قۇرمەتتى وتانداستار!
قازاقستان حالقى اسسامبلەياسى سىزدەردى قازاقستان حالقىنىڭ بىرلىگى كۇنى مەرەكەسىمەن شىن جۇرەكتەن قۇتتىقتايدى!
دوستىق پەن ءوزارا تۇسىنىستىكتىڭ نىشانىنا اينالعان بۇل مەرەكە قازاقستان قوعامىنداعى بىرىكتىرۋشى فاكتورلاردىڭ بىرىنە اينالدى. ول – اركىمگە دە قىمبات جانە ميلليونداعان ازاماتتاردىڭ جۇرەگىنە جىلى سەزىم ۇيالاتاتىن مەرەكە.
قازاقستان – مادەنيەتتەرىنىڭ, تىلدەرى مەن داستۇرلەرىنىڭ ءارالۋاندىعى باستى بايلىعىنا اينالعان, ال ازاماتتارى جاسامپازدىق پەن دامۋ يدەياسى اينالاسىندا بىرىككەن ەل.
بيىلعى جىلى قازاقستان پرەزيدەنتى ن.ءا.نازارباەۆتىڭ باستاماسىمەن ەل دامۋىنىڭ جاڭا پاراعىن اشاتىن جان-جاقتى جاڭعىرۋ بويىنشا اۋقىمدى مىندەتتەردى ىسكە اسىرۋ باستالدى.
ولاردىڭ ءساتتى ىسكە اسىرىلۋى قۋاتتى دا باسەكەگە قابىلەتتى مەملەكەت قۇرۋدىڭ باستى شارتى – قازاقستاندىقتاردىڭ بىرلىگى مەن جۇمىلعاندىعىن ساقتاۋعا تىكەلەي بايلانىستى.
قىمباتتى دوستار!
بىزدە حالىق بىرلىگى كۇنى شىن مانىندە دە قازاقستاندىق ءپاتريوتيزمنىڭ, ءوز ەلىنە دەگەن سۇيىسپەنشىلىك پەن وعان ادال بەرىلگەندىكتىڭ مەرەكەسىنە اينالدى.
وسى جارقىن مەرەكە كۇنى قازاقستان حالقى اسسامبلەياسى بارشا قازاقستاندىقتارعا مىقتى دەنساۋلىق, باقىت پەن بەرەكە تىلەيدى! ول سىزدەردىڭ ۇيلەرىڭىزگە كوپتەگەن قۋانىش پەن شاتتىق, ال وتانىمىزعا تاتۋلىق پەن وركەندەۋ اكەلسىن!
قازاقستان حالقى اسسامبلەياسىنىڭ كەڭەسى
استانادان – نۇرلىبەك دوسىباي
قالىڭ ەلدى بەرەكە-بىرلىككە باستايتىن بۇل كۇنى ەلورداداعى بۇقارالىق ويىن-ساۋىق ورتالىقتارى مەن قالالىق الاڭداردا جانە كونتسەرت زالدارىندا بىرقاتار مادەني-بۇقارالىق شارالار ۇيىمداستىرىلدى. ولارعا قالا تۇرعىندارى مەن قوناقتارى قاتىسىپ, مەرەكەلىك كوڭىل كۇيدى سەزىنىپ, كوپشىلىك قۋانىشقا كەنەلىپ جاتتى.
استانا قالاسى اكىمدىگىنە قاراستى ءتيىستى ۆەدومستۆولار مەن ەلوردالىق ءتۇرلى ەتنومادەني ءبىرلەستىكتەر وكىلدەرىنىڭ قولعا الۋىمەن قالىڭ كوپشىلىك جينالاتىن ورىندار مەن الاڭقايلاردا كونتسەرتتىك شارالار ءوتتى. وسىنىڭ ىشىندەگى ەڭ اۋقىمدىسى – «قازاق ەلى» الاڭى مەن قالالىق اكىمدىك الدىنداعى قالالىق الاڭ بولاتىن. بۇل جەردە وتاندىق ەسترادا ونەرپازدارىنىڭ قاتىسۋىمەن كونتسەرتتىك باعدارلامالار ۇيىمداستىرىلدى. سونىمەن قاتار, بۇقارالىق سەرۋەنگە نەگىزدەلىپ, تاڭنان كەشكە دەيىن جالعاسقان شارا اياسىندا قالاداعى ەتنومادەني بىرلەستىكتەر وكىلدەرىنىڭ ازىرلەۋىمەن تەاترلاندىرىلعان ءتۇرلى قويىلىمدار جۇرتشىلىق نازارىنا ۇسىنىلدى. سونداي-اق, قازاقستان حالقىنىڭ تاتۋلىعى مەن بىرلىگىن تۋ ەتكەن سالتاناتتى شارالاردىڭ بارلىعى دا قالىڭ كورەرمەندى ىرىس-ىنتىماق پەن بەرەكە-بىرلىككە ۇندەپ, ونەرپازدار زور قوشەمەتكە بولەندى.
قازاقستان حالقى اسسامبلەياسى سوڭعى ەكى جىلدان بەرى رەسپۋبليكا بويىنشا ءتۇرلى بۇقارالىق ءىس-شارالاردىڭ ءبىرى رەتىندە قايىرىمدىلىق اكتسياسىنىڭ ۇيىتقىسى بولىپ كەلە جاتقانى بەلگىلى. بۇگىندە داستۇرگە اينالىپ ۇلگەرگەن ايتۋلى اكتسيانىڭ ماقساتى – اۋىر دەرتكە شالدىققان جاندارعا قولۇشىن سوزۋ, قارجىلاي كومەك كورسەتۋ. ازاماتتاردى باۋىرمالدىققا باۋليتىن قامقورلىق اكتسياسى اياسىندا بۇل جولى ۇزىندىعى ەلۋ مەترگە جەتەتىن مول داستارقان جايىلدى. ال داستارقاننان سان الۋان ۇلتتىڭ ءتۇرلى تاعامدارىنان ءدام تاتۋعا مۇمكىندىك بولدى. حالتىمىش, چاپيلگيش, بيرx, دۋك سياقتى چەشەن-ينگۋش تاعامدارى مەن كورەي سالاتتارىنىڭ ءتۇر-ءتۇرى, ازەربايجاندار ۇسىنعان xامپلوۆ, دولما, كەباب, ليۋليا-كەباب, لاۆاش, گۋتاب, نەمىستىڭ شترۋدەلى مەن كرەبەلى, وزبەك پەن قاراقالپاقتىڭ پالاۋى, پولياك xالقىنىڭ بيگۋسى, ارمياندار ءپىسىرىپ الىپ كەلگەن xاچاپۋري, دولما, لاۆاش, ۋكرايننىڭ ۆارەنيكتەرى, تاتاردىڭ ءبالىشى, قىستىبىي, تاتارشا ازۋ, ۋچپۋچماك پەن وراما, دۇنگەندەر جاساعان لاعمان, گانفان, مانتى, ورىستاردىڭ بالىشتەرى مەن قۇيماقتارى, تۇرىكتەردىڭ پيدە, لاxماندۋن, سيگارا بورەك, ياپراكسارما, اداناكەباب پەن دونەر, داعىستان xالقىنىڭ xينكالى, سامساسى مەن چۋدۋسى, تۇرىكمەندەر الىپ كەلگەن كۋتاب, چەكتەرمە سىندى تاعامدار بار.
قايىرىمدىلىق اكتسياسىن ۇيىمداستىرۋشىلاردىڭ ايتۋىنشا, مەرەكەلىك جيىننان جينالعان قاراجاتتىڭ بارلىعى دا ەلوردالىق ءبۇلدىرشىن ايىمجان دوسجاننىڭ ەم-دومىنا جۇمسالاتىن بولادى.
جۇزدەن استام ۇلت پەن ۇلىستىڭ باسىن قوسقان مەرەكەلىك جيىندا ءاربىر ۇلتتىڭ ۇلتتىق قولونەر بۇيىمدارى مەن تۇرمىستىق زاتتار كورمەسى دە ۇيىمداستىرىلعان ەدى. وزدەرىنە عانا ءتان ەرەكشە ونەرلەرى مەن ونەگەلى سالت-داستۇرلەرىن قايتا جاڭعىرتۋدى كوزدەيتىن مۇنداي جيىنعا استانا قالاسى وزبەك ەتنومادەني بىرلەستىگىنىڭ جەتەكشىسى شەرزود پۋلاتوۆتىڭ ۇجىمى دا بەلسەندى قاتىستى.
