– وڭتۇستىك قازاقستان – قازاقىلىقتىڭ قايماعى بۇزىلماعان ولكە. بۇل – ابىزدار مەن اۋليەلەردىڭ قاسيەتى دارىعان, قوجا احمەت ياسساۋي مەن ءال-ءفارابيدىڭ ءىزى قالعان, كونە مادەني مۇراعا باي كيەلى جەر. قازىر بۇل وڭىردە بۇكىل ەل حالقىنىڭ 16%-ى تۇرادى, – دەدى نۇرسۇلتان نازارباەۆ.
قازاقستان پرەزيدەنتى وڭتۇستىك ءوڭىردىڭ تاريحىن تۇتاس قازاقستاننىڭ تاريحى دەۋگە بولاتىنىن اتاپ ءوتتى.
– وڭتۇستىك قازاقستان وبلىسىنىڭ وزىندە 800-دەن استام تاريحي-مادەني ەسكەرتكىش بار. الەمگە ايگىلى جادىگەرلەرىمىزدىڭ كوپشىلىگى وسىندا. تۇركىستان, وتىرار, سايرام, ساۋران قالالارى, قوجا احمەت ياسساۋي, ارىستان باب كەسەنەلەرى – ءبىزدىڭ ماقتانىشىمىز. وسىنداعى ءاربىر توبە مەن قىرقانىڭ, وزەن مەن كولدىڭ اتتارى – تۇنىپ تۇرعان تاريح. مارتوبە, كۇلتوبە جانە ورداباسى – حالقىمىزدىڭ ساقتالۋىنا اسەر ەتكەن قازاقتىڭ بىرلىگى مەن تۇتاستىعىنىڭ قاسيەتتى سيمۆولى. ءبىز وسىنىڭ ءبارىن ۇرپاقتىڭ ساناسىنا ءسىڭىرۋىمىز كەرەك. جاستاردى پاتريوتيزمگە, وتانشىلدىققا, تۋعان جەردى سۇيۋگە باۋلۋ قاجەت, – دەدى مەملەكەت باسشىسى.
نۇرسۇلتان نازارباەۆ ەلدە ۇشتىلدىلىكتى تولىققاندى ەنگىزۋدىڭ وزەكتىلىگىنە تاعى دا توقتالىپ, ءالىپبيدى اۋىستىرۋعا قاتىستى كۇماندى سەيىلتتى.
– اعىلشىن ءتىلىن وقىتۋدى جانداندىرۋ قاجەت, ول ىسكەرلىك ورتانىڭ بارلىق سالاسىندا قولدانىلاتىن بولادى. بۇل – زامان تالابى, تەك بىزگە بايلانىستى ەمەس, – دەدى ەلباسى.
كەزدەسۋ بارىسىندا قازاقستان پرەزيدەنتى وبلىستىڭ دامۋىنداعى بىرقاتار پروبلەمالىق ماسەلەلەرگە توقتالدى.
– بۇل ءوڭىر ءالى دە دوتاتسيالى اۋماق بولىپ وتىر. وبلىس بيۋدجەتىندە وتكەن جىلى مەنشىك تابىستارى نەبارى بەستەن ءبىر بولىكتى قۇرادى. رەسپۋبليكالىق بيۋدجەتتەن كەلىپ تۇسەتىن تۇسىمدەر 80 پايىزدان استى. بيۋدجەتكە تۇسەتىن سالماقتى ازايتۋ, مەنشىك تابىستارىنىڭ ۇلەسىن ۇلعايتۋ جونىندە شارا قابىلدانباي وتىر, – دەدى مەملەكەت باسشىسى.
ەلباسى بيزنەسكە ءاردايىم قولداۋ كورسەتۋ قاجەت ەكەنىنە نازار اۋداردى.
