ەلدىك ءسوزدىڭ ەڭبەكتورىسى ەكەن-اۋ...

ارداگەر جۋرناليست ورىنباي تاسىبەكوۆتىڭ “مەنىڭ زامانداستارىم” اتتى جاڭا شىققان كىتابىن ارىپتەستىك قىزىعۋشىلىقپەن قولعا العانبىز. اۋەلى جامبىل وبلىستىق “ەڭبەك تۋى” گازەتىنىڭ قازانىندا شىڭدالعان, ودان سوڭ ۇزاق ۋاقىت اۋداندىق گازەتتەردە رەداكتور بولىپ قىزمەت ەتكەن, ءبىر اۋىق رەسپۋب­لي­كالىق “قاينار” باسپاسى مەن “قازاقستان كوممۋنيسى” جۋرنالىندا دا قالام قايراتىن تانىتقان اۆتوردىڭ ورەلى ءومىر جولىنان, باسپاسوزدەگى شىعارماشىلىقتىڭ قيلى دا قيىن سوقپاقتارىنان وتكەنى اڭعارىلادى. كىتاپقا اۆتوردىڭ ءار جىلدارى جازعان شۇرايلى ماقالالارى, وچەرك­تەرى مەن پۋبليتسيس­تي­كالىق تول­عا­نىس­تارى توپ­تاس­تى­رىل­عان ەكەن. سو­لار­دى وقي وتى­­رىپ, ورە­كەڭ­­نىڭ قازاق جۋر­نا­ليس­تيكاسىنا تو­لايىم ادالدىعىن ەلجىرەي سەزىنەسىز. كى­تاپتىڭ اتى اي­تىپ تۇرعان­داي, ءۇل­كەن-كىشىمىز­گە ءبىر­دەي ور­تاق زا­مانداس­تارى­مىزدىڭ قيلى-قيلى ءومىر وتكەل­دەرىن كوز­ايىم­­داپ, الۋان-الۋان قىزىق تاع­دىر­­لاردىڭ كۋاسى بولا­سىز. ولاردىڭ ءار­قايسىسى وزىندىك مىنەز-ق ۇلىق­تارى­مەن, ءىس-ارەكەتىمەن, قينا­لىس-تولعانى­سى­­مەن, قۋانىش-ءسۇيىنى­شىمەن ەستە قالادى. اۋداندىق گازەت – جۋرناليستيكانىڭ ەڭ ءبىر كۇردەلى بۋى­نى. بۇل بۋىننان قازاق ءباسپاسوزىنىڭ تالاي-تالاي تارلان قايراتكەرلەرى ءوسىپ شىققانىن بىلەمىز. ورىنباي ءابدىراحىم­ ۇلىنىڭ دا ناق وسى سالاداعى ەڭبەگىنىڭ ۇسىنار عيبراتى مولدىعى مىنا كىتاپتىڭ ءاربىر پاراعىنان پارىق­تالىپ تا, پايىمدالىپ تا تانىلعانداي. جيناققا ەپيگراف رەتىندە الىنعان ءابدىراحىم اكە وسيەتى دە كوڭىلىمىزدى ءبىر تولقىتىپ ءوتتى. “قازاقتا ەزۋىنەن ەنشى بەرگەن” دەگەن ءبىر جاقسى ءسوز بار. ەنشى وتاۋ بولعاندا اتا-اناڭنان العان مال-م ۇلىك, دۇنيە-پۇل ەمەس, ماڭ­دايىڭ­نان سيپاعان جىلى الاقان, بايگەگە تۇسكەندە قيقۋ سالعان دەمەۋ, تورىققاندا اۋزىڭا تامىزىلعان ءبىر جۇتىم سۋ. سونى جاساعان ادامداردى كوزىڭ جۇمىلعانشا ۇمىت­پاي, قۇرمەت تۇت, بالام” – دەگەن وسىناۋ اكە وسيەتىنە دە قالامگەر پەرزەنت ادالدىعىنان جازباپتى. سەبەبى, ونىڭ ءاربىر تولعانىسىندا ادامدارعا دەگەن شەكسىز قۇرمەت پەن ءىلتيپات, تۋعان جەرگە دەگەن مەيىرلى سۇيىسپەنشىلىك پەن ىڭكار سەزىم تۇنىپ تۇرعانىن بايقار ەدىڭىز. شالىمدى جۋرناليست ساكەن سەيفۋلليننىڭ تار جول, تايعاق كەشكەن كەزەڭدەردە مويىنقۇم وڭىرىندە بولعاندىعى جايلى ادەمى وي تولعايدى. وسى اۋدانعا اڭشىلىققا كەلگەن كەزدەگى عابيت مۇسىرەپوۆتىڭ سىرباز مىنەزدەرىنەن سىر اۋلايدى. كەنەن اتاسىنان باتا العان ءساتىن بابىمەن بايانداپ ءبىر وتەدى. قازاقتىڭ كيەلى قارتتارىنىڭ ءبىرى جازىلبەك قۋا­نىش­باەۆ, مويىنقۇمنىڭ اردا ازاماتى ايتباي نازاربەكوۆ جايلى اعىنان اقتارىلعان رياسىز كوڭىلى قانداي. ورەكەڭ شىمىر تولعامدارىنىڭ ءبىر پاراسىن شتاتتان تىس ءتىلشىمىز رەتىندە “ەگەمەننىڭ” بەتىندە دە جاريالاعان. ول بىردە پاريجگە بارعان ساپارىن تامساندىرا اڭگىمەلەسە, ەندى بىردە ءوز استانامىزدىڭ تورىندە تۇرىپ تەبىرەنەدى. بايتاق سارىارقاداعى قۋلى, مۇڭلى تاۋلارىنىڭ جان تەربەتەر جۇمباعىنا بويلاتادى. ءسويتىپ, وقىرمانىن ويلانتادى. جالپى, جۋرناليست جازبالارىنا پاراساتتىلىق پەن پايىمدىلىق ءتان. سوعان وراي ءبىز دە ورىنباي تاسىبەكوۆ تۋرالى “ەلدىك ءسوزدىڭ ەڭبەكتورىسى ەكەن-اۋ” دەگەن پىكىرىمىزدى ءتاستۇيىن بەكىتە تۇستىك. قورعانبەك امانجول.