ءتۇس اۋا مەرەكەلىك شارالار لەگى ۇلتتىق سپورت تۇرلەرىنەن سايىستارمەن جالعاسىن تاپتى. اتاپ ايتقاندا, ارقان تارتۋ مەن اسىق اتۋ, قازاق كۇرەسى مەن كىر تاسىن كوتەرۋ سىندى كۇش سىناسۋدان جەڭگەن دە, جەڭىلگەندەر سىيلىق پەن ماراپاتقا يە بولىپ جاتتى.
«ارمانىم – ازاماتتىق الۋ. جاقىن كۇندەرى وعان دا قول جەتكىزەمىن. سودان سوڭ ءسوز بايلاسقان ارۋمەن باس قوسىپ, ەلىمىزدەگى ىنتىماعى جاراسقان وتباسىلاردىڭ قاتارىن كوبەيتسەم دەيمىن. التىن اسىقتاي ۇل, كۇمىس قاسىقتاي قىز ءوسىرىپ, قوعامداعى تاتۋلىقتىڭ ۇلگىسىن كورسەتۋدى قالايمىز. ءارتۇرلى ۇلت پەن ۇلىستىڭ وكىلدەرىنەن قۇرالعان وتان-انامىزدا بۇل ويىمىزدى ىسكە اسىرۋعا تولىق مۇمكىندىكتەر بار», – دەيدى ازامات.
الماتىدان – تالعات ءسۇيىنباي
مەرەكە قارساڭىندا ءۇش كۇن, ءۇش ءتۇن ۇزدىكسىز جاۋعان جاڭبىر حالىقتى مەزى ەتىپ, ءتىپتى, تاۋلى ايماق تۇرعىندارىن ۇرەيلەندىرگەنى دە راس. كوڭىلى كۇپتى الماتىلىقتار 1 مامىر تاڭىنىڭ التىن كۇن نۇرىمەن ارايلانىپ اتقانىنا قۋانىپ, بىردەن شات-شادىمەن كۇيگە ەندى.
ادەتتەگىدەي اباي الاڭىنان اقتارىلا توگىلگەن اۋەزدى مۋزىكا حالىقتىڭ كوڭىل قوشىن ودان بەتەر كوتەرىپ جىبەردى. دوستىق پەن اباي داڭعىلدارىنىڭ بۇرىشىنداعى رەسپۋبليكا سارايىنىڭ الدى – حالىق بىرلىگىنىڭ مەرەكەسىن اتاپ ءوتۋ ءۇشىن تەكتەن-تەك تاڭدالماسا كەرەك. الماتىداعى بارلىق ەتنومادەني بىرلەستىك بۇگىن وسىندا باس قوسىپ, ارنايى وتاۋ تىكتى. ۇلىق مەرەكە ءدال وسى جەردەن باستاۋ الدى. الىپ اباي ەسكەرتكىشىنىڭ تۇبىندە بىزگە بەرگەن سۇحباتىندا قازاقستان حالقى اسسامبلەياسىنىڭ مۇشەسى, «احىسكا» تۇرىك ەتنومادەني بىرلەستىگىنىڭ جەتەكشىسى, فيلوسوفيا عىلىمدارىنىڭ دوكتورى, پروفەسسور قازاقباي قاسيموۆ اعا بىلاي دەدى:
«بايقايسىز با, بيىلعى حالىق بىرلىگىنىڭ مەرەكەسى ەلباسىمىز نۇرسۇلتان نازارباەۆتىڭ «ەگەمەن قازاقستاندا» جاريالانعان «بولاشاققا باعدار: رۋحاني جاڭعىرۋ» باعدارلامالىق ماقالاسىمەن تۇسپا-تۇس كەلدى. ماقالادا الداعى ۋاقىتتا دا قازاقستاندىق قۇندىلىقتاردى نىعايتۋ مەن ۇلتتىق يدەولوگيانى جەتىلدىرە بەرۋگە, جالپى ۇلتتىق بىرلىكتى نىعايتاتىن قازاقستاندىق پاتريوتيزمگە ايرىقشا ءمان بەرىلدى. جىلدار جىلجىعان سايىن تۇرلەنە ءتۇسىپ, جاڭا نىشاندا وتەتىن مىناۋ – ءبىر تۋدىڭ استىنداعى ۇلتتار دوستىعىنىڭ مەرەكەسى, مىنە, سول تالاپتارعا ناعىز جاۋاپ قوي دەپ بىلەمىن.
الماتىنىڭ بارلىق سەگىز اۋدانىندا ءبىر مەزەتتە باستالعان حالىقتار بىرلىگىنىڭ مەرەكەسى الىپ شاھاردىڭ بار بۇرىشىن دۋمانداتىپ جىبەردى. دومبىرانىڭ ۇنىنە ۇيعىر دويراسىنىڭ, كورەي داۋىلپازىنىڭ, ازەربايجان سىبىزعىسىنىڭ ۇندەرى قوسىلىپ, كوك كۇمبەزگە ەرەكشە ساز اۋەلەدى. قازاقستاننىڭ اسا تانىمال ونەر شەبەرلەرى مەن ەسترادا ونەرپازدارى ساحنا ءسانىن كەلتىردى.
«شاڭىراقتاعى» مەرەكەلىك كروسس, «ءFاmىlۋ» ساياباعىنداعى ۇلت تاعامدارىنىڭ بايقاۋى, بالالار ۇيىندە تاربيەلەنۋشىلەردىڭ كونتسەرتى, «مەگا پاركتەگى» ءار ۇلت ونەرپازىنىڭ سايىسى حالىق بىرلىگى مەرەكەسىنە ەرەكشە شىراي بەردى. جۇلدىزدار جامىراعاندا الماتىنىڭ ۇستىنە ءار تۇستان وتشاشۋ توگىلدى...
اقتاۋدان – گۇلايىم شىنتەمىرقىزى
بۇل كۇنگى شارا اقتاۋ قالاسىنداعى «ماڭگىلىك الاۋ» مەن «استانا» الاڭى اراسىندا مەرەكەلىك شەرۋمەن باستالدى. شەرۋگە قالاداعى بارلىق كاسىپورىندار مەن مەكەمەلەردىڭ, الەۋمەتتىك سالالاردىڭ, ەتنومادەني بىرلەستىكتەردىڭ وكىلدەرى مەن جاستاردان, ستۋدەنتتەردەن قۇرالعان 43 توپ, ياعني 8 مىڭعا جۋىق ادام قاتىستى.
«قازاقستان حالقىنىڭ بىرلىگى – ءبىزدىڭ ىنتىماعىمىزدىڭ, دامۋىمىزدىڭ كەپىلى. تاۋەلسىزدىك العان كۇننەن بەرى قاراي مەملەكەت باسشىسىنىڭ سارابدال ساياساتى ارقاسىندا قازاقستانداعى بارلىق ۇلت وكىلدەرى ەل ەرتەڭى, ۇرپاق نەسىبسى ءۇشىن بىرلەسە ەڭبەك ەتىپ, تاتۋ-ءتاتتى ءومىر ءسۇرىپ كەلەدى. ءبىزدىڭ بولاشاعىمىز, بەرىكتىگىمىز وسى ءبىرلىككە تىعىز بايلانىستى», – دەدى ماڭعىستاۋ وبلىسىنىڭ اكىمى ەرالى توعجانوۆ ءوز قۇتتىقتاۋىندا.
مەرەكەمەن تۇرعىنداردى ماڭعىستاۋ وبلىسى بويىنشا سايلاۋ كوميسسياسىنىڭ توراعاسى ە.كۇمىسقالي, «ۆيدەرگەبۋرت» نەمىس ەتنومادەني بىرلەستىگىنىڭ توراعاسى س.مارتىن جانە «قازاقستان كورەيلەرى» قاۋىمداستىعى اقتاۋ قالالىق فيليالىنىڭ ءتورايىمى ر.مادەنوۆا-حۆان قۇتتىقتاپ, ءوزارا ىنتىماعى جاراسقان حالقىمىزعا بىرلىك, تىنىشتىق پەن وركەندەۋ تىلەدى.
