فورۋمنىڭ ەكىنشى كۇنى «مادەني كوممۋنيكاتسيالار: بيزنەستىڭ مادەنيەتى قوعام احۋالىنا اسەر ەتە مە؟ مادەنيەت ارقىلى بەدەل مەن برەندتى كوتەرۋ» اتتى پلەنارلىق ماجىلىستەن باستاۋ الدى. كوتەرىلگەن تاقىرىپقا ARTيشوك تەاترى ۇسىنعان ارت-پەرفومانستار قىزىقتى سەرپىن بەردى.
بۇگىن الەمدىك تاجىريبەگە سۇيەنە وتىرىپ, ىشكى كورپوراتيۆتىك قاتىناستار مەن كومپانياعا دەگەن نيەتى جاقسى اۋديتوريانى مادەني جانە شىعارمالىق جوبالاردى قولداۋ ارقىلى تاپقان قازاقستاندىق كەيستەر ۇسىنىلدى. سول سياقتى «كومپانيالار نەگە مادەني جوبالارعا قولداۋ كورسەتۋ كەرەك؟», «مۇنىڭ كومپانيالاردىڭ بەدەلىن كوتەرۋگە تيگىزەتىن پايداسى قانداي؟» دەگەن ساۋالدار قويىلىپ, جولى بولعان توسىن باستامالار فورۋمعا قاتىسۋشىلاردىڭ نازارىنا ۇسىنىلدى.
قوعامنىڭ ءومىرى مەن ساناسى مادەنيەت سالاسىنىڭ تامىرلارىندا بۇلكىلدەپ جاتاتىنى بەلگىلى. سوندىقتان مادەني ساياساتتى سانالى تۇردە جۇرگىزۋ كەز كەلگەن مەملەكەت ءۇشىن اسا ماڭىزدى.
ماسەلەن, ەۋروپادا مادەنيەت الميساقتان ۇلكەن يندۋستريا ساناتىندا. ەۋرووداقتىڭ 8,3 ميلليون ازاماتى وسى سالادان نانىن تاۋىپ جەپ وتىر.
British Council مادەني جانە ونەر جوبالارىنىڭ جەتەكشىسى گالينا كورەتسكايا بىزدە مادەنيەت پەن اقشا تابۋ دەگەن تۇسىنىك قابىسپايدى دەپ ەسەپتەيدى. كوبىنەسە مادەنيەت رۋحاني قۇندىلىقتار تۇرعىسىنان عانا قاراستىرىلادى.
وسىعان قاراماستان مادەنيەت – ادامعا سالىناتىن كاپيتال ەكەنى ءسوز بولدى. سپيكەردىڭ ويىنشا بىزگە ءوزىمىزدىڭ, ياعني قازاقستاننىڭ مادەني ەكونوميكاسىنىڭ مودەلىن دامىتۋدىڭ كەزى جەتتى.
سپيكەرلەردىڭ ءبىرى – «سبەربانكتىڭ» ماركەتينگ پەن كوممۋنيكاتسيالاردى باسقارۋ جونىندەگى ديرەكتورى ولەگجان بەكەتاەۆتىڭ دا مىسالدارى قىزىقتى بولدى. بانكتىڭ مادەنيەتتى قولداۋدىڭ باتىستىق ۇلگىلەرىن كوشىرمەي-اق, ونى وسى ورتاعا بەيىمدەلۋ ارقىلى جۇرگىزگەن جۇمىستارى جەرگىلىكتى كليەنتتەردىڭ سەنىمىنە يە بولۋعا سەپتەسكەن. ولەگجاننىڭ ويىنشا, مادەني جوبالاردىڭ ءبارى بىردەي كوپ قاراجاتتى كەرەك ەتپەيدى. كەيدە دۇرىس باعىتتالعان ازداعان ينۆەستيتسيانىڭ ءوزى ۇلكەن تابىس اكەلىپ, جۇرتتىڭ نازارىن اۋدارا الادى.
ال Tengri FM راديوسىنىڭ ديرەكتورى جانە The Spirit of Tengri فەستيۆالىنىڭ ۇيىمداستىرۋشىسى مادينا ۋموربەكوۆا شىعارماشىلىق ادامدارى ءبىر مەزەتتە ءارى بيزنەسمەن ءارى ونەرپاز بولا المايتىندىعىن, سوندىقتان مادەنيەت سالاسى ىسكەر ورتا مەن مەملەكەت قولداۋىنسىز جەكە-دارا دامي المايتىندىعىن ايتادى.
سونىمەن قازاقستانداعى PR كۇندەر اياسىندا ءوتىپ جاتقان فورۋم قاتار سەكتسيالاردىڭ جۇمىسىنا ۇلاستى. «جۇرتتىڭ كوز الدىندا جۇرگەن تۇلعالاردىڭ ءيميدجىن جاساۋ», «جاقسى پيارشى دەگەن برەندتىڭ بايراعىن كوتەرەمىن دەپ بەلدى ءۇزىپ الماۋدىڭ جولى قانداي؟», «قازاقستان مەن رەسەيدە ۆيرۋستىق كونتەنتتى جاساۋ جانە ونى تاراتۋعا ارنالعان تەحنولوگيالار» تاقىرىپتارىنداعى شەبەرلىك دارىستەرى مەن پىكىرتالاستار پيارشىلاردىڭ مۇددەلىلىگىن تۋعىزدى.
ايناش ەسالي,
«ەگەمەن قازاقستان».
الماتى
