گازەتىمىزدىڭ تىلشىلەر قوسىنىنا قول جەتكىزگەن جەڭىسىمەن قاناتتانعان تالدىقورعاندىق جاس سپورتشى جۇماعالي بەكشە حابارلاستى. جەتكىنشەكتىڭ اجە-اتاسىنىڭ قۋانىشىندا دا شەك جوق. “شاڭىراق” شاعىن اۋدانىنداعى سپورتتا دارىندى بالالارعا ارنالعان مەكتەپ-ينتەرناتىندا سۋدا ءجۇزۋ سپورتىمەن 2006 جىلدان بەرى جاتتىعىپ جۇرگەن جاستىڭ بۇگىنگى جەتىستىگى ايتارلىقتاي. ول جۇزۋدەن ەلىمىزدەگى جاستار مەن جاسوسپىرىمدەر اراسىندا چەمپيون رەكوردشى بولسا, توكيودا وتكەن ازيا چەمپيوناتىندا دا جاقسى ناتيجەلەرگە قول جەتكىزگەن. ج.بەكشە جەلتوقسان ايىندا ەكاتەرينبۋرگ قالاسىندا وتكەن حالىقارالىق جارىستا ەرەسەكتەر اراسىندا 200 جانە 400 مەتر قاشىقتىققا ءجۇزىپ, 2 التىن, 1 قولا جۇلدەگە قول جەتكىزىپتى. بالعىن سپورتشى تەمىرتاۋدا, پاۆلوداردا, تارازدا وتكەن رەسپۋبليكالىق جارىستاردان دا جەڭىسپەن ورالعان. – كۇنشىعىس ەلىنىڭ استاناسى توكيودا وتكەن ازيا چەمپيوناتىنا قاتىسۋىما بىردەن-ءبىر سەبەپكەر ءارى ارمانىما قانات بىتىرگەن – وبلىس اكىمى سەرىك ۇمبەتوۆ اعانىڭ ىقىلاسى. دودالى باسەكەگە قاتىسۋعا ەكىنىڭ ءبىرىنىڭ قولى جەتە بەرمەيدى. وسىعان دەيىن كوپ كەدەرگىلەرگە كەزدەستىم. سونىڭ ءبىرى قارجى تاپشىلىعى. جولىم بولعاندا سالاماتتى ءومىر سالتى مەن سپورتتى سۇيەتىن, تالانتتى جاسقا سەنىم ارتاتىن جاننىڭ دەمەگەنىن ۇمىتپايمىن. ءۇمىتتى اقتاۋعا تالاپتاندىم. ەلىمنىڭ داڭقىن اسىرعان چەمپيوندارعا ەلىكتەدىم. ناتيجەسىندە جەڭىسپەن ورالىپ, ءۇش بىردەي قولا مەدالعا قولىم جەتتى. مەن ءۇشىن ول التىننان دا قىمبات. قازىر ءوزىمنىڭ نەگىزگى ەركىن ستيلمەن ءجۇزۋ قاشىقتىعىما جاتتىعۋدامىن. بۇل قاشىقتىقتا 1980 جىلدان بەرى جاسوسپىرىمدەر اراسىندا حالىقارالىق رەكورد جاڭارتىلماپتى. ماقساتىم – سونى وزگەرتىپ, ەلىمنىڭ كوكبايراعىن جەلبىرەتۋ, وتانىما دەگەن پەرزەنتتىك پارىزىمدى وتەۋ, وزىمە جۇكتەلگەن سەنىم بيىگىنەن كورىنۋ, – دەيدى بالعىن سپورتشى. حالقىمىز: “مەرگەننىڭ كوزى دە مەرگەن, قولى دا مەرگەن” دەگەن عوي. ال, ونى دالەلدەپ, سۋدا بالىقشا جۇزگەن, قاناتى قاتايىپ, العاشقى جەڭىسىمەن جىگەرلەنگەن جۇماعالي بەكشە ەلباسىنىڭ جاستارعا ارتقان سەنىمىنەن شىعۋعا بار كۇش-جىگەرىن جۇمىلدىراتىنىن, جارىستاردا باسەكەلەستەرىنىڭ الدىڭعى شەبىندە بولاتىنىن دا سەنىممەن ايتتى. وسى ورايدا جانكۇيەرلەردىڭ تالاپتى جاسقا ساتتىلىك تىلەپ, ءاردايىم جارىستاردا تاۋىنىڭ شاعىلماۋىنا تىلەكتەس ەكەنىن دە ايتقانىمىز ءجون.
كۇمىسجان بايجان,
الماتى وبلىسى.