شەرۋ سوڭى جەرگىلىكتى ونەرپازداردىڭ كونتسەرتىنە ۇلاستى, كونتسەرتپەن ءبىر مەزگىلدە ۇيىمداستىرىلعان جارمەڭكەلەر مەن ءتۇرلى سپورتتىق سايىستار مەرەكە كورىگىن قىزدىردى. اقتاۋداعى «جاستار» كينوتەاترىندا «دوستىعىمىز جاراسقان» ءفيلمى قازاق جانە ورىس ءتىلدەرىندە كورسەتىلسە, تەڭىز جاعالاۋىندا شاحمات, دويبى, توعىزقۇمالاق ويىندارىنان وبلىستىق تۋرنير ءوتتى. سونداي-اق, قالا تۇرعىندارى مەن قوناقتارى ارقان تارتۋ, ارمرەستلينگ, اسىق اتۋ, ستريت-ۆوركاۋت ويىندارىنان سايىسقا ءتۇسىپ, وتباسىلىق جارىستارعا قاتىستى.
اقتوبەدەن – تەمىر قۇسايىن
اقتوبە ايماعىندا بيىلعى جىلى قازاقستان حالقىنىڭ ءبىرلىگى كۇنىنە ارنالعان ءىس-شارالار ءبىر اپتا بۇرىن باستالىپ كەتتى. مۇنداعى ءتۇر مەن مازمۇننىڭ جاراسىمدىلىعىنا, وتكىزىلگەن شارالاردىڭ سانالۋاندىعىنا ەشقانداي باعا جەتپەيدى.
كەشە 1 مامىر كۇنى اقتوبە قالاسىنداعى «بىرلىك پەن كەلىسىم» گۇلزارىندا «ءبىر شاڭىراق استىندا» دەگەن تاقىرىپپەن كەڭ اۋقىمدى مەرەكەلىك باعدارلاما مارەگە جەتتى. شات-شادىمان شەرۋگە ەڭبەك ۇجىمدارى مەن توقساننان استام ەتنوستىڭ وكىلدەرى, جالپى سانى بەس مىڭنان استام ادام قاتىستى. ءوڭىردىڭ بارلىق جۇرتشىلىعىن اقتوبە وبلىسىنىڭ اكىمى بەردىبەك ساپارباەۆ قۇتتىقتاپ, بارلىق تابىستار مەن جەتىستىكتەردىڭ باستى كەپىلى – تەك تۇراقتىلىق, بىرلىك پەن كەلىسىم ەكەنىنە ەكپىن ءتۇسىردى. سودان سوڭ ءوڭىر باسشىسى بۇگىنگى مەرەكە قازاقستان حالقى اسسامبلەياسى اياسىندا جۇرەكتەرگە جىلىلىق دارىتىپ وتىرعانىن ايتا كەلىپ, ايماقتاعى ەتنومادەني بىرلەستىكتەرگە ءوز گرانتىن تاپسىردى.
وسى ساتتە وبلىستاعى «وكسانا» ۋكراين ۇلتتىق مادەني ءبىرلەستىگى توراعاسىنىڭ ورىنباسارى ۆەرونيكا كاباچەك گازەت ءتىلشىسىنە ءوز تىلەگىن بىلايشا جەتكىزدى:
«بۇگىنگى كۇنى اسسامبلەيا قىزمەتى جاڭاشا مازمۇنعا يە بولىپ, بارشا قازاقستاندىقتاردىڭ تاتۋ-ءتاتتى تىرشىلىگىن تۋ ەتىپ كوتەرە باستادى. بۇگىنگى بىرلىك مەرەكەسى كۇنى دە ءبارىمىز اسسامبلەيا اياسىندا باس قوسىپ, قۋانىش قۇشاعىندا تۇرمىز. دۇنيەدە ءبارى دە وتكىنشى. تەك دوستىق پەن بىرلىكتىڭ عانا عۇمىرى ۇزاق. وسىناۋ تەڭدەسى جوق رۋحاني قۇندىلىق ءومىرىمىزدىڭ وزەگىنە, ءمانى مەن سانىنە اينالا العانى ءۇشىن دە ءوزىمىزدى باقىتتى سەزىنەمىز.
1 مامىر قازاقستان حالقىنىڭ بىرلىگى كۇنىنە ارنالعان باعدارلامالار وبلىس ورتالىعىنداعى التى الاڭ مەن گۇلزارلارلاردا جانە بارلىق اۋدانداردا ءوتكىزىلدى. گازەت تىلشىسىنە شالعايدان حابارلاسقان بايعانين اۋدانىنداعى قوعامدىق كەڭەستىڭ ءتوراعاسى يبراگيم ەرمەكباەۆ مەرەكەنىڭ مامىراجاي كەيپى مەن مامىر شۋاعى كوڭىلدەردى كوككە كوتەرگەنىن جەتكىزدى.
قىسقاسى, اقتوبە ايماعىندا وتكىزىلگەن بىرلىك مەرەكەسى دوستىق پەن تۋىسقاندىقتى تاعى ءبىر مارتە پاش ەتتى.
اتىراۋدان – باقىتگۇل باباش
يساتاي-ماحامبەت الاڭىندا «ماڭگىلىك ەل – قازاقستان» تاقىرىبىنداعى تەاترلاندىرىلعان قويىلىم كوپشىلىك نازارىنا ۇسىنىلدى. مۇنايلى ايماق تۇرعىندارى مەن قوناقتارىن وبلىس اكىمى نۇرلان نوعاەۆ قۇتتىقتاپ, تاۋەلسىز قازاقستاننىڭ بۇگىنگە دەيىن قول جەتكىزگەن تابىستارى مەن جەتىستىكتەرىندە ەلىمىزدەگى بارلىق ۇلت وكىلدەرىنىڭ ۇلەسى بار ەكەنىن اتاپ ءوتتى.
«بىرلىك بار بار جەردە, تىرلىك بار. قازاقستان حالقى اسسامبلەياسىنىڭ سەسسياسىندا ەلباسى ەل بىرلىگى بەيبىتشىلىك پەن تۇراقتىلىقتىڭ, جاسامپازدىقتىڭ نەگىزى ەكەنىن مالىمدەي وتىرىپ, الداعى ۋاقىتتا دا رۋحاني جاڭعىرۋدا ءاربىر قازاقستاندىقتىڭ ەل دامۋىنا ءوز ۇلەسىن قوسارىنا سەنىم بىلدىرگەن ەدى. قازىر اتىراۋ وبلىسىنىڭ وزىندە 80-نەن استام ۇلت وكىلدەرى تاتۋ-ءتاتتى تۇرمىس كەشىپ كەلەدى», – دەگەن ايماق باسشىسى وڭىردە جۇزەگە اسىرىلىپ جاتقان جاقسى ىستەر جايىندا ايتتى.
مەرەكەلىك شەرۋدە ءار ۇلت وكىلدەرى ونەرلەرىن كورسەتۋ ارقىلى ىنتىماق پەن ىرىستىڭ ۇلگىسىن پاش ەتتى. ال حالىق ءارتىسى روزا رىمباەۆانىڭ مەرەكەلىك كونتسەرتى سالتاناتتى شارانىڭ ءسانىن كەلتىردى. سونداي-اق, ن.جانتورين اتىنداعى وبلىستىق فيلارمونيا ۇجىمى كونتسەرت قويدى. «المالى.kz» حالىقارالىق بالالار شىعارماشىلىعى فەستيۆالى دە وسى كۇنگە ورايلاستىرىلدى.
اتىراۋ وڭىرىندەگى تۇرعىندار سانىنىڭ 92 پايىزى قازاق ۇلتىنىڭ ۇلەسىندە. بۇرىن 17 ەتنومادەني بىرلەستىك جۇمىس ىستەيتىن, ەندى ولاردىڭ قاتارىنا جاڭادان «كۋردىي» اتتى كۇردتەردىڭ ءبىرلەستىگى قوسىلدى.
«الداعى ۋاقىتتا قازاقتاردىڭ ەتنومادەني بىرلەستىگى قۇرىلادى. وسى ۇيىمدار ارقىلى ءاربىر ۇلتتىڭ ءوز سالت-ءداستۇرىن, ءتىلى مەن ءمادەنيەتىن ساقتاپ, ناسيحاتتاۋىنا ءمۇمكىندىك جاسالىپ وتىر. تاعى ءبىر جاڭالىق – وبلىس ورتالىعىندا ەتنومادەني بىرلەستىكتەر باس قوساتىن «كەلىسىم سارايى» سالىنادى», – دەيدى اتىراۋ وبلىسى قازاقستان حالقى اسسامبلەياسى ءتوراعاسىنىڭ ورىنباسارى, حاتشىلىق مەڭگەرۋشىسى گۇلميرا شاكىروۆا.
