سىرتقى ساياسات ۆەدومستۆوسىنىڭ الدىندا بۇگىنگى تاڭدا ەكونوميكالىق ديپلوماتيانى قايتا پىشىمدەۋ مەن جانداندىرۋ, ينۆەستيتسيا تارتۋ جانە ەكسپورتتى ىلگەرىلەتۋگە جان-جاقتى جاردەم كورسەتۋ, حالىقارالىق ىنتىماقتاستىق شەڭبەرىندە ۇلتتىق ەكونوميكالىق مۇددەلەردى قورعاۋ, سونىمەن قاتار, ەكسپو-2017 حالىقارالىق كورمەسىنىڭ ينفراقۇرىلىمى بازاسىندا استانانىڭ حالىقارالىق ينۆەستيتسيالار تارتۋ ورتالىعىنا اينالۋىنا ىقپال ەتۋ, «IT», «ستارتاپ» حالىقارالىق باعدارلامالارىنىڭ ىسكە اسۋىنا جاعداي تۋعىزۋ سياقتى مىندەتتەر تۇر, دەدى مينيستر.
وسى ورايدا, «استانا» حالىقارالىق قارجى ورتالىعىنىڭ (احقو) قىزمەتكەرلەرىنە قازاقستاننىڭ بارلىق ەلشىلىكتەرىندە جاردەم جاسالاتىندىعى, ينۆەستيتسيالار جونىندەگى ارنايى مامان دا قىزمەت ەتەتىنى اتالدى. شەتەلدىك ينۆەستورلارعا ءبىر تەرەزەلىك جەڭىلدىكپەن اقپارات بەرۋ ماقساتىندا ءسىم مەن احقو اراسىندا بىرلەسكەن توپ قۇرىلىپ, ول «جول كارتاسىن» دا ازىرلەگەن ەكەن. وسىلاي ءبىز احقو-نىڭ جۇمىسىنا كۇندەلىكتى كومەك بەرىپ وتىرامىز, دەدى ول.
كوپتەگەن مينيسترلىكتەر مەن ۆەدومستۆولاردىڭ قاتىسۋىمەن ازىرلەنگەن ۇلتتىق ينۆەستيتسيالىق ستراتەگيانى ىسكە اسىرۋ ماقساتى باسىمدىققا يە ەكەندىگى دە اتالىپ ءوتتى. جوعارى دامىعان ەلدەردىڭ ۇزدىك ستاندارتتارى مەن تاجىريبەلەرىن ەنگىزە وتىرىپ, بيزنەستى قايتا رەتتەۋ بويىنشا جۇيەلى جۇمىستار جۇرگىزۋ مىندەتتەرى دە الدا تۇر, دەپ جالعاستىردى مينيستر ءوزىنىڭ ءسوزىن.
سونىمەن بىرگە, مينيستر مەملەكەت باسشىسىنىڭ حالىقارالىق قىزمەتى دە ەكونوميكالىق ديپلوماتيانى دامىتۋعا جاعداي تۋعىزاتىنىن اتاپ ءوتتى. ال قحر-مەن ساۋدا-ەكونوميكالىق ىنتىماقتاستىق تۋرالى كەلىسىم ازىرلەنىپ جاتىر, ۇندىستانمەن, سەربيامەن كەلىسسوزدەر باستالدى, يزرايل, سينگاپۋر, مىسىر جانە يرانمەن ەركىن ساۋدا ايماقتارى تۋرالى كەلىسىم جاسالۋدا. ەاەو-مەن سەرىكتەستىككە وڭتۇستىك كورەيا مەن وڭتۇستىك امەريكانىڭ كەيبىر ەلدەرى, ونىڭ ىشىندە چيلي جانە باسقالارى قىزىعۋشىلىق تانىتۋدا, دەدى ق.ءابدىراحمانوۆ.
