بار جاقسىلىق وتباسىنان باستالادى

ەلورداداعى «Ramada Plaza» قونا­ق­ۇيىندە تاۋەلسىزدىكتىڭ 20 جىلدىعى مەن حالىقارالىق وتباسى كۇنىنە ارنالعان «بەرىك وتباسى – قوعامنىڭ تىرەگى» اتتى رەسپۋبليكالىق كونفەرەنتسيا ءوتتى. ەستەرىڭىزگە سالا كەتەلىك, حالىقارالىق وت­باسى كۇنى 1993 جىلى بىرىككەن ۇلتتار ۇيىمى باس اسسامبلەياسىنىڭ قارارىمەن 15 مامىر كۇنىنە بەكىتىلگەن ەدى. بۇل كۇندى بەلگىلەۋ الەم­دىك قاۋىمداستىقتا وتباسىنىڭ قازىرگى جاع­دايى مەن ونىڭ قوعام ومىرىندەگى ورنىنا, وسكە­لەڭ ۇرپاق تاربيەسىندەگى ماڭىزىنا الاڭداۋ­شى­لىق تۋعىزۋىنا وراي جۇزەگە اسقان بولاتىن. قازاقستان رەسپۋبليكاسىنىڭ پرەزيدەنتى جا­نىنداعى ايەلدەر ىستەرى جانە وتباسىلىق-دە­مو­گرافيالىق ساياسات جونىندەگى ۇلتتىق كوميسسيا قازاقستاننىڭ ىسكەر ايەلدەر قاۋىمداس­تىعى­مەن بىرلەسىپ, مادەنيەت مينيسترلىگىنىڭ قولداۋىمەن وتكىزىلگەن كونفەرەنتسيانىڭ جۇمىسى دا قوعامداعى وتباسى رولىنە ارنالدى. پرەزيدەنت جانىنداعى ايەلدەر ىستەرى مەن وتباسىلىق-دەموگرافيالىق ساياسات ءجونىن­دەگى ۇلتتىق كوميسسيانىڭ ءتورايىمى گۇلشارا ءابدى­حالىقوۆا كونفەرەنتسيانىڭ ماڭىزى جاي­لى ايتا كەلىپ: «بۇگىنگى كۇنى مەملەكەتتىك دەڭ­گەيدە ءىرى باعدارلامالار قولعا الىنۋدا. ونىڭ ىشىندە دەنساۋلىق, ءبىلىم سياقتى الەۋمەتتىك سالالار دا قامتىلعان. ول جوسپار­لاردى جۇزەگە اسىرۋ ءىسى وتباسىنان باستاۋ الا­تىنى اقيقات. وت­باسىنىڭ ءاربىر مۇشەسى وسىعان ەرەكشە ىقى­لاس بىلدىرسە جاقسى ناتيجەگە قول جەتكىزە الامىز. سوندىق­تان, كونفەرەنتسيانى وتكىزۋدەگى مىندەتىمىز – ەلىمىزدەگى وتباسى قۇندىلىقتارىن كوتەرۋ. اسىرەسە, ەڭبەككە دەگەن سۇيىسپەنشىلىكتى دامى­تىپ, ونى ودان ءارى جەتىلدىرۋ», – دەدى. كونفەرەنتسيا بارىسىندا «2006-2016 جىل­دارعا ارنالعان قازاقستان رەسپۋبليكاسىنىڭ گەن­دەرلىك تەڭدىگى» ستراتەگيالىق جوسپارى ايا­سىندا اتقارىلىپ جاتقان جۇمىستار تانىستى­رى­لىپ, وتباسى جاعدايىنداعى ماسەلەلەر ساراپقا سالىندى. كونفەرەنتسيادا ۇلتتىق كوميسسيا مۇشەلەرىنىڭ ۇسىنىستارى تىڭدالىپ, وتباسىن­داعى قۇندىلىقتار جايى دا نازاردان تىس قالمادى. تولىق وتباسىلار كوپ بولاتىن بولسا, باقىتتى انالار مەن باقىتتى بالالاردىڭ سانى ارتا تۇسەتىندىگى, ءاربىر انا بالاسىن ءۇش جاسقا دەيىن ۇيىندە وتىرىپ تاربيەلەسە, بالا­باقشا جايى سياقتى شەشىمىن تاپپاي جۇرگەن ماسەلەلەردىڭ  ازايا تۇسەتىندىگى ايتىلدى. اتالعان كونفەرەنتسياعا دەيىن ەلىمىزدىڭ بار­لىق وڭىرلەرىندەگى «انا مەن بالا» ورتالىق­تا­رىندا 20-عا جۋىق ساياباققا گۇل وتىرعىزىلىپ, اعاش ەگۋ ءىسى قولعا الىنعان بولاتىن. سونىڭ ناتيجەسىندە پەرزەنتحانالار ماڭايىنا 7000 ءتۇپ اعاش پەن 10 مىڭعا جۋىق گۇل وتىرعىزىلىپ, وعان 3000 ادام جۇمىلدىرىلعان ەكەن. كونفە­رەن­تسياعا قاتىسۋشىلار بۇل كۇنى  دە «انا مەن بالاعا 20 سايا­جول مەن ساياباق» اتتى اكتسيا شەڭ­بەرىندە استانا قالاسىنداعى №3 پەرزەنت­حانا­نىڭ اۋلاسىنا اعاش وتىرعىزدى. شارا سوڭىندا رەسپۋبليكالىق الەۋمەتتىك ماڭىزداعى «قازاق­ستان تاۋەلسىزدىگىنىڭ 20 جىلدىعىنا «انا مەن بالاعا 20 ساياجول مەن ساياباق» اتتى اكتسيانىڭ قورىتىندىسى شىعارى­لىپ, جوبا فوتوكور­مەسىنىڭ تۇساۋى كەسىلدى. جۇلدىز ءبايدىلدا.