كوكشەتاۋدان – اسقار تۇراپباي ۇلى
كەشە اقمولا وبلىسىنىڭ ورتالىعى – كوكشەتاۋ قالاسىندا قازاقستان حالقىنىڭ بىرلىگى كۇنى مەرەكەسى ەرەكشە اتالدى. مەرەكەلىك شارا ادەتتەگىدەي ابىلاي حان الاڭىندا ءوتتى.
جالپى, بۇگىنگى تاڭدا اقمولا وبلىسىندا 53 ەتنومادەني ءبىرلەستىك (اۋداندار مەن كوكشەتاۋ جانە ستەپنوگور قالالارىندا) جۇمىس ىستەپ كەلەدى. جىل باسىنان بەرى اقمولا وبلىستىق قازاقستان حالقى اسسامبلەياسى ەتنومادەني بىرلەستىكتەرمەن ءبىرلەسە ەتنوسارالىق جانە ءدىنارالىق كەلىسىمدى نىعايتۋ جانە ۇلتتىق بىرلىكتى قامتاماسىز ەتۋ ماقساتىندا وبلىس ورتالىعى مەن اۋدان-ايماقتاردا 360 تاقىرىپتىق شارالار وتكىزگەندىگىن ايتا كەتۋ كەرەك.
وبلىس اكىمى مالىك مىرزالين ساحنا تورىنەن جۇرەكجاردى قۇتتىقتاۋىن جەتكىزدى. ارتىنان مەرەكە ءۇش تەاترلاندىرىلعان بلوكتان تۇراتىن شارالارعا ۇلاستى. اتاپ ايتقاندا, «ىنتىماعى جاراسقان, تۋعان ولكەم – قازاقستان!» حورەوگرافيالىق كومپوزيتسياسىن «كوكشەتاۋ», «ون التى قىز», «شالقىما», «سۋۆەنير», «تۇمار» اتتى حالىق ءبيى انسامبلدەرى ورىندادى. بۇدان كەيىن «مى – بۋدۋششەە كازاحستانا» تەاترلاندىرىلعان بلوك بويىنشا «كوكشەتاۋ» مس 200-گە تارتا بالادان تۇراتىن شىعارماشىلىق ۇجىمى «بەيبىتشىلىك شۋاعى, باقىت شۋاعى» مۋزىكالىق-حورەوگرافيالىق كارتيناسىمەن كورەرمەندەر جۇرەگىنە جول تابا ءبىلدى.
ەلباسىنىڭ بىرلىك پەن تاتۋلىق ورنىققان ەلدىڭ جاڭا الەمدەگى جاڭا قازاقستان بولۋى كەرەكتىگىن ۇلى مىندەت ەتىپ قويعان ۇستانىمىن پاش ەتكەن «دوستىق – ءبىزدىڭ تىرەگىمىز» اتتى سوڭعى تەاترلاندىرىلعان بلوكتا مەرەكەنىڭ كوركىن قىزدىرعان ءار حالىقتىڭ ءبيى بيلەندى. سوڭىنان سوليست سەرالى بايداليەۆتىڭ ورىنداۋىندا جانە بارلىق قاتىسۋشىلاردىڭ قوسىلۋىمەن «قازاقستانىم» ءانى شىرقالدى. ءاننىڭ سوڭعى نوتاسىندا كوككە مىڭداعان شار ۇشىرىلىپ, بەيبىتشىلىك پەن بەرەكە جايلاعان ەل ەكەندىگىمىز پاش ەتىلدى.
قاراعاندىدان – ميراس اسان
قاراعاندى 1 مامىر – قازاقستان حالقىنىڭ بىرلىگى كۇنى مەرەكەسىن ەرەكشە جاعدايدا اتاپ ءوتتى. ادەتتەگىدەي, مەرەكەنى مەيلىنشە قىزدىرعان مەكەن – قالاداعى ورتالىق ساياباق بولدى. وندا ەتنومادەني بىرلەستىكتەردىڭ «ءبىرلىك شاڭىراعى» اتتى ءححىى وبلىستىق فەستيۆالى ءوتتى. اتالعان شارادا ءبىر شاڭىراق استىنداعى ءبىر اتانىڭ بالاسىنداي ءارتۇرلى ۇلتتار مەن ۇلىستار كورەرمەندەر الدىندا ءوز ونەرلەرىن كورسەتىپ, ەلىمىزدەگى تاتۋلىق پەن تۇراقتىلىقتى دارىپتەدى. ءار اۋدان, قالالاردان شارالارعا 28 ەتنومادەني بىرلەستىكتىڭ 500-گە تارتا ونەرپازى قاتىستى.
ايتۋلى مەرەكەگە ارنايى ات شالدىرعان ايماق باسشىسى ەرلان قوشانوۆ جيىلعان جۇرتتى مەرەكەمەن قۇتتىقتادى.
«ەلىمىز جۇيەلى جاڭعىرۋ, قوعامدىق جاڭارۋ جولىنا ءتۇستى. كەشە عانا ەلباسىمىز نۇرسۇلتان نازارباەۆتىڭ قاتىسۋىمەن اسسامبلەيا سەسسيا ءوتتى. مەملەكەت باسشىسى سول سەسسيادا بىرلىك – بايلىعىمىز, تۇراقتىلىق – تۇعىرىمىز, جاڭعىرۋ جارقىن جولىمىز ەكەنىن اتاپ ءوتتى. مىقتى, تابىستى, رۋحاني باي مەملەكەتتى تەك بەيبىتشىلىك پەن كەلىسىمدە عانا قۇرۋعا بولادى», – دەدى وبلىس اكىمى.
جالپى, بۇل كۇنى شاڭىراقتاعى شاتتىق شارتاراپقا جايىلىپ, شارانى وتكىزۋشىلەر قالا تۇرعىندارى مەن قوناقتارىنا ارناپ ءتۇرلى ويىن-ساۋىق ۇيىمداستىردى.
سونداي-اق, بۇعان دەيىن قاراعاندى وبلىسىنىڭ اكىمى ەرلان قوشانوۆ قازاقستان حالقىنىڭ بىرلىگى كۇنى قارساڭىندا ەتنومادەني بىرلەستىكتەردىڭ باسشىلارىمەن, قازاقستان حالقى اسسامبلەياسىنىڭ مۇشەلەرىمەن كەزدەسكەن بولاتىن. دوستىق ۇيىندە ەلىمىزدى رۋحاني جاڭعىرتۋ, بىرلىك پەن ۇلتارالىق كەلىسىم تۋرالى ءسوز قوزعالدى. شارا بارىسىندا وبلىس اكىمى ايماقتاعى 24 ەتنومادەني بىرلەستىككە 700 مىڭ تەڭگە ءمولشەرىندە سىياقى تابىستادى.
ءوز كەزەگىندە ءىس-شاراعا ۇيىتقى بولعان قاراعاندى وبلىسىنىڭ مادەنيەت, مۇراعاتتار جانە قۇجاتتاما باسقارماسىنىڭ باسشىسى ەركەبۇلان اعىمباەۆ تا ۇلتتىق ءتىل مەن ءداستۇردى ءدارىپتەپ, جوعارىداعى فەستيۆالدىڭ بيىك دەڭگەيدە وتۋىنە اتسالىسقان قاتىسۋشىلاردى ديپلومدارمەن جانە سەرتيفيكاتتارمەن ماراپاتتادى.
سۋرەتتى تۇسىرگەن ەرلان وماروۆ, "ەگەمەن قازاقستان"
قوستانايدان – ءنازيرا جارىمبەتوۆا
قازاقستانداعى بىرلىك كەڭقولتىق قازاق حالقىنىڭ باۋىرمالدىعىنان, مەيماندوس ادامگەرشىلىك قۇندىلىقتاردى تۋ ەتىپ ۇستايتىن تەكتىلىگىنەن تاراپ جاتقانىن زاماننىڭ داۋىلى مەن جاۋىنىن كورگەن اعا ۇرپاق وكىلدەرى جاقسى بىلەدى. قوستاناي قالاسىنىڭ تۇرعىنى ۆالەنتينا ميحالتسوۆانىڭ اتا-اناسى سوعىس جىلدارى ۋكراينادان قازاقستانعا كەلگەن ەدى. قازاقتار ولارمەن ءبىر ءتىلىم نانىن ءبولىپ جەدى, كەۋدەسىنەن كەرى يتەرمەي, باۋىرىنا تارتتى.