بيىل ءۇشىنشى ەلدەرمەن, ينتەگراتسيالىق بىرلەستىكتەرمەن جانە حالىقارالىق ۇيىمدارمەن ەاەو حالىقارالىق كەلىسىمشارتتار تۋرالى كەلىسىم بويىنشا جۇمىستى اياقتاۋ جوسپارلانعان. 2018 جىلدىڭ باسىنان باستاپ كەدەندىك راسىمدەردى جەڭىلدەتۋگە جانە اۆتوماتتاندىرۋعا, قاتىسۋشى ەلدەردىڭ ازاماتتارى مەن كاسىپكەرلەرىنە قولايلى جاعداي جاساۋعا باعىتتالعان ەاەو-نىڭ جاڭا كەدەن كودەكسى كۇشىنە ەنەدى.
سونىمەن بىرگە, 2016 جىلى مەملەكەت باسشىسىنىڭ يرانعا ساپارى بارىسىندا جالپى قۇنى 1,4 ملرد دوللار بولاتىن 48 كەلىسىمگە, تۇركياعا ساپارى بارىسىندا 520 ملن دوللارلىق 20 قۇجاتقا, ساۋد ارابياسىنا ساپارى بارىسىندا 200 ملن سوماسىنداعى 10 كەلىسىمگە, جاپونياعا ساپارى بارىسىندا 1,2 ملرد-تىق 13 قۇجاتقا, وڭتۇستىك كورەياعا ساپارى بارىسىندا 640 ملن دوللارلىق 24 كەلىسىمگە قول قويىلعانى ايتىلدى. ال بىرىككەن اراب امىرلىكتەرىنە ساپارى بارىسىندا 6,3 ملرد دوللار سوماسىنداعى بىرلەسكەن ينۆەستيتسيالىق جوبالاردى جۇزەگە اسىرۋ تۋرالى كەلىسىمدەرگە قول جەتكىزىلگەن بولاتىن.
ودان ءارى مينيستر ەلباسى ن.نازارباەۆتىڭ «بولاشاققا باعدار: رۋحاني جاڭعىرۋ» ماقالاسىنداعى تالاپتاردى ورىنداۋعا دا سىرتقى ىستەر مينيسترلىگى كىرىسىپ كەتكەنىن جەتكىزدى. وسىناۋ باعدارلامانى شەتەل جۇرتشىلىعىنا ءتۇسىندىرۋ بويىنشا جۇيەلى جۇمىستار جۇرگىزىلۋدە. الەمدىك ساراپشىلار, ونەرتانۋشىلار, ادەبيەتشىلەر مەن مادەنيەت قايراتكەرلەرى اراسىندا بۇل ماقالاعا دەگەن قىزىعۋشىلىق ايقىن كورىنۋدە. قازىرگى زامانعى قازاقستاندىق مادەنيەت جوباسىن ىسكە اسىرۋ ءبىزدىڭ مينيسترلىكتىڭ الدىنداعى حالىقارالىق اۋقىمداعى ءىرى مىندەت بولىپ وتىر. مەملەكەت باسشىسى اتاپ كورسەتكەندەي, ءوز زامانداستارىمىزدىڭ اراسىنان شىققان جەكە دارىنداردىڭ ارقاسىندا ومىرگە كەلگەن ادەبيەتتەگى, ونىڭ دراماتۋرگيا جانرىنداعى, وپەرا, بالەت, كينو, بەينەلەۋ ونەرى سالاسىنداعى ماڭىزدى ەڭبەكتەردى تانىمال ەتۋگە كۇش جۇمىلدىرامىز, دەدى قايرات قۇدايبەرگەن ۇلى.
ءمينيستردىڭ سوزىندە شەتەلدىك ديپلوماتيالىق كورپۋس وكىلدەرىنىڭ شەكارا توڭىرەگىندەگى ساۋدا-ەكونوميكالىق ارىپتەستىكتى دامىتۋ ماقساتىندا ايماقتار باسشىلارىمەن جانە ماماندارىمەن كەزدەسۋلەرى ۇيىمداستىرىلعانى دا ايتىلدى.
جاقسىباي سامرات,
«ەگەمەن قازاقستان»
