەتتىڭ قارجىلىق قولداۋىنىڭ ارقاسىندا 2 ملرد تەڭگەگە سالىنعان زاۋىت بۇگىندە نارىققا ءوز ونىمدەرىن شىعارىپ ساتا باستادى. دەگەنمەن ساپالى ءونىمنىڭ باعاسى دا جوعارى − 1 كگ − 60 مىڭ , 500 گرامى − 30 مىڭ تەڭگە. حالىقتىڭ ءال قۋاتىن ارتتىراتىن, تابيعي تازا ونىمگە دەگەن سۇرانىس جىلدان جىلعا ارتا تۇسەدى دەگەن سەنىمدەمىز.
ايمان مۇقىشەۆا
«ەگەمەن قازاقستان»