«سوعىستان كەيىن اتامەكەنىمىزگە بارايىق دەپ, ۋكرايناعا كەتىپ, جاعدايىمىز بولماعان سوڭ, قايتىپ كەلگەن وتباسىمىز. ادامگەرشىلىك پەن قايىرىمدىلىقتى قازاقتاردان ءۇيرەنۋ كەرەك. قازاقستانعا بار جاقسىلىقتى تىلەپ وتىرامىن», – دەيدى مەرەكەگە شىققان ۆالەنتينا ميحالتسوۆا اپاي.
مەرەكەگە جينالعاندار الدىندا وبلىس اكىمى ارحيمەد مۇحامبەتوۆ قوستانايلىقتاردى 1 مامىر – قازاقستان حالقىنىڭ بىرلىگى كۇنىمەن قۇتتىقتادى.
«قازاقستان تاۋەلسىزدىگىن العان سوڭ, 1 مامىر مەرەكەسى تەرەڭ مازمۇنعا يە بولدى. ەلباسى نۇرسۇلتان نازارباەۆ ەلدىڭ ءبىرلىگىن, حالىقتىڭ دوستىعىن ءوزىنىڭ ساياساتىنىڭ نەگىزى دەپ بىلەدى. شيرەك عاسىردا قازاقستان الەمدىك ارەنادا ءوزىنىڭ لايىقتى ورنىن الا ءبىلدى. ەكونوميكامىز قارقىندى دامىپ كەلەدى. بەيبىتشىلىكتى باستى باعىت ەتكەن ساياساتىمىزدى ءدۇنيە ءجۇزى بىلەدى. ءبىزدىڭ ەلىمىزدەگى باعا جەتپەس بايلىعىمىز – بىرلىك, دوستىق, تاتۋلىق. بىلتىر بارلىق ەتنومادەني بىرلەستىكتەر بىرىگىپ, ءتۇرلى ۇلتتىڭ 8 بالاسىن باۋىرىنا باسقان تولەگەنوۆتەر وتباسىنا ءۇي تۇرعىزىپ بەردى, ءۇيى ورتەنگەن ورالمان جاس وتباسىنا انالار كەڭەسى باستاما كوتەرىپ, ءۇي ساتىپ اپەردى. بىرلىك بار جەردە بەرەكە بار, ال بەرەكە ىلعي دا مەرەكەنىڭ باستاۋى ەكەنىنە ءبىزدىڭ ەلدىڭ ءومىرى, ەلباسىنىڭ ساياساتى كۋا», – دەدى ارحيمەد بەگەجان ۇلى.
1 مامىر مەرەكەسىنە وراي ورتالىق الاڭدا كونتسەرت, ويىن-ساۋىق قىزدى, ءتۇرلى ۇلىستار داستارقانىن جايدى.
بىرلىك پەن ىنتىماقتىڭ, ىرىس پەن بەرەكەنىڭ مەرەكەسىن سىر بويىن جايلاپ جاتقان جۇرتشىلىق ۇلكەن ىقىلاسپەن اتاپ ءوتتى. اقمەشىتتەگى «دوستىق ءۇيىنىڭ» الاڭىندا قازاقستان حالقىنىڭ بىرلىگى مەرەكەسىنە ارنالعان «بولاشاعى ءبىرتۇتاس ۇلت» اتتى فورۋم ۇيىمداستىرىلدى. وعان ايماق باسشىسى, وبلىستىق قازاقستان حالقى اسسامبلەياسىنىڭ توراعاسى قىرىمبەك كوشەرباەۆ, ەتنومادەني بىرلەستىكتەر مۇشەلەرى, جاستار, قالا تۇرعىندارى قاتىستى.
مەرەكەلىك شارانى قىرىمبەك ەلەۋ ۇلى قۇتتىقتاۋ سوزىمەن اشتى. ول مامىراجاي مەيراممەن بارشا قىزىلوردالىقتى قۇتتىقتادى.
«حالقىمىزدىڭ «ىرىس الدى – ىنتىماق» دەگەن قاناتتى ءسوزىنىڭ استارىندا ۇلكەن ءمان بار. ەل بىرلىگى, دوستىق پەن باۋىرمالدىق, بەيبىت كۇننىڭ, تاتۋلىقتىڭ تەمىرقازىعىنداي ەڭ باستى قۇندىلىق – بەكەم بىرلىك ءبىزدىڭ باعا جەتپەس بايلىعىمىز. ەلباسىمىز نۇرسۇلتان نازارباەۆ ايتقانداي, «قازىردە قازاق ەلى – وزىندىك بەت-بەينەسى بار, وزىندىك ەرەكشەلىكتەرى مەن ۇستانىمى بار, بەرەكەسى مەن بىرلىگى جاراسقان تابىستى مەملەكەت». ءبىز ءبىر ماقسات, ءبىر مۇددە, ءبىر بولاشاق جولىنا جۇمىلعان قۋاتتى ەلمىز. ەلىمىزدەگى قالىپتاسقان ۇلتتار تۇتاستىعى مەن حالىق دوستىعىنىڭ ارقاسىندا بۇگىندە ەلىمىزدىڭ ەكونوميكاسى وركەندەپ كەلەدى. قوعامدا تۇراقتىلىق پەن تىنىشتىقتىڭ ساقتالۋى ەلىمىزدە دەموكراتيالىق مەملەكەت قۇرۋعا جانە العا ورلەۋگە زور ىقپال ەتۋدە. ەلباسىنىڭ كورەگەن ساياساتىنىڭ ارقاسىندا بۇگىندە 130-دان استام ەتنوس وكىلدەرى ءبىر شاڭىراق استىندا تاتۋ-ءتاتتى ءومىر ءسۇرىپ, بىرلىكتىڭ جارقىن ۇلگىسىن كورسەتىپ كەلەدى», – دەدى ول.
شارا اياسىندا اسپانعا ەكسپو-2017, قۋاتتى قازاقستان, «بىرلىك, ىنتىماق, بەيبىتشىلىك» دەگەن جازۋلارى بار لەنتا بايلانعان شار ۇشىرىلدى.
مەرەكەلىك شارا «ماقساتتار بىرلىگى – رۋح بىرلىگى» اتتى ەتنومادەني بىرلەستىكتەردىڭ ونەر فەستيۆالىمەن جالعاستى.
ورالدان – قازبەك قۇتتىمۇرات ۇلى
بيىلعى 1 مامىر مەرەكەسى سوناۋ ءبىر جىلدارداعىداي ەڭبەك ۇجىمدارىنىڭ مەرەكەلىك شەرۋىمەن باستالدى. شارانى ۇيىمداستىرۋشىلار پرەزيدەنتتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنداعى «جاڭعىرۋ اتاۋلى بۇرىنعىداي تاريحي تاجىريبە مەن ۇلتتىق داستۇرلەرگە شەكەدەن قاراماۋعا ءتيىس. كەرىسىنشە, زامانا سىنىنان سۇرىنبەي وتكەن وزىق داستۇرلەردى تابىستى جاڭعىرۋدىڭ ماڭىزدى العىشارتتارىنا اينالدىرا ءبىلۋ قاجەت», دەگەن ءسوزىن باسشىلىققا السا كەرەك.
