ءدۇيىم دۇنيەنىڭ نازارىن اۋدارىپ وتىرعان كورمەگە ەلىمىزدىڭ ءاربىر ايماعى دا وزىندىك ەرەكشەلىگىنە ساي مادەني-رۋحاني تۇرعىدان اتسالىسىپ وتىر. ال ۇلى جىبەك جولى بويىندا ورنالاسقان, ەكى مىڭ جىلدان استام تاريحى بار كونە تاراز شاھارى كەزىندە كەرۋەن توقتاعان, ساۋدا مەن ونەركاسىپ وركەندەگەن ولكەلەردىڭ ءبىرى بولعانى بەلگىلى. تاريحي تامىرى تەرەڭ تاراز شاھارى كونە ءۇردىستى قايتا جاڭعىرتىپ, ايتۋلى كورمەگە كەرۋەن اتتاندىردى.
بۇگىن تاراز قالاسىنداعى «كونە تاراز» تاريحي-مادەني ورتالىعىنداعى جامبىل جاباەۆ ەسكەرتكىشى الاڭىنان « ۇلى جىبەك جولى. كونە تارازدان اسقاق استاناعا تارتۋ» اتتى كەرۋەن سالتاناتتى تۇردە استانا قالاسىنا جول تارتتى. كورمەگە بارار كەرۋەندى وبلىس اكىمى كارىم كوكىرەكباەۆ باستاعان جامبىلدىقتار شىعارىپ سالدى.
ەكسپو-2017 حالىقارالىق مامانداندىرىلعان كورمەسى اياسىندا ۇيىمداستىرىلعان كەرۋەن قۇرامىندا 20 تۇيە, 46 ات, 6 ات اربا, 10 جۇك اۆتوكولىگى, 3 اۆتوبۋس, ۇيىمداستىرۋشىلار, ىشكى ىستەر, جەدەل جاردەم, توتەنشە جاعداي سالالارىنىڭ قىزمەتكەرلەرى قامتىلعان 6 قىزمەتتىك اۆتوكولىك بار. سونداي-اق, جيىنى 150 ادام اتالعان كەرۋەنمەن بىرگە جولعا شىقتى.
جوسپار بويىنشا, كەرۋەن استانا قالاسىنا جەتكەنشە جامبىل جانە قاراعاندى وبلىستارىنداعى جول بويىندا ورنالاسقان 10 ەلدى مەكەنگە توقتايدى. ءاربىر توقتايتىن جەردە ەكسپو-2017 كورمەسىن ناسيحاتتاۋعا باعىتتالعان ءىس-شارالار ۇيىمداستىرىلادى. سونداي-اق, كيىز ۇيلەر تىگىلىپ, قازاق حالقىنىڭ تۇرمىس-تىرشىلىگى, سالت-داستۇرلەرى ساحنالانادى جانە ۇلتتىق سپورت ويىندارى مەن كونتسەرتتىك باعدارلامالار وتكىزىلەتىن بولادى. ال تاراز جەرىنەن استاناعا جول تارتقان كەرۋەن بىرنەشە كۇن ءجۇرىپ وتىرىپ, ايتۋلى كورمە كەزەڭىندە ەلورداعا جەتەدى دەپ جوسپارلانعان.
سونىمەن قاتار, 26-30 شىلدە ارالىعىندا ەكسپو-2017 حالىقارالىق كورمەسى اياسىندا استانا قالاسىندا جامبىل وبلىسىنىڭ مادەنيەت كۇندەرى وتەدى. اۋەلى اۋليەاتالىقتار ەكسپو اۋماعىنداعى «امفيتەاتردا» مادەني-كوپشىلىك ءىس-شارالارىن وتكىزسە, كەيىنگى كۇندەرى «قازانات» قالالىق يپپودرومىنىڭ اۋماعىندا سالىناتىن «ەتنواۋىلدا» ءىس-شارالار ۇيىمداستىرادى. مۇندا كۇنى بويى شەبەرلەر اۋىلى, شەبەرلەردىڭ تۋىندىلارىن ساتۋعا ارنالعان «شىعىس بازارى» ورىن السا, تەاترلاندىرىلعان قويىلىمدار, كونتسەرتتەر مەن ۇلتتىق سپورت ويىندارى وتەدى.
ۇلى جىبەك جولى تۋرالى دەرەكتەر قىتاي عالىمدارىنان باستاپ ايگىلى وقىمىستىلاردىڭ جازبالارىنان الەمگە بەلگىلى. ال كورمە اياسىندا شەتەلدىك قوناقتار ەجەلگى تاراز قالاسىنىڭ تاريحىمەن تانىسىپ قانا قويماي, ارنايى ۇيىمداستىرىلعان « ۇلى جىبەك جولى. كونە تارازدان اسقاق استاناعا تارتۋ» اتتى كەرۋەنگە دە كۋا بولا الادى.
حاميت ەسامان,
«ەگەمەن قازاقستان»
جامبىل وبلىسى