– بيىلعى جولداۋدا بيزنەس ورتاسىنىڭ جاعدايىن جاقسارتۋ جونىندە شارالار ازىرلەۋدى تاپسىردىم. قوسىمشا جەر ۋچاسكەسىن ءبولۋ, جالعا بەرۋ مەرزىمىن ۇزارتۋ, ونى پايدالانۋ ماقساتىن وزگەرتۋ تۋرالى رۇقسات الۋ قۇجاتتارىن قاراستىرۋ مەرزىمىنىڭ ۇزاقتىعىنا بايلانىستى ماسەلەلەردى شەشۋ كەرەك. بۇل راسىمدەردى جاريا تۇردە جۇزەگە اسىرىپ, قاعازباستىلىققا سالىنۋعا جول بەرمەگەن ءجون. كاسىپكەرلىكتى دامىتۋ قارجىلىق تۇراقتىلىقتى ساقتاپ, ءوڭىردىڭ ءوز-ءوزىن قامتاماسىز ەتۋ قابىلەتىن ارتتىراتىن ماڭىزدى تەتىككە اينالۋعا ءتيىس, – دەدى نۇرسۇلتان نازارباەۆ.
سونىمەن بىرگە قازاقستان پرەزيدەنتى ينۆەستيتسيا تارتۋ باعىتىندا جۇيەلى شارالار قابىلداۋ قاجەتتىگىن اتاپ ءوتتى.
– 2016 جىلدىڭ قورىتىندىسى بويىنشا جالپى ينۆەستيتسيا كولەمى تومەندەگەن. وڭىردە اۋىل شارۋاشىلىعىن, وڭدەۋ ونەركاسىبىن, ءتۋريزمدى دامىتۋعا بارلىق مۇمكىندىك بار, – دەدى مەملەكەت باسشىسى.
قازاقستان پرەزيدەنتى ءوڭىردىڭ تۋريستىك الەۋەتىن دامىتۋدىڭ ماڭىزدىلىعىنا ارنايى توقتالدى.
– مەن «بولاشاققا باعدار: رۋحاني جاڭعىرۋ» اتتى ماقالامدا «قازاقستاننىڭ قاسيەتتى رۋحاني قۇندىلىقتارى» جوباسىن ازىرلەۋدى تاپسىردىم. بۇل ورايدا ءبىز قازاقستاننىڭ مادەني جانە تاريحي مۇراسىن نەگىزگە الۋىمىز كەرەك. وڭتۇستىك قازاقستان وبلىسى قايتالانباس ءارى ب ۇلىنبەگەن تابيعي جانە ءىرى مادەني-تاريحي قۇندىلىقتارى بار وراسان زور تۋريستىك الەۋەتكە يە. سوندىقتان تيىمدىلىگى جوعارى جانە باسەكەگە قابىلەتتى تۋريستىك ينفراقۇرىلىم ءتۇزۋ كەرەك, – دەدى مەملەكەت باسشىسى.
قازاقستان پرەزيدەنتى حالىقتى, سونىڭ ىشىندە جاستاردى جۇمىسپەن قامتۋدى جاقسارتۋ ءۇشىن تۇبەگەيلى شارالار قابىلداۋ قاجەتتىگىن اتاپ ءوتتى.
– بەدەلدى جوعارى وقۋ ورنىن ءبىتىرۋ ءاردايىم ماڭىزدى بولا بەرمەيدى. ەڭ باستىسى – ەڭبەك نارىعىندا سۇرانىس بار ماماندىققا يە بولۋ. بۇل, اسىرەسە, اقپاراتتىق تەحنولوگيالار, ءوندىرىستى تسيفرلاندىرۋ جانە كومپيۋتەرلەندىرۋ داۋىرىندە وزەكتى بولماق. تاياۋ بولاشاقتا قازىرگى ماماندىقتاردىڭ 50%-نا سۇرانىس بولمايدى. سوندىقتان ۋاقىت تالابىنا ساي بولۋ كەرەك, – دەدى نۇرسۇلتان نازارباەۆ.
