قازىرگى تاڭدا جاستار اراسىندا شەتەلدىڭ داڭعارا مۋزىكاسى سانگە اينالعان. ءمان-ماعىناسى جوق جاتتاندى جاۋىر اندەر جاۋلاپ العانداي. وسى ورايدا اۆتور اقان سەرى مەن ءبىرجان اندەرىن, كومپوزيتور ءا.بەيسەۋوۆ پەن ن.تىلەنديەۆ سىندى ءبىرتۋار تۇلعالاردىڭ ماڭگى ولمەس شىعارماسىنان جاڭاشا ستيلدە تۇرلەنگەن تۋىندىنى پاش ەتتى. تاقىرىپتىڭ دا «ەگەر دە مەن...» دەپ اتالۋىندا ءبىر سىر جاتقانداي. ەگەر دە مەن قۇس بولسام كوكتە قالىقتار ەدىم, سۋ بولسام تەڭىز بولىپ تولقيتىن ەدىم دەپ ءار ادام ءوزىنىڭ ىشكى ويىنان بەلگىلى ءبىر جاۋاپ ىزدەيدى. سول سانسىز ساۋالعا جاۋاپ ىزدەۋ ارقىلى ادام ءوزىنىڭ «مەنىن» ىزدەيدى, كوڭىل تۇكپىرىندەگى ىزگىلىككە تولى جولىن قاراستىرادى.
دەكوراتسيا مەن جارىقتىڭ بەرىلۋى, اكتەرلاردىڭ حالىق اسپاپتارى دومبىرا, سىرناي, گيتارامەن شىرقالتا ءان سالۋى ساحنانىڭ ءسانىن اشا تۇسكەندەي.
«بۇل سپەكتاكل باسقالاردان وزگەرەك. مۇندا ادامنىڭ ءان ارقىلى بۇكىل عۇمىرى كوز الدىنان ءوتىپ جاتادى. ءبىر ءان ءبىر شىعارما عوي. كىشكەنتاي عانا ءبىر شۋماقتا كومپوزيتور مەن اقىن بۇكىل ءومىردىڭ ءمانىن ۇعىندىرادى, – دەيدى قازاقستاننىڭ ەڭبەك سىڭىرگەن قايراتكەرى, قويۋشى رەجيسسەر ن.جاقىپباي. – وسىدان ءتورت-بەس جىل بۇرىن قىرعىز دراماتۋرگى سۇلتان ارايوۆ ماعان ءوزىنىڭ «مەككەگە قاراي ۇزاق جول» اتتى شىعارماسىن بەردى. بۇل 2010 جىلى الەمدىك BBC ارناسىندا ۇزدىك شىعارما دەپ ەسەپتەلگەن بولاتىن. مەن ونى ءتارجىمالاپ, سونىڭ ءار جەرىنەن وسى سپەكتاكلگە كىرگىزدىم. بۇل سوزدەر مىندەتتى تۇردە كورەرمەنگە قايتالانىپ تۇرۋ كەرەك دەپ ويلايمىن. قاي ونەر سالاسى بولسىن, ادامدى تاڭعالدىرا ءبىلۋ كەرەك. ونەردىڭ قۇندىلىعى دا سوندا. ادامنىڭ جانىن تەبىرەنتەتىن ەموتسيالىق قويىلىم ۇسىندىق دەگەن ويدامىن».
ايمان مۇقىشەۆا,
«ەگەمەن قازاقستان».
