ماسكەۋدىڭ پلەحانوۆ اتىنداعى بيزنەس-ينكۋباتورى ينستيتۋتىنىڭ ديرەكتورى رۋسلان مامەدوۆتىڭ ايتۋىنشا ءوڭىر جاستارى بيزنەسكە وتە جاقىن.
«وسىنداي فورۋمدار وتكىزۋ وتە قاجەت, ءارى وتە پايدالى. فورۋم ماقساتى – جاستارعا ءوز يدەيالارىن جۇزەگە اسىرىپ, ونى دامىتۋعا جانە قارجىلاي قولداۋ تابۋعا كومەك بەرەدى. ۋنيۆەرسيتەتتەگى ستارتاپ اكادەميادا ستۋدەنتتىڭ ءبىلىمىن جەتىلدىرۋگە بارلىق جاعداي جاسالعان. ءتىپتى, كاسىپكەرلىك بىلىمدەرى بار. سوندىقتان, فورۋم پاۆلودار مەن ماسكەۋ اراسىنداعى تاجىربيە سياقتى, ۇيرەنەر كوپ», دەدى رۋسلان مامەدوۆ.
جاستار فورۋمى بيىل «جاستار جانە بيزنەستىڭ ديالوگى» فورماتىندا ءوتتى. فورۋمعا ەلىمىزدىڭ وڭىرلەرىنەن, سونداي-اق, رەسەي, قىتاي, موڭعوليا, قىرعىز ەلدەرىنەن بارلىعى 200-دەي دەلەگات كەلدى. وسىمەن 7-ءشى رەت ءوتىپ وتىرعان حالىقارالىق جاستار فورۋمىنىڭ نەگىزگى ماقساتى – بىرلىك, مادەني-رۋحاني جانە ينتەگراتسيالىق بايلانىستاردى نىعايتۋ. فورۋمدى وبلىس اكىمدىگى, اسسامبلەيانىڭ جەرگىلىكتى فيليالى, جاستار ساياساتى ماسەلەلەرى جونىندەگى باسقارما ۇيىمداستىردى. بيىلعى جىلعى فورۋمدا جاستار اراسىنداعى ديپلوماتيالىق, ەتنوسارالىق بايلانىس جانە تۇراقتىلىق پەن كاسىپكەرلىكتى دامىتۋ سياقتى ماسەلەر توڭىرەگىندە وي قوزعالدى. ويتكەنى, قازىر جاستاردى بيزنەس سالاسى قاتتى قىزىقتىرادى.
جيىنعا قاتىسۋشىلارعا ستۋدەنتتەر ۇيىمداستىرىپ, «بيزنەس-ستارتاپ جوبالارىن» ۇسىندى. جاستاردىڭ بيزنەس-ستارتاپ جوبالارى ۇسىنىلعان كورمەدە ستۋدەنتتەر مەن جاس بيزنەسمەندەر, وقۋشىلار يننوۆاتسيالىق يدەيالارىن تانىستىردى. مەكتەپ وقۋشىسى سوفيا كلوچكوۆا «اقىلدى روزەتكا» جاساپ شىعاردى. قۇرىلعى ۇيدە توقتان اجىراتۋعا ۇمىتىپ كەتكەن قۇرالداردى ۇيالى تەلەفون ارقىلى قاشىقتان سوندىرۋگە مۇمكىندىك بەرەدى.
سونىمەن قاتار, كورمە قوناقتارىن بار-جوعى 90 سەكۋند ىشىندە رۋبيك كۋبيگىن جينايتىن روبوت تاڭقالدىردى. بۇل يدەيا اۆتورلارى IT-HOUSE يننوۆاتسيالىق ءبىلىم بەرۋ ورتالىعىندا وقيتىن 4 سىنىپ وقۋشىلارى ءالىم باقىتجانوۆ پەن نۇرداۋلەت تويجان. ال جاس كاسىپكەر ءاليا قونىسباەۆا بولسا, Tafella دەگەن جوباسى ارقىلى ءتاتتى تالقان, جاڭعاق قوسىلعان جەنتىنەن ءدام تاتتىردى. ءاليا ۇلتتىق ءتاتتى ونىمدەرىن شەتەلدەرگە اپارۋدى ارماندايدى.
ستارتاپ جوبالار بايقاۋىندا ۋنيۆەرسيتەتتىڭ ماگيسترانتى ءال-فارابي ۇزاق «KazAgroTrade ستارتاپ جوباسى StartUP battle بايقاۋىندا 1 ميلليون تەڭگە جەڭىپ الدى. بۇل جوبا اۋىل شارۋاشىلىعى سالاسىنداعى تاۋار وندىرۋشىلەردىڭ جۇمىسىن جەڭىلدەتۋگە ارنالعان.
فاريدا بىقاي,
«ەگەمەن قزقاستان»
