جىلىمىق بوپ تۇرىپ, الدارقاتىپ سوققان ايازدى كۇندەر قۇربانسىز دا بولمادى. اياز جاڭا جىل مەيرامى كۇندەرى قايتالاپ سوقتى, 25-30 گرادۋس ايازعا دا ەت ۇيرەندى. وبلىس اكىمىنىڭ تىكەلەي باقىلاۋدا ۇستاۋىمەن وبلىستىڭ توتەنشە جاعدايلار جونىندەگى دەپارتامەنتى قىزمەتكەرلەرى, جول پوليتسەيلەرى تۇرعىنداردىڭ الىسقا جولاۋشى جۇرمەۋىن, كوممۋنالدىق قىزمەت سالاسى جولداردىڭ تازالىعىن قاداعالادى. اۋا رايىنىڭ سۋىتۋى قالالار مەن اۋىل-ايماقتاعى جۇرتشىلىقتىڭ الا جازداي جاساعان قىسقا دايىندىعىن سىناي كەلگەندەي ەكەن. رۋدنىي قالاسىندا 25 گرادۋس اياز بولىپ تۇرعاندا جىلۋ تاراتاتىن قۇبىر جارىلىپ, تاۋلىك بويى تۇرعىنداردى دا, كوممۋنالدىق قىزمەت سالاسىن دا ابىگەرگە سالدى. ابىروي بولعاندا, قۇبىر جولىنداعى اقاۋ جوندەلىپ, ۇيلەرگە جىلۋ بەرۋ قالىپتى جاعدايعا جەتكىزىلدى.
ال ليساكوۆ قالاسى كۇزدە جوندەلگەن قازاندىقتىڭ راحاتىن ايازدى كۇندەرى كوردى. بوران قالاي سوقسا دا قۇستىڭ ۇياسىنداي جيناقى قالاداعى جىلۋ قازاندىقتارى مەن قۇبىرلار ارقىلى ءار ۇيگە جەتكەن جىلۋ شاڭىراققا بەرەكە الىپ كىردى. ال قوستاناي قالاسى دا قىسقى شىلدەنىڭ ايازىن قالىپتى قارسى الدى. جەرگىلىكتى اۋا رايىن بولجاۋشىلاردىڭ باقىلاعانىنداي, سىناپ باعاناسى 25-30 گرادۋس ايازدى كورسەتىپ تۇردى. بىراق قالادا تۇرعىنداردى ابىگەرگە سالارداي ەشقانداي قولايسىز جاعداي ورىن العان جوق. پاتەرلەردە كۇندەلىكتى بەرىلەتىن جىلۋ ازايمادى. جاقسى جوندەۋ جۇمىستارى جۇرگىزىلگەن جەرلەردە اياز قۇبىردى قاتىرا المايدى. وبلىستىڭ باسقا اۋداندارى مەن ەلدى مەكەندەرىنەن دابىلدى اقپارات تۇسكەن جوق.
ال وبلىستىڭ وڭتۇستىگىندەگى اۋدانداردا قاڭتاردىڭ باسىنداعى 17 گرادۋسقا جەتكەن ايازدىڭ سوڭى جىلىنىپ, جاڭبىرعا اينالدى دەگەنگە كىم سەنەر! تورعاي وڭىرىندە قاڭتاردىڭ 4-ىنەن 5-ىنە قاراعان ءتۇنى جاڭبىر تىنباي جاۋدى, كۇندىز قار ەرىپ, جەر قارايىپ قالدى. قار جاۋسا دا, بوران تۇرسا دا, جاڭبىر جاۋسا دا ارقالىق قالاسى بىرقالىپتى قالپىنان تايعان جوق. ويتكەنى, كۇزدە قالا مازۋتىن ارتىعىمەن تاسىپ الىپ, جىلۋ قۇبىرىن جاماپ-جاسقاپ العان بولاتىن. ىرگەڭدى ەرتە قىمتاپ الماساڭ, ارقا قىسىنىڭ سالعان الەگى قانداي بولاتىنىن بۇل قالا باستان تالاي وتكەرگەن...
ءنازيرا جارىمبەتوۆا,
قوستاناي وبلىسى.
