سالتاناتتى شارا ك.ستانيسلاۆسكي اتىنداعى ورىس دراما تەاترىنىڭ ساحناسىندا ءوتتى. جالپى سوماسى 5 ملن تەڭگەنى قۇرايتىن وبلىس اكىمىنىڭ سىيلىعى 22 نوميناتسيا بويىنشا تابىستالدى.
«مەن بۇگىن مىنا زالدا جاساعان ەڭبەكتەرى زور ءارى باعا جەتپەس تانىمال ارتىستەردى, اتاقتى سۋرەتشىلەردى جانە رەجيسسەرلەردى, مادەنيەت قىزمەتكەرلەرىن كورىپ وتىرمىن. ءبىزدىڭ سارىارقامىز عاسىرلار بويى ءوز دارىندىلارىمەن ايگىلى. قاراعاندى – ەلىمىزدىڭ مادەني ورتالىقتارىنىڭ ءبىرى. ءبىزدىڭ ماقتان تۇتار تۇستارىمىز جەتەرلىك. قاراعاندىلىق ارتىستەر الەم ساحنالارىندا ونەر كورسەتەدى, جەرگىلىكتى تەاترلارىمىزدىڭ زالدارى كورەرمەنگە تولى. ءبىزدىڭ كىتاپحانالارىمىز بەن مۇراجايلارىمىز ۇلگىلى بولارلىقتاي», دەدى وبلىس اكىمى ەرلان قوشانوۆ.
مادەنيەت جانە ونەر قىزمەتكەرلەرىن ماراپاتتاۋ سالتاناتى كەرەمەت كونتسەرت تۇرىندە ءوتتى. ۇمىتكەرلەر ىشىنەن كوميسسيا مۇشەلەرى ەڭ ۇزدىك دەگەندەرىن ىرىكتەپ شىعارعان. ولاردىڭ ارقايسىسى وبلىس اكىمىنىڭ ەكى ءجۇز مىڭ تەڭگە كولەمىندەگى سىيلىعىنىڭ لاۋرەاتى اتاندى.
ال ەڭ نەگىزگى «ماماندىعىنا ادالدىعى ءۇشىن» اتتى نوميناتسيا بويىنشا 500 مىڭ تەڭگە كولەمىندەگى ارنايى سىيلىق – قازاقستاننىڭ ەڭبەك سىڭىرگەن ءارتىسى, س.سەيفۋللين اتىنداعى قاراعاندى وبلىستىق قازاق دراما تەاترىنىڭ جەتەكشى ءارتىسى قايرات كەمالوۆقا تابىس ەتىلدى.
ميراس اسان,
«ەگەمەن قازاقستان»
سۋرەتتەردى تۇسىرگەن د.كۋزميچەۆ