شىنىندا دا ورال قالاسىندا ءتۇرلى سالادا ەڭبەك ەتىپ جاتقان قاراپايىم جۇمىسشىلار مەن قىزمەتكەرلەر وسى شەرۋدە قولدارىنا وتانىمىزدىڭ كوك تۋىن, ءتۇرلى-ءتۇستى شارلار مەن ەلدى ءبىرلىككە, ىنتىماققا شاقىراتىن ۇراندار ۇستاپ, حالىقتىڭ الدىنان ءجۇرىپ ءوتتى. جاقىندا عانا جاڭا ءونىمىن – «ماڭعىستاۋ» اتتى زىمىراندى-ارتيللەريالىق كەمەنى تاپسىرعان «زەنيت» زاۋىتىنىڭ ۇجىمى, وڭىردەگى ەڭ ۇلكەن سالىق تولەۋشى كومپانيانىڭ ءبىرى – «كوندەنسات» اق جۇمىسشىلارى, «ومەگا» زاۋىتى, اۋىل شارۋاشىلىعى سالاسى قىزمەتكەرلەرى, الەۋمەتتىڭ قوس قاناتى ىسپەتتەس ءبىلىم بەرۋ جانە دەنساۋلىق ساقتاۋ سالاسى قىزمەتكەرلەرى – ءبىر سوزبەن ايتقاندا, قاراپايىم ەڭبەك ادامدارى حالىق الدىنا قول ۇستاسا شىعىپ, بىرلىك پەن تاتۋلىقتىڭ ۇلگىسىن كورسەتتى.
وڭىردەگى 33 ەتنومادەني ءبىرلەستىك وكىلدەرى ءتۇرلى ۇلتتىڭ كيىمىمەن مەرەكە موزايكاسىن تولىقتىرا ءتۇستى. بيىل ءبىر عاسىرلىق تويىن اتاپ وتكەلى وتىرعان باتىس قازاقستان وبلىستىق گازەتتەرى ۇجىمى باسىلىمنىڭ 100 جىلدىق تاريحىندا ۇجىمدا قىزمەت ەتكەن تاريحي تۇلعالاردىڭ پورترەتتەرىن ۇستاپ شىقتى.
«قادىرلى باتىسقازاقستاندىقتار, قۇرمەتتى جەرلەستەر, قوناقتار! بۇگىنگى ەرەكشە كۇن, قاسيەتتى مەرەكە بارشامىزعا قۇتتى بولسىن! قازىر قازاقستاندا جاڭعىرۋ ۇرانى كوتەرىلۋدە. جاڭعىرۋ ءۇشىن ءبىز كۇشتى بولۋىمىز كەرەك. كۇشتى بولۋ ءۇشىن ءبىر بولۋىمىز كەرەك!», – دەدى سالتاناتتى جيىندا ءوڭىر باسشىسى التاي كولگىنوۆ.
سالتاناتتى شارا باتىس قازاقستان وبلىستىق ونەر ۇجىمدارىنىڭ مەرەكەلىك كونتسەرتىمەن جالعاستى.
وسكەمەننەن – ازامات قاسىم
وسكەمەننىڭ تۇرعىندارى 1 مامىر مەيرامىن قالانىڭ قاق ورتاسىنداعى ۇلكەن الاڭدا «مەن – قازاقستاننىڭ پاتريوتىمىن» اتتى اكتسيا اياسىندا اتاپ ءوتتى. اتالعان شارا شەڭبەرىندە شاھارداعى «قازتسينك», «تمك», «ءۇلبى مەتاللۋرگيا زاۋىتى», «ازيا اۆتو», «شىعىسەنەرگوترەيد», «جىلۋ جۇيەلەرى» سىندى كاسىپورىندار مەن وسىنداعى بارلىق جوعارى وقۋ ورىندارى مەن كوللەدجدەردىڭ, مەكتەپتەردىڭ, بانكتەردىڭ, وبلىستىق باسقارمالار مەن دەپارتامەنتتەردىڭ ۇجىمدارى, سپورتشىلار, ۇزىن سانى 10 مىڭعا جۋىق ادام قالا كوشەلەرىن جاياۋ ءجۇرىپ ءوتىپ, ورتالىق الاڭدا ساپ تۇزەدى.
قىزىلدى-جاسىلدى كيىنگەن وڭىردەگى ءتۇرلى ەتنومادەني ءبىرلەستىك مۇشەلەرىنىڭ اسەم بيىنەن كەيىن ساحناعا ايماق باسشىسى دانيال احمەتوۆ كوتەرىلىپ, وبلىس جۇرتشىلىعىن مەرەكەمەن قۇتتىقتادى.
«بىرلىگى مەن ىنتىماعى جاراسقان ەلدىڭ المايتىن اسۋلارى جوق. بۇل – حالقىن اسقاق ارمان, ۇلى مۇراتتار جولىنا نىق سەنىممەن باستاپ كەلە جاتقان نۇرسۇلتان ءابىش ۇلى نازارباەۆتىڭ ءسوزى. تاريحي قىسقا ۋاقىتتىڭ ءوزى بۇل ءسوزدىڭ اينىماس قاعيدا ەكەنىن دالەلدەپ بەردى. جيىرما بەس جىلدىڭ ىشىندە حالىقارالىق ۇيىمداردىڭ بەدەلدى مۇشەسىنە اينالعان قازاقستان مەملەكەتى الەم ەلدەرىنە كوپ ۇلت وكىلدەرىنىڭ بەيبىت ءومىر ءسۇرۋىنىڭ تەڭدەسسىز ۇلگىسىن كورسەتتى. تاۋەلسىز قازاقستاننىڭ ەڭ باستى باعا جەتپەس بايلىعى – جالپىۇلتتىق ءبىرلىك, بەيبىتشىلىك پەن كەلىسىم. تۇراقتىلىق پەن كەلىسىم, دوستىق پەن تاتۋلىق مەرەكەسى قۇتتى بولسىن! تاعدىرى ءبىر, ماقساتى ورتاق كوپۇلتتى حالقىمىزدىڭ بىرلىگى ارتا بەرسىن», – دەدى وبلىس اكىمى.
بۇدان ارى الاڭداعى شارالار لەگى ءوڭىردىڭ ونەرپازدارى مەن ەتنومادەني بىرلەستىكتەردىڭ كۇشىمەن ازىرلەنگەن مەرەكەلىك كونتسەرتپەن جالعاستى. كەشكە ورتالىق الاڭدا «ستۋدەنتتىك كوكتەم-2017» بايقاۋىنىڭ گالا-كونتسەرتى ءوتىپ, ءتۇرلى-ءتۇستى, مۋزىكالىق سۋبۇرقاق ىسكە قوسىلدى.
پاۆلوداردان – فاريدا بىقاي
بيىلعى 1 مامىر – قازاقستان حالقىنىڭ بىرلىگى كۇنى مەرەكەسىندە وبلىس ورتالىعىنداعى الاڭدا وڭىردەگى ەتنومادەني بىرلەستىكتەردىڭ قاتىسۋىمەن « ۇلى دالانىڭ شوق جۇلدىزى» اتتى ساحنالاندىرىلعان قويىلىم كورسەتىلدى.
ەتنومادەني بىرلەستىكتەردىڭ دوستىق اۋەندەرىنە يسا بايزاقوۆ اتىنداعى وبلىستىق فيلارمونيانىڭ كونتسەرتتىك باعدارلاماسى قوسىلىپ, اسەم اۋەندەردى شارىقتاتىپ, بۇكىل قالانى مەرەكەلىك دۋمانعا بولەدى. كۇننىڭ سالقىندىعى دا سەزىلمەيدى. ورتالىق الاڭعا جينالعان جۇرتشىلىققا وبلىس باسشىلىعى, سوعىس جانە ەڭبەك ارداگەرلەرى قۇتتىقتاۋ سوزدەرىن ارناۋدا.
ال ەرتىس وزەنى جاعالاۋىنداعى «شاڭىراق» اتالاتىن الاڭدا الماتى, شىمكەنت, تۇركىستان, قوستاناي قالالارى شەبەرلەرىنىڭ حالىقتىڭ قىزىعۋشىلىقتارىن تۋدىرعان قولدانبالى ونەر كورمەسى جانە ءوڭىرلىك سۋرەتشىلەردىڭ سۋرەت ءجارمەڭكەلەرى ءوتتى. «ءان-شاشۋ» اتتى الاڭدا كونتسەرتتىك, «بالداۋرەن» الاڭىندا بالالاردىڭ ويىن-ساۋىق باعدارلامالارى ۇيىمداستىرىلدى. ال «شىمىرلار» الاڭىندا سپورتتىق سايىستار جارىسى, ۇلتتىق ويىندار كورسەتىلدى.