وسى ورايدا, قازاقستان پرەزيدەنتى تۇرعىنداردى ەڭبەك رەسۋرسى كوپ وڭىردەن جۇمىس كۇشى جەتىسپەيتىن وڭىرگە كوشىرۋ جونىندەگى باعدارلاما بار ەكەنىن ەسكە سالدى.
– باعدارلاما سىزدەردىڭ دە وبلىستارىڭىزدا قولدانىلادى. مەن سىزدەردىڭ ەڭبەكقور حالىق ەكەندەرىڭىزدى جاقسى بىلەمىن. سولتۇستىك, شىعىس وڭىرلەرگە قونىس اۋدارىپ, ەلىمىزدىڭ دامۋى مەن بولاشاعىنا زور ۇلەس قوسىپ كەلەسىزدەر. وسى باعىتتاعى جۇمىستى جالعاستىرۋ كەرەك. وبلىس اكىمىنە ۇكىمەتپەن بىرلەسىپ, حالىقتى جۇمىسپەن قامتۋ جانە ونى قونىستاندىرۋ دەڭگەيىن ارتتىرۋ جونىندە شارالار قابىلداۋدى تاپسىرامىن, – دەدى مەملەكەت باسشىسى.
قازاقستان پرەزيدەنتى وبلىستا قۇرىلىس, فارماتسەۆتيكا جانە كولىك-لوگيستيكا كلاستەرلەرى قالىپتاسىپ, جەڭىل ونەركاسىپ سالاسىنداعى كاسىپورىندار دامىپ كەلە جاتقانىن اتاپ ءوتتى.
– ءوڭىردىڭ ەرەكشەلىگىن ەسكەرىپ, ءۇشىنشى جاڭعىرۋ جاعدايىندا اۋىل شارۋاشىلىعى ءونىمىن قايتا وڭدەۋ ءىسىن, وڭدەۋ ونەركاسىبىنىڭ ەكسپورتتىق وندىرىستەرىن دامىتۋ قاجەت. جاڭا ءوسىم نۇكتەلەرىن – تىرەك جوبالاردى الدىمەن وبلىس ورتالىعىندا دامىتۋ كەرەك, – دەدى نۇرسۇلتان نازارباەۆ.
بۇدان بولەك, مەملەكەت باسشىسى ءوڭىردىڭ اۋىل شارۋاشىلىعى سالاسىنداعى الەۋەتىن ىسكە اسىرۋدىڭ ماڭىزدىلىعىن اتاپ ءوتتى.
– اگروونەركاسىپ كەشەنىن دامىتۋ باعدارلاماسىنىڭ مۇمكىندىكتەرىن تولىق پايدالانا ءبىلۋ كەرەك. ەڭ باستى باعىتتار – اۋىل شارۋاشىلىعى ءونىمىنىڭ شىعىمدىلىعىن ارتتىرۋ, وتاندىق تاۋار وندىرۋشىلەردى قولداۋ, زاماناۋي اگروتەحنيكانى قولدانۋ, – دەدى قازاقستان پرەزيدەنتى.
وڭتۇستىكقازاقستاندىقتار مەملەكەت باسشىسىنىڭ «بولاشاققا باعدار: رۋحاني جاڭعىرۋ» اتتى ماقالاسىنداعى وي-پىكىرلەرىن تولىق قولدايتىندىقتارىن ايتىپ, نۇرسۇلتان نازارباەۆقا وڭىرگە دەگەن قامقورلىعى ءۇشىن ريزاشىلىقتارىن ءبىلدىردى.
سونداي-اق, كەزدەسۋ اياسىندا وڭتۇستىك قازاقستان وبلىسىنىڭ اكىمى ج.تۇيمەباەۆ وبلىستىڭ الەۋمەتتىك-ەكونوميكالىق احۋالى جانە ونى دامىتۋ پەرسپەكتيۆالارى تۋرالى باياندادى.
كەزدەسۋ سوڭىندا مەملەكەت باسشىسى قاتىسۋشىلارعا زور تابىس جانە بەرەكە-بىرلىك تىلەدى.
