– مەن 2012 جىلدان بەرى وسى اسكەري سالادا قىزمەت ەتىپ كەلە جاتىرمىن. بيىل كومانديرلەر ءبىزدى ىرىكتەپ, تالاپقا ساي كەلەدى دەگەن اسكەري قىزمەتشىلەردى وسى شەرۋگە قاتىستىراتىن بولدى. وسىنداي سەنىمگە يە بولعانداردىڭ ءبىرى – مەن بولامىن, − دەيدى ول. − شەرۋگە قاتىساتىنىمدى ەستىگەندە قۋانىشپەن قاتار, جاۋاپكەرشىلىكتى سەزىندىم. ميلليونداعان ادام تاماشالايتىن بۇل شەرۋگە قاتىسۋ زور مارتەبە دەپ بىلەمىن. شەرۋگە قاتىسۋدى ءاربىر سارباز ارماندايدى. مەن سوڭعى رەت ۇلى وتان سوعىسىنىڭ 70 جىلدىعىنا وراي وتكىزىلگەن شەرۋگە قاتىسىپپىن. ەندى, مىنە, بيىل ەكىنشى رەت قاتىسقالى وتىرمىن. ءبىزدىڭ ماقسات – شەرۋدى جۇرت ايتا جۇرەتىندەي زور ابىرويمەن وتكىزۋ. دايىندىق ويداعىداي وتۋدە. ءاربىر اسكەري ءبولىم وزدەرىنە تاپسىرىلعان مىندەتتەردى جوعارى دەڭگەيدە ورىنداپ جاتىر.
وسىنداي شەرۋ وتكىزۋ ارقىلى ءبىز بۇكىل الەمگە ەلىمىزدىڭ اسكەري قۋاتىن كورسەتە الامىز. بۇل – وتە ماڭىزدى. ساراپشىلار دۇنيە ءجۇزى مەملەكەتتەرى قارۋلى كۇشتەرىنىڭ رەيتينگىسىن جاسايتىن كەزدە مۇنداي شەرۋلەر وڭ اسەرىن تيگىزەدى.
سونداي-اق, جاس ۇرپاق اسكەري شەرۋدى كورىپ وسسە, ونىڭ بويىندا پاتريوتتىق ءھام ماقتانىش سەزىمى ويانادى. پاتريوت جاستار ەلى مەن جەرىنە قىزمەت ەتۋگە ارقاشان دايىن بولادى. جامان ايتپاي جاقسى جوق, ەگەر ەل باسىنا كۇن تۋا قالسا, وندا وسىنداي ازاماتتار ءبىرىنشى بولىپ قولدارىنا قارۋ الىپ, ەلىن, جەرىن جاۋدان قورعايتىن بولادى.
وتانشىل جاستار – ەل قورعانى. مەن ءالى ۇيلەنگەن جوقپىن. بولاشاقتا وتباسىن قۇرىپ جاتسام, ۇلىم دا مەن سەكىلدى اسكەري سالادا قىزمەت ىستەسە دەيمىن. بۇل – قىزىعى مەن شىجىعى مول سالا. مۇندا تەك ناعىز ەر ازاماتتار عانا قىزمەت ەتەدى. كەيدە شارشايمىن. دەگەنمەن, سوندايدا اتا-بابالارىمىز اق نايزانىڭ ۇشىمەن, اق بىلەكتىڭ كۇشىمەن قورعاپ قالعان قاسيەتتى دە كيەلى جەرىم ءۇشىن, وتانىم ءۇشىن تەر توگىپ جۇرگەنىمدى ويلاسام, جانىم جادىراپ سالا بەرەدى. شارشاعانىمدى ۇمىتىپ, ءوزىمدى سەرگەك سەزىنەمىن.
– وسى اسكەري سالادا قىزمەت ەتىپ كەلە جاتقانىڭىزعا 5 جىل تولىپتى. وسى ۋاقىت ارالىعىندا ءسىز قىزمەت ەتەتىن بولىمدە قانداي وزگەرىستەر بولدى؟
− ءيا, قىزمەتكە العاش كەلگەن جىلمەن قازىرگى كەزدى سالىستىرسام, اراسى جەر مەن كوكتەي ەكەن. مەن سىزگە ايتايىن, قازىرگى تاڭدا قازاقستاننىڭ قارۋلى كۇشتەرى زور قارقىنمەن دامۋدا. جىلدان-جىلعا ەمەس, ايدان-ايعا وركەندەپ كەلەدى دەسە بولادى. مەملەكەت باسشىسى قارۋلى كۇشتەرگە زور كوڭىل بولۋدە.
ءبىزدىڭ سالادا باسقارۋ جۇيەسى ناقتى جولعا قويىلعان. اسكەري بولىمدەر سۋ جاڭا قۇرال-جابدىقتارمەن, زاماناۋي قارۋ-جاراقتارمەن جابدىقتالىپ جاتىر. ساربازدارعا دا زور جاعداي جاسالعان. ولار الەۋمەتتىك ءماسەلەلەردى ويلاپ باستارى قاتپايدى. ءبىزدىڭ ەڭ باستى ماقساتىمىز – ەل قاۋىپسىزدىگىن قامتاماسىز ەتۋ. وسىعان وراي, ءبىزدىڭ ءبولىم كۇندىز-ءتۇنى كوز ىلمەي قازاق ەلىنىڭ كوك اسپانىن ءجىتى باقىلاپ وتىرادى. سەبەبى, ءبىزدىڭ جۇمىستا ءبىر ءسات بوساڭسۋعا بولمايدى. مۇنى وتە جاقسى تۇسىنەمىز.
– كەيدە «انا جاقتا سوعىس ءورتى تۇتانىپتى. مىنا جاقتا لاڭكەستىك ورىن الىپتى» دەگەن حابارلار ەستىلىپ قالىپ جاتادى... – مۇنداي جايسىز حابارلاردى ەستىگەندە جۇرەگىمىز اۋىرادى. سوعىس بولعان ەلدە تۇراقتىلىق جويىلادى. بۇل ەكونوميكانىڭ كۇيرەۋىنە اكەلىپ سوعادى. ەگەر دەرەۋ كەلىسسوزدەر جاسالماسا, سوعىس ءورتى ءورشىپ, سالدارىنان قانشاما بەيبىت تۇرعىن جازىقسىزدان جازىقسىز وققا ۇشىپ, جۇزدەگەن, مىڭداعان سارباز شەيىت بولىپ جاتادى. سوعىس دەگەن ۇلكەن تراگەديا.
قۇدايعا شۇكىر, ەلباسىنىڭ ساليقالى ساياساتىنىڭ ارقاسىندا ءبىزدىڭ ەلىمىزدە بەيبىتشىلىك تۋى جەلبىرەپ تۇر. ەل امان, جۇرت تىنىش. بىلە-بىلگەن ادامعا بۇدان ارتىق باقىت جوق. تەك قازاقستاندا ەمەس, بۇكىل الەمدە سوعىس بولماسىن دەپ تىلەيمىن!
اڭگىمەلەسكەن
عالىمجان ەلشىباي,
«ەگەمەن قازاقستان»
سۋرەتتە: نۇرلىبەك ءابۋوۆ
