اۋا رايىن بولجاۋ ورتالىعى بيىل اتىراۋعا مول ءور سۋى كەلمەيدى دەگەنىمەن, جاعداي باقىلاۋدا.
بىلتىر كوكتەمگى ءور سۋى قۇرمانعازى اۋدانىنداعى داناي, قاراجار ۋچاسكەلەرىندەگى بوگەتتى شايىپ كەتكەن ەدى. جاعالاۋدى بەكىتۋ جۇمىستارىنا وبلىس قازىناسىنان 47 ملن تەڭگە ءبولىندى. بيىل وسى ماقساتقا 37 ملن تەڭگە قارالعان. وبلىستا سۋ تاسقىنى قاۋپىن تۋدىراتىن 56 شاقىرىمدىق ۋچاسكە بار.
«اتىراۋ قالاسىنداعى 16 ۋچاسكەنىڭ تاسقىن كەزىندە سۋدا قالۋ قاۋپى بار» دەيدى وبلىستىق توتەنشە جاعدايلار دەپارتامەنتى باسشىسىنىڭ ورىنباسارى زامير بەرداشەۆ. «وبلىس اۋماعىندا 1967-1994 جىلدارى توپىراقتان تۇرعىزىلعان 415,5 شاقىرىم قورعانىس بوگەتتەرى بار. ولاردىڭ 172,5 شاقىرىمى قالپىنا كەلتىرۋدى قاجەت ەتەدى. وڭىردەگى بارلىق قورعانىس بوگەتتەرى مەن جاعا بەكىتۋ عيماراتتارى قالا جانە اۋداندارداعى اكىمدىكتەردىڭ تەڭگەرىمىنە بەرىلگەن. وتكەن جىلى قۇرمانعازى اۋدانى بويىنشا سۋ تاسقىنىنا قاۋىپتى 28,6 شاقىرىم قورعانىس بوگەتتەرى جوندەۋدەن وتكىزىلدى. بيىل ماحامبەت اۋدانىنداعى العا سەلوسىنىڭ سۋ تاسقىنىنا قاۋىپتى 2 شاقىرىم بوگەتتىڭ جوندەۋ جۇمىستارىنا قاراجات ءبولىندى» - دەيدى ز.بەرداشەۆ.
ايماقتا سۋ تاسقىنى كۇردەلەنگەن جاعدايدا جەدەل ارەكەت ەتەتىن ارنايى توپ قۇرىلدى. ونىڭ قۇرامىندا 3010 ادام, 486 دانا تەحنيكا, 29 دانا ءجۇزۋ قۇرالدارى بار.
باقىتگۇل باباش,
«ەگەمەن قازاقستان».
اتىراۋ