جالپى, وبلىستىق مادەنيەت باسقارماسىنىڭ حابارىنا قاراعاندا, وبلىستا مامىر ايىنداعى مەرەكەلەرگە ارنالىپ 600-گە تارتا مادەني جانە سپورتتىق ءىس-شارالار جوسپارلانىپتى. بىرلىك كۇنى مەرەكەسىندەگى ءبىر ەرەكشەلىك – پاۆلودار مەن اقسۋ قالالارىن جالعايتىن جاڭا كوپىر ارقىلى ۆەلوشەرۋ ءوتتى. وبلىس اكىمى ب.باقاۋوۆ باستاعان وبلىستىق اكىمدىك قىزمەتكەرلەرى بار, جالپى سانى 1500-دەي ادام 30 شاقىرىمدىق ۆەلومارافونعا قاتىستى. مەرەكەلىك كونتسەرتتىك باعدارلاما, مەرەكەلىك ساۋدا, ۇلتتىق جانە سپورت ويىندارى – بارلىعى بىرلىك كۇنىنە ارنالدى. كەڭ الاڭ تورىندە «دەرۆيشي» توبى, الىشەر كارىموۆ, باسقا دا ەستاردا ونەرپازدارى وتان, تۋىستىق, دوستىق تاقىرىبىندا ءان شىرقادى.
پەتروپاۆلدان – ء ومىر ەسقالي
قازاقستان حالقىنىڭ بىرلىگى كۇنى مەرەكەسىن سولتۇستىكقازاقستاندىقتار جوعارى كوڭىل كۇيمەن اتاپ ءوتىپ, پرەزيدەنتتىڭ ۇزاق مەرزىمگە ارنالعان ستراتەگيالىق باسىم قاعيداتتارىن قولدايتىندارىن جاسامپاز ەڭبەك, رۋحاني كەلىسىم, پاتريوتتىق سەزىم ارقىلى تاعى ءبىر پاش ەتتى. بويلارىنا يمان ۇيالاپ, جۇزدەرىنەن كۇلكى توگىلىپ, قوعامدى توپتاستىرۋدىڭ اسىل قۇندىلىقتارىن ءار قىرىنان تانىتسا, ونىڭ اۋەلگى القيسساسى ورتالىق الاڭنان باستاۋ الدى. ءيىن تىرەسكەن جۇرتشىلىقتى وبلىس اكىمى قۇمار اقساقالوۆ دوستىق, بەيبىتشىلىك مەرەكەسىمەن قۇتتىقتاپ, جىلى لەبىزىن ارنادى. ول ءوز سوزىندە ەلباسىنىڭ كوپقىرلى سىندارلى ساياساتى ارقاسىندا ەكونوميكالىق, ساياسي تابىستارمەن قاتار, رۋحاني سالادا دا كۇردەلى بەتبۇرىستار جاسالعانىن, ەتنوستاردىڭ ءتىلىن, مادەنيەتىن دامىتۋعا جان-جاقتى جاعداي تۋدىرىلعانىن اتاپ ءوتتى.
مەرەكەلىك كونتسەرتتە ءار تىلدە شىرقالعان اندەر, مىڭ بۇرالعان بيلەر ادامدارعا ەرەكشە كوڭىل-كۇي سىيلاپ, ودان بەتەر جاقىنداستىرا ءتۇستى. الاڭقايلاردا كونكۋرستار, اكتسيالار, جارمەڭكەلەر ۇيىمداستىرىلىپ, «ءبىز – قازاقستاندىقتار!» اتتى قولدانبالى كورمە جەرگىلىكتى ونەر شەبەرلەرىن توپتاستىرسا, بالالاردىڭ تەاترلاندىرىلعان كورىنىسى وزىندىك باعدارلامامەن ايشىقتالدى. اباي مەن پۋشكين ەسكەرتكىشى ماڭايىندا سپورتتىق سايىستار سايدىڭ تاسىنداي كىل كۇشتىلەر جينالسا, تاۋەلسىزدىك ستەللاسى اۋماعىندا ەتنومادەني بىرلەستىكتەردىڭ «بىرلىگىمىز جاراسقان!» اتتى قويىلىمى تاماشالاندى. «ساعىندىرعان اندەر-اي!» رەترو-فەستيۆال ءوز جاراسىمىن تاپتى.
بۇل مەكەمەدە وتىزدان استام ينتەرناتسيونالدىق وتباسى ەڭبەك ەتەدى. كەز كەلگەن مەرەكەنى ءبىرىگىپ اتاپ وتەدى. بۇل كۇنى اعا بۋىننىڭ ونەگە-تالىمدەرى ناسيحاتتالىپ, جاستارعا ۇلگى ەتىلدى. «ۆيدەرگەبۋرت» نەمىس مادەني ءبىرلەستىگىنىڭ ءتورايىمى ەلۆيرا كوۆزەل قازاقستان حالقى اسسامبلەياسىنىڭ جۋىردا وتكەن سەسسياسىنا قاتىسقانىن ايتا كەلىپ, العان اسەرلەرىمەن ءبولىستى.
ايماق باسشىسى قۇمار اقساقالوۆتىڭ ءار اۋلادا تاتۋلىق, دوستىق داستارقانىن جايۋ, ۇيلەسىمدى ساباقتاستىقتاردى ناسيحاتتاۋ تۋرالى باستاماسىن العاشقىلاردىڭ قاتارىندا قالالىق قازاق گيمنازياسى قولداپ, جينالعاندارعا ءدامى ءتىل ۇيىرەتىن ۇلتتىق تاعامدار مەن سۋسىندار ۇسىندى. كونتسەرت ۇيىمداستىردى.
قازاقستان حالقىنىڭ بىرلىگى كۇنى مەرەكەسى اۋدانداردا دا كەڭىنەن اتاپ ءوتىلدى.
تارازدان – حاميت ەسامان
قازاقستان حالقىنىڭ بىرلىگى كۇنى مەرەكەسى كونە تاراز شاھارىندا دا وزىندىك سالتاناتپەن اتالىپ ءوتتى. «كونە تاراز» تاريحي-ءمادەني كەشەنىندە «ءبىر شاڭىراق استىندا» اتتى مەرەكەلىك-كوپشىلىك ءىس-شارا ۇيىمداستىرىلىپ, وعان قالا تۇرعىندارى مەن قوناقتارى كوپتەپ قاتىستى. كەشەن اۋماعىندا ورنالاسقان جامبىل جاباەۆ ەسكەرتكىشىنىڭ سول جاعىنا ايتۋلى كۇنگە وراي 12 شاتىر تىگىلىپ, وندا وڭىردە تۇراتىن ءتۇرلى ۇلت وكىلدەرىنىڭ مەرەكەلىك باعدارلامالارى تۇرعىندار نازارىنا ۇسىنىلدى. ولاردى وبلىس اكىمى كارىم كوكىرەكباەۆ كەلىپ تاماشالادى. بۇدان كەيىن وبلىس باسشىسى جينالعان كوپشىلىكتى قازاقستان حالقىنىڭ بىرلىگى كۇنىمەن قۇتتىقتادى.
«بىرلىگى بەرەكەلى, تىرلىگى مەرەكەلى, ىنتىماعى جاراسقان ەلدىڭ عانا ىرىسى مەن تابىسى مول بولماق. ورتاق شاڭىراعىمىزدىڭ استىندا تىنىشتىق پەن كەلىسىم ماڭگى ورناسىن! بەيبىت ءومىردىڭ بەرەكەسى ارتا بەرسىن! ەلىمىز امان بولسىن! ەلدىگىمىز باياندى بولسىن! ماڭگىلىك قازاقستان – ماڭگىلىك ەل بولسىن», – دەدى ءوڭىر باسشىسى ءوز سوزىندە.
مەرەكەلىك ءىس-شارا بارىسىندا ەتنومادەني بىرلەستىكتەردىڭ, وبلىستىق فيلارمونيا ونەرپازدارىنىڭ كونتسەرتتىك باعدارلامالارى مەن ءتۇرلى تاقىرىپتاعى تەاترلاندىرىلعان قويىلىمدار كوپشىلىك نازارىنا ۇسىنىلدى. «لاۆكا سلادوستەي» اتتى ءتۇرلى ۇلت وكىلدەرىنىڭ ءتاتتى تاعامدارى مەن قولونەر شەبەرلەرىنىڭ كورمەسى كوپشىلىككە جول تارتتى.
