بۇل تۋرالى بۇگىن ماجىلىستە «وسىمدىك شارۋاشىلىعى ءونىمىن وڭدەۋدىڭ پروبلەمالارى تۋرالى» تاقىرىپپەن وتكەن دوڭگەلەك ۇستەلدە «اتامەكەن» ۇكپ اگروونەركاسىپتىك كەشەن جانە تاماق ونەركاسىبى دەپارتامەنتىنىڭ ديرەكتورى ەربول ەسەنەەۆ ءمالىم ەتتى, دەپ حابارلايدى قازاقپارات.
«ءبىزدىڭ سالادا ەكى مىڭنان استام كاسىپورىن جۇمىس ىستەپ جاتىر. ونىڭ ىشىندە تەك 700-ءى ورتا جانە ءىرى كاسىپورىندار. سونىمەن قاتار سالادا 55 مىڭنان استام ادام ەڭبەك ەتۋدە. بارلىق وڭدەۋشى ونەركاسىپتىڭ 18 پايىزعا جۋىعى تاماق ونەركاسىبىنە تيەسىلى. ارينە, وسى سالانىڭ الەۋەتى جوعارى. اتاپ ايتقاندا, ءبىزدىڭ ونىمگە قىتايلىق نارىق پەن تاياۋ شىعىس ەلدەرى ايتارلىقتاي قىزىعۋشىلىق تانىتۋدا», - دەپ توقتالدى ەسەنەەۆ.
وسى ورايدا ول استىقتى, مايلى داقىلداردى قايتا وڭدەۋ باعىتىنداعى الەۋەتتى تولىقتاي پايدالانۋ كەرەكتىگىن اتاپ ءوتتى.
«2013 جىلدان بەرگى مالىمەتتەرگە توقتالاتىن بولساق, وسى سالاداعى ينۆەستيتسيالار ەكى ەسەگە ارتتى, ياعني 62 ملرد. تەڭگەگە جەتتى. الايدا ءبىزدىڭ كاسىپورىنداردىڭ جۇكتەمەسى ءتيىستى دەڭگەيدە ەمەس. جالپى, وسىمدىك شارۋاشىلىعى ءونىمىن وڭدەۋ كورسەتكىشى تەك 50 پايىزعا جۇكتەلگەن. بۇل ءوز كەزەگىندە بيزنەستى دە, ۇكىمەتتى دە الاڭداتىپ وتىر. وسى تۇرعىدا نەگىزگى پروبلەما سالىق جۇيەسىنىڭ جەتىلدىرىلمەۋىنەن, سونداي-اق رەسەي مەن بەلارۋستەگى ارىپتەستەرىمىز تاراپىنان قاتاڭ دەمپينگتىڭ ورىن الۋىنان بولىپ وتىر», - دەدى ەربول ەسەنەەۆ.
ونىڭ سوزىنە قاراعاندا, ىشكى نارىق ءتيىستى دەڭگەيدە قورعالماي جاتىر.
«بارلىقتارىڭىز تۇتىنۋشى بولىپ تابىلاسىزدار, وسى ورايدا قازاقستاندىق نارىقتا ازىق-ت ۇلىك ءونىمىنىڭ يمپورتتاۋشىلارى قانشالىقتى ەمىن-ەركىن سەزىنەتىندىگىن بايقاپ جۇرسىزدەر. كەيبىر مەملەكەتتىك ورگاندار ەلگە قاداعالاۋسىز تاسىمالدانىپ جاتقان ونىمگە قاجەتتى ارەكەتتەر جاساي الماۋدا. ماسەلەن, رەسەيلىك «روسپوترەبنادزور» قانداي دا ءبىر شەكتەۋدى ەنگىزۋ ءۇشىن سەبەپتەر تاۋىپ جاتىر. سوندىقتان بۇل تۇرعىدا كوپتەگەن ماسەلەلەر بارشىلىق», - دەپ تۇيىندەدى ءسوزىن «اتامەكەن» ۇكپ وكىلى.