سونىمەن قاتار, كىشكەنتاي بالالارعا جانە سۋرەتكە ءتۇسۋشىلەرگە ارنالعان ۇلكەن قۋىرشاقتاردىڭ سەرۋەندەرى, ءجاسوسپىرىمدەر ءۇشىن «بىلىمدىلەر الاڭى» اتتى سۇراق-جاۋاپ ويىندارى, جاستارعا ارنالعان برەيك-دانس فەستيۆالى مەن جاستاردىڭ مەرەكەلىك فلەشموبى دا لايىقتى دەڭگەيدە ءوتتى. ال قىرعىز ۇلتىنىڭ «قۇرىق ءىلۋ», تاتار-باشقۇرتتاردىڭ «جاستىقپەن ۇرىپ قۇلاتۋ», تاجىك ۇلتىنىڭ «كۋراش», ورىستاردىڭ «باعاناعا شىعۋ» جانە قازاق ۇلتىنىڭ «قوي كوتەرۋ» ويىندارى دا كوپشىلىكتىڭ قىزىعۋشىلىعىن تۋعىزىپ, مەرەكەنىڭ ءسان-سالتاناتىن اشا ءتۇستى.
تالدىقورعاننان – نۇربول الدىباەۆ
بۇل كۇنى تالدىقورعاننىڭ توبەسىن تورعىن بۇلتتار تورلاعانىمەن, ءتۇرلى ەتنوستاردىڭ كوڭىلدەرى شات, جۇزدەرى جارقىن. ەرتەلەتە قالانىڭ سولتۇستىك-باتىسىنداعى «جاستار» ساياباعىن بەتكە العان ەل ارا-تۇرا سەبەلەگەن جاۋىندى دا ەلەر ەمەس. ساياباق تورىندە ورناتىلعان داۋىس زورايتقىشتان شىققان اسەم ءان اۋەلەي كوتەرىلىپ, كوڭىل حوشىن كوتەرۋدە.
جەتىسۋلىق قولونەر شەبەرلەرىنىڭ ءتول تۋىندىلارى دا بىرىنەن ەكىنشىسى اسىپ تۇر. كورگەن جاننىڭ كوزىن تويدىرا ءوڭىردىڭ تاماشا تابيعاتىن, سان الۋان ەرەكشەلىگىن پاش ەتەدى.
مەرەكەلىك شارانى تالدىقورعان قالاسىنىڭ اكىمى باعدات قاراساەۆ اشىپ, جەتىسۋلىقتاردى 1 مامىر – قازاقستان حالقىنىڭ بىرلىگى كۇنى مەرەكەسىمەن قۇتتىقتاعان سوڭ, ءسۇيىنباي اتىنداعى وبىستىق فيلورمونيا ونەرپازدارىنا كەزەك ءتيدى. قازاقستاندا تۇراتىن ءتۇرلى ەتنوس وكىلدەرىنىڭ اندەرى شىرقالىپ, ءان اراسىندا ۇلتتاردى قۇتتىقتاۋ سوزدەرى رەتىمەن ايتىلىپ, وزىندىك ۇيلەسىم تاۋىپ وتىردى.
الماتى – تالدىقورعان كۇرەجولىنىڭ بويىنداعى سپورت الاڭىندا سپورتتىڭ سان تۇرىنەن دە باسەكەلەر ءوتىپ جاتتى. بۇلشىق ەتتەرى بۇلت-بۇلت ويناعان سپورتشىلار كىر تاستارىن ۇرشىقشا ءۇيىرىپ, ەلدى ءتانتى ەتتى.
ءسويتىپ, تالدىقورعان تورىندە دە قالىپتاسقان ءداستۇر ساقتالىپ, حالىق شادىمان-شاتتىققا بولەندى.
شىمكەنتتەن – عالىمجان ەلشىباي
ۇلىسىمنىڭ ۇيىتقىسى اتانعان وڭتۇستىك تۇرعىندارى مەن قوناقتارى 1 مامىر – قازاقستان حالقىنىڭ بىرلىگى كۇنى مەيرامىندا ءال-فارابي الاڭىنا اعىلدى. ەلىمىزدىڭ باستى مەرەكەلەرىنىڭ ءبىرىن تويلاۋعا كەلگەن جۇرتشىلىقتى ىنتىماعى جاراسقان ءتۇرلى ەتنوس وكىلدەرىنىڭ بەسىك تەربەتكەن انالارى «اق كوگەرشىن» انىمەن قارسى الدى. ولارعا قولدارىنا اق كوگەرشىندەرى بار بۇلدىرشىندەر قوسىلا شىرقادى. اسەرلى كومپوزيزيا سوڭىندا بەيبىتشىلىكتىكتىڭ بەلگىسىندەي بولعان قۇستار كوككە سامعادى... الاڭعا «ماڭگىلىك ەل» بەينەسىندە ەكسپو-2017 ەمبلەماسىمەن بەزەندىرىلگەن ماشينا شىعارىلدى. التىن ادام كيىمىندەگى سالت اتتىلار شەرۋى مەن ەلىمىزدە تۇراتىن ءتۇرلى ۇلت پەن ۇلىس وكىلدەرى كوك تۋدىڭ ماڭىنا توپتاستى. بۇل – بەكەم بىرلىگىمىزدىڭ بەلگىسى!
مەرەكەلىك شاراعا قاتىسقان وبلىس اكىمى ج.تۇيمەباەۆ ءوڭتۇستىكقازاقستاندىقتاردى بىرلىك مەرەكەسىمەن قۇتتىقتادى.
«حالقىمىزدا «باق قايدا باراسىڭ – ىنتىماققا بارامىن» دەگەن دانا ءسوز بار. ەلدىك بولمىسىمىزعا ءتان بۇل ۇعىمدى تاۋەلسىزدىكتىڭ تۇعىرلى, مەملەكەتتىڭ عۇمىرلى بولۋىنا وزەك ەتتىك. بىرلىكتى باستى بايلىعىمىز – تاۋەلسىزدىكتىڭ ارقاۋى ەتىپ ايشىقتادىق. ەلباسىمىز ۇسىنعان جول, جۇرت بولىپ جۇمىلا ۇستانعان ساياسات شيرەك عاسىردا جەمىستى ناتيجەسىن بەردى. بۇگىنگى قازاقستان بىرلىگى بەكەم, تىرلىگى كەلىسكەن, ىنتىماعى جاراسقان ەلگە اينالدى. جەتكەن جەتىستىكتەرىمىز بەن العان اسۋلارىمىز از ەمەس. بۇگىن ءبىز ۇلى دالانىڭ ۇلاعاتىمەن ماڭگىلىك ەل قۇرۋعا قادام باستىق. كۇن سايىن قۇبىلعان زامانانىڭ يىرىمىنە توتەپ بەرەتىن قۋاتتى مەملەكەتتى جاساقتاۋدىڭ قامىنا كىرىستىك. ەلەۋلى وزگەرىستەر قوعامنىڭ بارلىق سالاسىن قامتىپ وتىر. جالپىۇلتتىق جاڭعىرۋ ساياسي-ەكونوميكالىق سالالارمەن قاتار, ازاماتتىق ساناعا دا سەرپىلىس الىپ كەلمەك», – دەدى ج.تۇيمەباەۆ.
سالتاناتتى جيىندا ايماق باسشىسى ەلدەگى ەتنوسارالىق تاتۋلىق پەن قوعامدىق-ساياسي تۇراقتىلىقتى ساقتاۋعا سۇبەلى ۇلەس قوسقان 18 ەتنومادەني بىرلەستىككە وبلىس اكىمىنىڭ «باۋىرمال» سىيلىعى مەن بىرقاتار ازاماتقا وبلىس اكىمىنىڭ قۇرمەت گراموتاسىن تابىستادى.
شاتتىققا تولى شىرايلى شىمكەنت تورىندە «وڭتۇستىك تسيرك» ونەرپازدارى ات ۇستىندەگى ونەرلەرىن كورسەتتى. دوستىق سيۋيتاسى ورىندالدى. ساحنا مەن الاڭعا ورنالاسقان حورەوگرافتار «ماڭگىلىك ەل ءۇشىن!» ءانىن شىرقادى. مەرەكەلىك شارا سوڭى وبلىستىق ەتنومادەني ءبىرلەستىك وكىلدەرىنىڭ كونتسەرتتىك باعدارلاماسىنا ۇلاستى.
سۋرەتتى تۇسىرگەن تەمىر قۇسايىن
